16 વર્ષની સગીરા પ્રેમી સાથે ભાગી, પાછી આવીને માતા-પિતાને ધમકી આપી, મને પ્રેમી સાથે જ લગ્ન કરવા છે નહિ તો હું મરી જઈશ.

Published By : B.K.NEWS DAINIK
Published Date : 2020-12-21 12:28:36
Views : 540
Modified Date : 2020-12-21 12:28:36

આજના સમયમાં પ્રેમમાં લોકો એટલા ગળાડૂબ થઈ જાય છે કે તેઓ પોતે શું વિચારે છે અને શું કરવા જઈ રહ્યા છે. તેની સમજ નથી હોતી. ખાસ કરીને સગીર વયના બાળકો આજકાલ પ્રેમમાં પડી અને જો તેને ન પામે તો આત્મહત્યાની ધમકી આપે છે. અમદાવાદમાં 16 વર્ષની સગીરાને 22 વર્ષના યુવક સાથે પ્રેમ થઈ ગયો હતો. છોકરીની ઉંમર નાની હોવાથી માતા-પિતાએ લગ્ન કરાવવવાની ના પાડતા સગીરાએ આત્મહત્યા કરી લેવાની ધમકી આપી હતી. માતા-પિતાએ આ મામલે મહિલા હેલ્પલાઇનની મદદ લીધી હતી. મહિલા હેલ્પલાઈનની ટીમે સગીરાને સમજાવી અને ઉંમર થશે એટલે લગ્ન કરાવી દેશે. પરિવારને પણ તેને પહેલાની જેમ રાખી અને સમજાવવા સલાહ આપી હતી.

અમદાવાદમાં રહેતી 16 વર્ષની સગીરાને 22 વર્ષના યુવક સાથે પ્રેમસંબંધ બંધાયો હતો. બંને એકબીજા સાથે વાતચીત અને મળતાં હતા. દરમ્યાનમાં સગીરાના ઘરે ખબર પડતાં તેણે યુવક સાથે લગ્ન કરવાની જીદ પકડી હતી. માતા-પિતાએ તારી લગ્ન કરવાની ઉંમર નથી કહી જ્યારે ઉંમર થશે ત્યારે લગ્ન કરાવી દઈશ કહ્યું હતું. પરંતુ પ્રેમમાં આંધળા વ્યક્તિને કશું દેખાય જ નહીં તેમ તેણે ધીરજ રાખી નહિ અને યુવક સાથે ભાગી ગઈ હતી. બંને એક મહિનો અલગ અલગ જગાયે રહ્યા હતા. પોલીસ ફરિયાદ કરવામાં આવી હતી અને બંનેને શોધી લાવ્યા હતા. યુવક સામે પોલીસ ફરિયાદ હોવાથી તેની ધરપકડ કરી અને સગીરાને ઘરે લાવ્યા હતા.

ઘરે લાવ્યા બાદ પણ સગીરાએ જીદ પકડી હતી કે તેને યુવક સાથે જ રહેવું છે અને જો તેને સાથે નહિ રહેવા દે તો મરી જશે. આત્મહત્યા કરવાની ધમકી આપતા માતા-પિતાએ મહિલા હેલ્પલાઈનની મદદ લીધી હતી. મહિલા હેલ્પલાઈનની ટીમે એકાંતમાં સગીરાને સમજાવી હતી કે આત્મહત્યા એક ઉપાય નથી. તારી લગ્ન કરવાની ઉંમર થાય એટલે ચોક્કસ લગ્ન કરી શકે છે. પરિવારને પણ સમજ આપી હતી કે તેની સાથે હવે પહેલા જેમ જ વર્તન કરે અને શાંતિથી રહે તે જરૂરી છે.