રહાણે-જાડેજાની ઈનિંગથી ભારત મજબૂત સ્થિતિમાં, ટીમ ઈન્ડિયાને 50+ રનની સરસાઈ.

Published By : B.K.NEWS DAINIK
Published Date : 2020-12-27 12:21:57
Views : 377
Modified Date : 2020-12-27 12:21:57

ભારત અને ઓસ્ટ્રેલિયા વચ્ચે 4 મેચની ટેસ્ટ સિરિઝની બીજી મેચ મેલબર્નમાં રમાઈ રહી છે. આ બોક્સિંગ ડે ટેસ્ટની બીજા દિવસે ટીમ ઈન્ડિયાએ ઓસ્ટ્રેલિયા પર સરસાઈ મેળવી છે. ભારતીય કપ્તાન અજિંક્ય રહાણે અને રવિન્દ્ર જાડેજા ક્રિઝ પર છે. ભારતનો સ્કોર અત્યારે 5 વિકેટ ગુમાવ્યા બાદ 260 રન થયો છે અને સાથે ભારતે ઓસ્ટ્રેલિયા પર 65 રનની સરસાઈ મેળવી લીધી છે. જાડેજા અને રહાણે, બંનેએ છઠ્ઠી વિકેટ માટે 80+ રનની પાર્ટનરશીપ થઈ ચૂકી છે. ઓસ્ટ્રેલિયાના ફાસ્ટ બોલર મિચેલ સ્ટાર્કે ટેસ્ટ ક્રિકેટમાં 250 વિકેટ પૂરી કરી. ઋષભ પંતને આઉટ કરીને તેણે આ ઉપલબ્ધિ હાંસલ કરી. રહાણે અને પંતે પાંચમી વિકેટ માટે 57 રનની પાર્ટનરશીપ કરી.

આ પહેલા રહાણેએ કેપ્ટન ઈનિંગ રમીને પોતાની ટેસ્ટ કેરિયરની 23મી ફિફ્ટી ફટકારી. ઓસ્ટ્રેલિયા વિરુદ્ધ રહાણેની આ 5મી ફિફ્ટી છે. વિકેટકીપર બેટ્સમેન ઋષભ પંત 40 બોલમાં 29 રન બનાવીને આઉટ થયો. મિચેલ સ્ટાર્કના બોલમાં તેનો કેચ વિકેટકીપર ટિમ પેને ઝડપી લીધો હતો. રહાણે અને પંતે પાંચમી વિકેટ માટે 57 રનની પાર્ટનરશીપ કરી. ઓસ્ટ્રેલિયા તરફથી સ્ટાર્ક અને કમિન્સે 2-2- વિકેટ લીધી. જ્યારે, લિયોનને 1 વિકેટ મળી.સ્ટાર્કે 250 વિકેટ લેવાની સાથે જ એક રેકોર્ડ પણ પોતાના નામે કર્યો. તે ઓસ્ટ્રેલિયાનો સૌથી ઓછા બોલમાં 250 વિકેટ લેનાર બોલર બન્યો. આ અગાઉ આ રેકોર્ડ મિચેલ જોનસનના નામે હતો.

બોલર	250 વિકેટ લેવા માટે બોલ ફેંક્યા
મિચેલ સ્ટાર્ક	11976
મિચેલ જોનસન	12578
ડેનિસ લીલી	12722
બ્રેટ લી	12961
ગ્લેન મેકગ્રા	13015

વિકેટકીપર	150 શિકાર માટે ટેસ્ટ રમી
ટીમ પેન	33 મેચ
ક્વિન્ટન ડી કોક	34 મેચ
એડમ ગિલક્રિસ્ટ	36 મેચ
માર્ક બાઉચર	38 મેચ
રૉડ માર્શ	39 મેચ

ઓસ્ટ્રેલિયાના કપ્તાન ટિમ પેન સૌથી ઓછી ટેસ્ટમાં 150 શિકાર કરનારો વિકેટકીપર બન્યો છે. તેણે 33 ટેસ્ટમાં આ સિદ્ધિ હાંસલ કરી. આ અગાઉ આ રેકોર્ડ ઓસ્ટ્રેલિયાના સાઉથ આફ્રિકાના ક્વિન્ટન ડી કોકના નામે હતો.

શુભમન ઓસ્ટ્રેલિયામાં ડેબ્યુ કરીને સૌથી વધુ રન બનાવનાર ત્રીજો ભારતીય પ્લેયર છે. ડેબ્યુ મેચની પ્રથમ ઈનિંગમાં તેણે 45 રન બનાવ્યા. સૌથી વધુ રન બનાવવાનો રેકોર્ડ મયંક અગ્રવાલના નામે છે. તેમણે 2018-19માં 76 રન બનાવ્યા હતા.પુજારા 70 બોલ પર 17 રન બનાવીને આઉટ થયો. ટિમ પેને તેનો શાનદાર કેચ લીધો. જ્યારે, ડેબ્યુ મેચ રમી રહેલા શુભમન ગિલે 65 બોલ પર 45 રનની ઈનિંગ રમી. શુભમન અને પુજારા વચ્ચે બીજી વિકેટ માટે 61 રનની પાર્ટનરશીપ થઈ. જ્યારે, ઓપનર મયંક અગ્રવાલ (0)ને પ્રથમ દિવસે ફાસ્ટ બોલક મિચેલ સ્ટાર્કે આઉટ કર્યો હતો.શુભમનને મેચમાં બે જીવતદાન મળ્યા. શનિવારે પ્રથમ દિવસે ચોથી ઓવરમાં કમિન્સના બોલ પર લાબુશેને શુભમનનો કેચ ડ્રોપ કર્યો. એ સમયે તે 4 રન પર બેટિંગ કરી રહ્યો હતો. તેના પછી આજે 13મી ઓવરમાં હેઝલવુડના બોલ પર પેને તેનો કેચ છોડ્યો. એ સમયે શુભમન 28 રન પર બેટિંગ કરી રહ્યો હતો.

ભારત અને ઓસ્ટ્રેલિયા વચ્ચે અત્યારસુધીમાં કુલ 99 ટેસ્ટ મેચ રમાઈ છે. તેમાં ભારતે 28 અને ઓસ્ટ્રેલિયાએ 43 મેચ જીતી છે. 27 મેચ ડ્રો અને 1 ટાઈ રહી હતી. ઓસ્ટ્રેલિયામાં બંને વચ્ચે 49 મેચ રમાઈ હતી. તેમાંથી ભારતે માત્ર 7 અને ઓસ્ટ્રેલિયાએ 30 મેચોમાં જીત હાંસલ કરી. 12 મેચ ડ્રો રહી.સિરીઝમાં જીતની દોડમાં યથાવત રહેવા માટે ભારતીય ટીમે આ મેચ જીતવી પણ જરૂરી છે. પહેલી મેચમાં ભારતને 8 વિકેટથી હરાવીને ઓસ્ટ્રેલિયા સિરીઝમાં 1-0માં આગળ છે. ભારતીય ટીમ ઓસ્ટ્રેલિયા વિરુદ્ધ છેલ્લી બે સિરીઝ જીતી ચૂકી છે. એવામાં તે આ સિરીઝને પણ જીતીને ઈતિહાસ રચવા માગશે. ટીમ ઈન્ડિયા અત્યારસુધી ઓસ્ટ્રેલિયા વિરુદ્ધ સતત 3 સિરીઝ નથી જીતી શકી.