ટીમ ઇન્ડિયાએ 69 વર્ષ પહેલાં ચેન્નઇમાં જીતી હતી પ્રથમ મેચ, ત્યારે ઇંગ્લેન્ડને હરાવ્યું હતુ.

Published By : B.K.NEWS DAINIK
Published Date : 2021-01-31 12:14:42
Views : 342
Modified Date : 2021-01-31 12:14:42

ટીમ ઈન્ડિયાને ઇંગ્લેન્ડ સામે 4 ટેસ્ટ શ્રેણીની પ્રથમ મેચ 5 ફેબ્રુઆરીથી રમવાની છે. મેચ ચેન્નઈના એમ.એ. ચિદમ્બરમ સ્ટેડિયમ ખાતે રમાશે. ભારતીય ટીમ માટે આ ગ્રાઉન્ડ ખૂબ જ ખાસ રહ્યું છે. ટીમે ક્રિકેટ ઇતિહાસની પ્રથમ જીત ફેબ્રુઆરી 1952માં આ ગ્રાઉન્ડ પર મેળવી હતી. 69 વર્ષ પહેલા તેણે અહીં ઇંગ્લેન્ડને ઇનિંગ્સ અને 8 રનથી હરાવ્યું હતું.

1952માં જ્યારે ટીમ ઈન્ડિયા ઇંગ્લેન્ડ સામે ચેન્નઇમાં ટેસ્ટ રમવા ઉતરી હતી, ત્યાં સુધીમાં એકંદરે 24 મેચ રમાઈ ગઈ હતી. આમાં, ટીમ 12 મેચ હારી હતી અને એટલા જ ડ્રો રમી હતી.ભારતીય ટીમે ક્રિકેટમાં તેની પહેલી મેચ જીતવા માટે તેની જ ધરતી પર 12 ટેસ્ટ રમી ચૂક્યું હતું, જેમાં 8 ડ્રો રહી અને 4 મેચ હારી ગયું હતું. ભારતીય ટીમે ચેન્નઇમાં 2 ટેસ્ટ રમી હતી અને ત્રીજી મેચમાં તેણે જીત મેળવી હતી.

1952ની ટેસ્ટ મેચમાં ઇંગ્લેન્ડે ટોસ જીતીને પ્રથમ બેટિંગ કરવાનો નિર્ણય કર્યો હતો. ડોનાલ્ડ કૈરની કેપ્ટનશીપ હેઠળ ઈંગ્લેન્ડે પ્રથમ દાવમાં 266 રન બનાવ્યા હતા.તેના જવાબમાં વિજય હઝારેની કેપ્ટનશશીપમાં ભારતીય ટીમે 9 વિકેટે 457 રન બનાવીને ઇનિંગની ઘોષણા કરી હતી. ત્યારે ઓપનર પંકજ રોયે 111રન અને પોલી ઉમ્રીગરે 130 રનની અણનમ ઇનિંગ્સ રમી હતી.

91 રનથી પાછળ રહેલી ઇંગ્લેન્ડ બીજી ઇનિંગ્સમાં વધારે કૈ ખાસ કરી શકી નહીં. તેની ઉપર લીડ લેવાનું અને પછી લક્ષ્ય આપવાનું દબાણ હતું. આ દરમિયાન ઓફ સ્પિનર ગુલામ અહેમદ અને ડાબોડી સ્પિનર વીનુ માંકડે ઇંગ્લિશ બેટ્સમેનને તેમની સ્પિનમાં ફસાવી દીધો હતો. બંનેએ ઈંગ્લેન્ડની 4-4 વિકેટ લઈને ઈંગ્લેન્ડને 183 રન પર સમેટી લીધું હતું. આ સાથે ભારતે મેચ ઇનિંગ્સ અને 8 રને મેચ જીતી લીધી હતી.

આખી મેચમાં એક જ છગ્ગો મારવામાં આવ્યો હતો. તેને ભારતીય મિડલ ઓર્ડરના બેટ્સમેન દત્તુ ફડકર દ્વારા ફટકારવામાં આવ્યો હતો. તેણે 61 રનની ઇનિંગ્સ રમી હતી. દત્તુને તેની ઇનિંગ્સમાં એક પણ ચોગ્ગો માર્યો ન હતો.

- ટીમ ઈન્ડિયાએ અત્યાર સુધીમાં કુલ 546 ટેસ્ટ મેચ રમી છે, જેમાંથી 159 મેચ જીતી છે અને 168 હારી છે. 218 ટેસ્ટ ડ્રો રહી હતી અને એક ટાઇ રમી હતી.
- ઇંગ્લેન્ડની ટીમે અત્યાર સુધીમાં 1030 ટેસ્ટ રમી છે જેમાં 376 જીતી અને 305 હારી છે. 349 ટેસ્ટ ડ્રો રહી.
- ભારત અને ઇંગ્લેન્ડ વચ્ચે અત્યાર સુધીમાં 122 ટેસ્ટ થઈ છે. ટીમ ઈન્ડિયાએ 26 મેચ જીતી હતી અને ઇંગ્લેન્ડે 47 મેચ જીતી હતી. 49 મેચ ડ્રો રહી હતી.
હાલમાં કોરોનાની મહામારી વચ્ચે 10 મહિના 26 દિવસ પછી ભારતમાં આંતરરાષ્ટ્રીય ક્રિકેટ મેચ રમાશે. આ છેલ્લા 28 વર્ષમાં દેશમાં બે આંતરરાષ્ટ્રીય મેચો વચ્ચેનું સૌથી લાંબુ અંતર હશે. 10 માર્ચ 2020ના રોજ ગ્રેટર નોઈડામાં આયર્લેન્ડ અને અફઘાનિસ્તાન વચ્ચે ભારતમાં છેલ્લી આંતરરાષ્ટ્રીય મેચ રમાઈ હતી. આ પછી, કોરોનાને કારણે કોઈ મેચ થઈ ન હતી.ટીમ ઈન્ડિયાએ ઘરઆંગણે છેલ્લી મેચ 19 જાન્યુઆરી 2020 ના રોજ ઓસ્ટ્રેલિયા સામે વનડે રમી હતી. ભારતીય ટીમે આ બેંગ્લોર વનડેમાં જીત મેળવી હતી. વિરાટ કોહલીની કેપ્ટનશીપમાં ભારતીય ટીમ હવે જીતથી સાથે શરૂઆત પણ કરવા માંગશે.