ગુજરાત હાઈકોર્ટમાં જજોની 20 તથા અન્ય અદાલતોમાં 535 જગ્યા ખાલી

Published By : B.K.NEWS DAINIK
Published Date : 2025-02-14 18:07:38
Views : 39
Modified Date : 2025-02-14 18:07:38

સુપ્રીમ કોર્ટ સહિત દેશના રાજ્યોની વિવિધ હાઇકોર્ટમાં કુલ 1114 જેટલી સ્વીકૃત જગ્યામાંથી 367 જેટલી જગ્યા ખાલી છે. જેમાં ગુજરાત હાઇકોર્ટમાં કુલ મંજૂર 52 જજની સંખ્યા સામે 20 જગ્યાઓ ખાલી છે. તો જિલ્લા તેમજ સબ ઓર્ડિનેટ કોર્ટમાં 535 જજની જગ્યા ખાલી છે.

ગુજરાત સહિત દેશના મોટાભાગના રાજ્ય એવા છે. જેમાં હાઈકોર્ટના ન્યાયાધીશની જગ્યાઓ ખાલી હોવાની માહિતી રાજ્યસભામાં કાયદા અને ન્યાય મંત્રાલય દ્વારા અપાઈ છે. ગુજરાતમાં ફેબ્રુઆરી સુધીના આંકડા મુજબ 20 જેટલી હાઇકોર્ટ જજની જગ્યા ખાલી છે.

જો કે કેટલાક રાજ્ય એવા છે જ્યાં એકપણ જગ્યા ખાલી નથી કે જૂજ સંખ્યામાં જ જગ્યા ભરાયેલી નથી. આંધ્રપ્રદેશમાં 7, ઉત્તરાખંડમાં 3, કર્ણાટકમાં 13 તો મદ્રાસ હાઇકોર્ટમાં 10 જગ્યા જ ખાલી છે. મંત્રાલય દ્વારા વિવિધ રાજ્યમાં ફાસ્ટ ટ્રેક સ્પેશિયલ કોર્ટની માહિતી પણ આપવામાં આવી છે.

તે મુજબ ડિસેમ્બર-2024 સુધી ગુજરાતમાં કુલ 35 જેટલી આવી કોર્ટ છે. બળાત્કાર અને ઈ-પોક્સોને લગતા કેસ પણ ફાસ્ટ ટ્રેક સ્પેશિયલ કોર્ટમાં ચલાવાતા હોય છે. ગુજરાત કરતા આવી ખાસ કોર્ટ વધુ સંખ્યા હોય તેવા રાજ્યમાં કેરળમાં 55, મધ્યપ્રદેશમાં 67, ઓરિસ્સામાં 44, રાજસ્થાનમાં 45, તેલંગાણામાં 36, બિહારમાં 46 અને ઉત્તરપ્રદેશમાં સૌથી વધુ 218 કોર્ટ છે.

ગુજરાત સહિત દેશના મોટાભાગના રાજ્યમાં ઇ-કોર્ટ પણ કાર્યરત છે. જેમાં ન્યાય સંકુલ અને જેલ વચ્ચે વીડિયો કોન્ફરન્સથી ઈ-કોર્ટ ચલાવાય છે. ડિસેમ્બર-2024 સુધીના અપાયેલા આંકડા પ્રમાણે ગુજરાત હાઇકોર્ટના અત્યાર સુધી કુલ 4,12,020 અને જિલ્લા કોર્ટમાં 2,17,908 કેસ વીડિયો કોન્ફરન્સ થકી ચલાવવામાં આવ્યા છે.