ફણસીમાં સારું ઉત્પાદન મેળવવા શું કરવું ?

Published By : B.K.NEWS DAINIK
Published Date : 2021-03-22 11:42:53
Views : 470
Modified Date : 2021-03-22 11:43:34

ભારતમાં કઠોળ વર્ગના લીલા શાકભાજીમાં ફણસીનું આગવું સ્થાન છે. મોટા શહેરોમાં ફણસીની મોટી માગ રહેલી છે. સુકા અને લીલાં શાક તરીકે ફણસીનું મહત્ત્વ પોષણની દૃષ્ટીએ ઘણું ઊંચું છે. આ શાક પ્રોટીન, કેલ્શિયમ, લોહ અને વિટામિનથી ભરપૂર હોય છે. ફણસીનું વાવેતર કર્યુ હોય તે ખેતરને નીંદણમુક્ત રાખવું જરૂરી છે. ફણસીના મૂળ છીછરા હોય છે. આ ઉપરાંત પાકમાં જો વધારે પડતું પિયત આપવામાં આવે તો પણ પાકને અસર કરે છે. ફસલ દરમિયાન બહુ થોડાપ્રમાણમાં પાણી આપીને સારો પાક લઈ શકાય છે, જો કે ફૂલ આવવાની તૈયારી હોય ત્યારે પિયત આપવાથી શિંગો સારા પ્રમાણમાં બેસે છે. આવી રીતે શિંગો બેઠા પછી ફરીએકવાર પિયત આપવું જોઈએ. ફણસીમાં વાનસ્પતિ હોર્મોન્સના છંટકાવ કરીને શિંગ બેસવા માટેનું પ્રેરણ કરી વધારે અને વહેલું ઉત્પાદન લઈ શકાય છે. ફણસીની કુમળી લીલી શિંગોનું વેચાણ કરવામાં આવે છે. શિંગ પુરા કદની થાય તે પહેલાં જ બીજ એકદમ નાના કદના હોય તેવી કુમણી શિંગોની વીણી કરવી. છોડ ઉપર પહેલીવાર ફૂલ બેઠાં પછી બે-ત્રણ અઠવાડિયામાં શિંગો વીણી લાયક થાય છે. જો લણણીમાં ઢીલ કરવામાં આવે તો ઉત્પાદન વધારે આવે પણ શિંગની ગુણવત્તામાં ઝડપી ઘટાડો થઈ જાય છે. ઠીંગણી જાતો કરતાં ઊંચી જાતો ઉપર વધારે લાંબા સમય સુધી શિંગો બેસે છે.