માર્કેટ યાર્ડમાં મગફળીની રેકોર્ડબ્રેક 1.25 લાખ ગુણીની આવક, રાત્રે આવક બંધ કરાતા ખેડૂતોએ હલ્લાબોલ કર્યો

Published By : B.K.NEWS DAINIK
Published Date : 2019-11-26 12:51:52
Views : 578
Modified Date : 2019-11-26 12:51:52

શિયાળા પાકનું વાવેતર અને લગ્નની સિઝન આવી રહી હોય ખેડૂતોને નાણાની જરૂરિયાત પડતા મગફળીના પાકનું વેચાણ કરી રહ્યા છે. રાજકોટ યાર્ડમાં મગફળીની રેકોર્ડબ્રેક આવક થઇ છે. ગઇકાલે રાત્રે જ 1.25લાખ ગુણીની આવક થતા યાર્ડ ઉભરાય ગયું છે. ગત રાત્રે આવક વધી જતા અને યાર્ડમાં જગ્યા ન હોવાથી આવક બંધ કરાતા ખેડૂતોએ હલ્લાબોલ કર્યો હતો અને પોલીસને દોડી જવાની નોબત આવી હતી. પરંતુ બાદમાં મામલો થાળે પડ્યો હતો. રાજકોટ યાર્ડમાં આજે મગફળીનો એક મણનો ભાવ 750થી 970 સુધી મળી રહ્યો છે.

બેડી યાર્ડમાં મગફળીની આવક વધી જતા દરવાજા બંધ કરાયા

બેડી યાર્ડમાં બે દિવસ મગફળીની આવક બંધ રખાયા બાદ સોમવારથી આવક શરૂ કરવામાં આવી હતી. બપોરે 2 વાગ્યાથી આવક શરૂ થતાં જ ગામે ગામથી ખેડૂતો પોતાની મગફળી લઈને આવી ગયા હતા. યાર્ડમાં જગ્યા કરતા આવક વધી જતાં એક તબક્કે આવક બંધ રાખવી પડી હતી અને ખેડૂતો અંદર ન આવે એ માટે દરવાજા બંધ કરી દેવાયા હતા. જેને કારણે ખેડૂતો વિફર્યા હતા. ખેડૂતોએ હલ્લાબોલ કરતા દરવાજા ખોલી દેવામાં આવ્યા હતા બાદમાં પરિસ્થિતિ થાળે પડી હતી.યાર્ડમાં બપોરથી જ મગફળીની ચિક્કાર આવક શરૂ થઈ ગઈ હતી.પ્લેટફોર્મ નહીં હોવાથી મગફળી ક્યા રાખવી એક પ્રશ્ન થઈ પડ્યો હતો. સોમવારે સાંજે 8 વાગ્યે આવક બંધ કરવાની જાહેરાત કરી હતી. એવું કહેવામાં આવ્યું હતું કે, યાર્ડમાં જગ્યા નહીં હોવાથી મગફળી રાખી શકાય એમ નથી માટે હવે કોઈ ખેડૂતની મગફળી સ્વીકારવામાં નહીં આવે આ પ્રકારની જાહેરાત કરીને અચાનક દરવાજા બંધ કરી દેવાતા દૂર દૂરથી આવેલા ખેડૂતોમાં રોષ ફેલાયો હતો. ખેડૂતોએ સૂત્રોચ્ચાર કર્યા હતા અને વિરોધ વ્યક્ત કર્યો હતો.