આરટીઓ સામે ધમધમતા ગેરકાયદે ડ્રાઇવિંગ ટ્રેક પર બુલડોઝર ફરી વળ્યું

Published By : B.K.NEWS DAINIK
Published Date : 2026-02-02 13:12:36
Views : 58
Modified Date : 2026-02-02 13:12:36

ગાંધીનગરના સેક્ટર-૩ન્યુંમાં આવેલા પ્રાદેશિક પરિવહન કચેરી એટલે કે, આરટીઓની બિલકુલ સામે, સરકારી અને ખાનગી જમીન પર ગેરકાયદેસર રીતે ઉભા કરી દેવાયેલા ડ્રાઇવિંગ ટેસ્ટ ટ્રેક પર આખરે તંત્રએ લાલ આંખ કરી છે. પાટનગર યોજના વિભાગ દ્વારા હાથ ધરવામાં આવેલી દબાણ હટાવો ઝુંબેશ અંતર્ગત આ તમામ ગેરકાયદે બાંધકામોને તોડી પાડી જમીન ખુલ્લી કરાવવામાં આવી છે. છેલ્લા પાંચ વર્ષથી કોઈ પણ પ્રકારની મંજૂરી વગર ચાલતા આ 'સમાંતર આરટીઓ' જેવા ટ્રેક પર તવાઈ આવતા ગેરકાયદે સંચાલકોમાં ફફડાટ વ્યાપી ગયો છે. આ સમગ્ર કૌભાંડ અત્યંત વ્યવસ્થિત રીતે ચાલી રહ્યું હતું. આરટીઓમાં જે પ્રકારના ઓફિશિયલ ડ્રાઇવિંગ ટ્રેક હોય છે, તેવી જ સાઈઝ અને ડિઝાઇનના ટ્રેક અહીં પેવર બ્લોક નાખીને તૈયાર કરવામાં આવ્યા હતા.

જેમાં ફોર-વ્હીલર ટેસ્ટ માટેના મહત્વના અવરોધો જેવા કે પાર્કિંગ બ્લોક, ઢાળ, સ્પિડબ્રેકર,ઇંગ્લિશ 'એઇટ',રિવર્સ 'એસ' બનાવવામાં આવ્યા હતા.નવા લાયસન્સ લેવા આવતા અરજદારો ફેઈલ થવાના ડરથી આ ખાનગી ટ્રેક પર પ્રેક્ટિસ કરવા આવતા હતા. જેનો ફાયદો ઉઠાવી સંચાલકો કોઈપણ મંજૂરી વગર પ્રતિ વ્યક્તિ રૂપિયા ૫૦૦ જેવી મોટી રકમ વસૂલતા હતા. શરૂઆતમાં આરટીઓ અધિકારીઓએ આ બાબતે ઉચ્ચ કક્ષાએ રજૂઆતો કરી હતી, પરંતુ મ્યુનિસિપલ કોર્પોરેશન અને પાટનગર યોજના વિભાગ વચ્ચેની સંકલન કમીને કારણે આ ટ્રેકની સંખ્યા એક પછી એક વધતી ગઈ હતી.

હાલમાં જ્યારે ગાંધીનગરમાં દબાણ હટાવવાની ઝુંબેશ પૂરજોશમાં ચાલી રહી છે, ત્યારે પાટનગર યોજના વિભાગની ટીમની નજરે આ વિશાળ ગેરકાયદે ટ્રેક ચઢયા હતા. તંત્રએ તાત્કાલિક બુલડોઝરની મદદથી આ ટ્રેક પર લગાવેલા બ્લોક અને અન્ય માળખું તોડી પાડયું છે.