6 મહિનાથી ગટરના પાણી વચ્ચે જીંદગી જીવી રહ્યાં છીએ, બાળકોને ચામડીના રોગ થાય છે, કોઇ અમારી વાત સાંભળતું નથી.

Published By : B.K.NEWS DAINIK
Published Date : 2020-12-19 13:27:26
Views : 408
Modified Date : 2020-12-19 13:27:26

ધ્રાંગધ્રા તાલુકાનાં રાજચરાડી ગામનાં નવાપરા વિસ્તારમાં છેલ્લા 6 મહિનાથી ગટર લીકેજ છે. ગટર લીકેજ હોવાથી ગટરનું ગંદુ પાણી રસ્તા પર ચોવીસ કલાક વહ્યા કરે છે. રસ્તો પણ એટલી હદે ખરાબ અને ખાડા-ખાબોચિયા વાળો હોવાથી ત્યાં ગટરનું ગંદુ પાણી ખાડામાં ભરાયેલું રહે છે. આમ ગટરનાં ગંદા પાણીનાં ચોવીસ કલાક વહન અને ભરાય રહેવાના કારણે મચ્છરોનો ખૂબ જ ત્રાસ વધી ગયો છે. આ કારણસર કેટલાંય લોકો બીમાર પણ થયા છે.

6 મહિનાથી ગટર લીકેજની સમસ્યાથી પીડાઈ રહેલા નવા પરાના રહેવાસીઓએ જણાવ્યું છેકે, અમારે ત્યારે સતત ગટરના પાણીનો ભરાવો રહે છે. જેના કારણે ગદંકી રહે છે અને સતત વાસ માર્યા કરે છે. ગટરના પાણી ભરાઈ રહેવાથી મચ્છર અને માખીનો ઉપદ્રવ રહે છે અને રહેવાસીઓ માંદગીમાં સપડાઈ રહ્યાં છે. ગંદકી અને મચ્છરોના કારણે બાળકોને ચામડીના રોગ થઇ રહ્યાં છે, દવા લેવા માટે છેક ગાંધીનગર જવું પડે છે. ગટરના પાણી ભરાવાથી રસ્તા બંધ થઇ ગયા છે. અમારે ઘરના દરવાજા બીજી શેરી બાજુ બનાવવા પડ્યાં છે. અમે સતત સરપંચને આ અંગે જાણ કરી રહ્યાં છીએ, પરંતુ અત્યારસુધી તેનો કોઇ નિવેડો આવ્યો નથી. સરપંચ અમારી વાત સાંભળતા નથી. અમારી આ સમસ્યાનું સત્વરે નિરાકરણ આવે એવી અમે માગણી કરીએ છીએ.

છેલ્લા 6 મહિનાથી ગટર લીકેજ થઈ રહી હોવાની રાજચરાડી ગામનાં તલાટી અને સરપંચને વારંવાર રજૂઆત કર્યા હોવા છતાં કોઈપણ યોગ્ય કામગીરી હાથ ધરવામાં આવી નથી. આ વિસ્તારનાં સ્થાનિકો દ્વારા લીકેજ ગટરના રીપેરીંગ માટે અનેક વખત રજૂઆત કરી છે. પરંતુ ગામ વહીવટ કરનાર સમસ્યાને ધ્યાનમાં ન લેતા, લોકોને ગણકારતા નથી. જેથી રાજચરાડી ગામનાં નવાપરા વિસ્તારનાં સ્થાનિકોને ખૂબજ હાલાકીનો સામનો કરવો પડી રહ્યો છે. વારંવાર ગામનાં તલાટી અને સરપંચને રજૂઆત છતાં કોઈ ઉકેલ ન આવતા રહીશો રોષે ભરાયા છે. જો લીકેજ ગટરની સમસ્યાનો નિકાલ અઠવાડિયામાં નહીં કરાય તો ધ્રાંગધ્રાનાં મામલતદારને આવેદન આપી રજૂઆત કરવામાં આવશે.