ઈન્ટરનેશનલ ફૂટબોલમાંથી ફ્રાંસ અને વેલ્સના કેપ્ટને નિવૃત્તિ જાહેર કરી

Published By : B.K.NEWS DAINIK
Published Date : 2023-01-11 15:47:11
Views : 449
Modified Date : 2023-01-11 15:47:11

ફ્રાન્સની ફૂટબોલ ટીમના કેપ્ટન હ્યુગો લોરિસે આંતરરાષ્ટ્રીય ફૂટબોલમાંથી 36 વર્ષની ઉંમરે નિવૃત્તિ જાહેર કરી છે. ફિફા વર્લ્ડ કપ – 2022ની ફાઇનલમાં આર્જેન્ટિના સામેની હારના ત્રણ અઠવાડિયા બાદ તેણે આ નિર્ણય લીધો છે. ટોટેનહામ હોટ્સપુરના ગોલકીપર લોરિસે જણાવ્યું હતું કે, "મેં મારી આંતરરાષ્ટ્રીય કારકિર્દીનો અંત “મેં બધું જ આપી દીધું છે” એવી લાગણી સાથે કરવાનો નિર્ણય કર્યો છે. મને લાગે છે કે યુરો કપના ક્વોલિફાઈંગ રાઉન્ડની શરૂઆતના અઢી મહિના પહેલા હવે તેની જાહેરાત કરવી મહત્વપૂર્ણ છે.”

લોરિસે નવેમ્બર 2008માં 21 વર્ષની ઉંમરે ઉરુગ્વે સામેની મૈત્રીપૂર્ણ મેચમાં આંતરરાષ્ટ્રીય ફુટબોલમાં પ્રવેશ કર્યો હતો. તે વિશ્વ કપમાં ફ્રાન્સ માટે સૌથી વધુ કેપ મેળવનાર ખેલાડી પણ છે. તેણે લિલિયન થુરામનો 142 મેચનો રેકોર્ડ તોડ્યો છે. લોરિસ ફાઈનલમાં ઉતરવા સહિત 145 મેચમાં ફ્રાન્સ ટીમનો ભાગ હતો. ફિફા વર્લ્ડ કપ – 2022ની ફાઇનલમાં, ફ્રાન્સ આર્જેન્ટિના સામે ફુલ ટાઇમ અને પછી વધારાના સમયમાં 3-3ની ડ્રો બાદ પેનલ્ટી શૂટઆઉટમાં હારી ગયું. આર્જેન્ટિનાએ શૂટઆઉટમાં ફ્રાન્સ પર 4-2થી જીત મેળવી હતી.

હ્યુગો લોરિસ ચોથો સુકાની છે જેણે સતત બે વર્લ્ડ કપ ફાઇનલમાં પોતાની ટીમનું નેતૃત્વ કર્યું. આ સિદ્ધિ સૌપ્રથમ જર્મનીના કાર્લ હેન્ઝ રુમેનીગે હાંસલ કરી હતી. તેણે 1982 અને 1986 વર્લ્ડ કપની ફાઇનલમાં જર્મનીનું નેતૃત્વ કર્યું હતું, પરંતુ બંને ફાઇનલમાં હાર્યું હતું. સુપ્રસિદ્ધ ફૂટબોલર ડિએગો મેરાડોનાએ પણ તેની કપ્તાની હેઠળ આર્જેન્ટિનાને સતત બે વર્લ્ડ કપ ફાઇનલમાં દોરવણી આપી હતી.

આર્જેન્ટિના 1986માં વિજેતા બન્યું હતું જ્યારે 1990માં જર્મની સામે હાર્યું હતું. ડુંગાએ 1994 અને 1998માં બે વખત બ્રાઝિલને ફાઈનલ સુધી પહોંચાડ્યું હતું. 1994માં બ્રાઝિલ વિજેતા બન્યું અને 1998માં ફાઇનલમાં ફ્રાન્સ સામે હાર્યું. લોરિસ પાસે સતત બે વર્લ્ડ કપ જીતનાર પ્રથમ કેપ્ટન બનવાની તક હતી, પરંતુ તે ચૂકી ગયો. લોરિસે કહ્યું- “હું વાસ્તવમાં વર્લ્ડ કપ પછી નિવૃત્તિ વિશે વિચારી રહ્યો હતો”.