યુક્રેન પર પરમાણુ હુમલો થઈ શકે છે : પુતિને 'ન્યુક્લિયર વોર ડ્રિલ'ના આદેશ આપ્યા, પરિવારને સાઇબેરિયા મોકલી દીધો

Published By : B.K.NEWS DAINIK
Published Date : 2022-03-20 13:01:52
Views : 367
Modified Date : 2022-03-20 13:01:52

યુક્રેન સાથે વધી રહેલા તણાવ વચ્ચે રશિયાના રાષ્ટ્રપતિ વ્લાદિમીર પુતિને 'ન્યુક્લિયર વોર ઈવેક્યુએશન ડ્રિલ'ના આદેશ આપ્યા છે. બ્રિટનના કેટલાક મીડિયા અહેવાલોમાં ટેલિગ્રામ ચેનલોને ટાંકીને આ દાવો કરવામાં આવ્યો છે એક તરફ જ્યાં રશિયા-યુક્રેન યુદ્ધને સમાપ્ત કરવા માટે વાતચીત ચાલી રહી છે તો બીજી તરફ આ યુદ્ધમાં પરમાણુ બોમ્બનો ઉપયોગ કરવાનાં જોખમની આશંકા છે.

બ્રિટનના કેટલાક મીડિયા અહેવાલોએ ટેલિગ્રામ ચેનલોને ટાંકીને દાવો કર્યો છે કે રશિયાના રાષ્ટ્રપતિ વ્લાદિમીર પુતિન પરમાણુ યુદ્ધ તરફ આગળ વધવાના સંકેત આપી રહ્યા છે. આ દાવો એટલા માટે કરાયો છે કારણ કે પુતિને તેમની સેનાને 'ન્યુક્લિયર વોર ડ્રિલ' માટે અભ્યાસ કરવાનો આદેશ આપ્યો છે. આટલું જ નહીં તેમણે સુરક્ષા માટે પોતાના પરિવારને સાઈબેરિયા મોકલી દીધો છે. આ 'ન્યુક્લિયર વોર ડ્રિલ'ના અહેવાલોએ ક્રેમલિન (રશિયન રાષ્ટ્રપતિ કાર્યાલય)ના અધિકારીઓને સ્તબ્ધ કરી દીધા છે.

પુતિનના નિર્ણયના પરિણામો કેટલા ભયંકર આવી શકે છે તે અંગે અધિકારીઓ સ્તબ્ધ છે. કેટલાક વિશ્લેષકોનું કહેવું છે કે યુક્રેને યુદ્ધના 25 દિવસ પછી પણ હજુ સુધી શસ્ત્રો નીચે મુક્યા નથી, જેનાથી પુતિન નારાજ છે અને તેમણે તેને પડકાર માની લીધો છે. પુતિન વિચારી રહ્યા છે કે એક નાનકડો દેશ તેમને પડકાર ફેંકી રહ્યો છે. દાવા અનુસાર, ક્રેમલિનના વરિષ્ઠ રાજકીય વ્યક્તિઓને પુતિને પોતે જ માહિતી આપી છે કે તેઓ પરમાણુ યુદ્ધની તૈયારીમાં 'ન્યુક્લિયર વોર ડ્રિલ'માં ભાગ લેશે.

પુતિનના પરિવારના સભ્યો વિશે વધુ જાણકારી નથી, પરંતુ રશિયા-યુક્રેન યુદ્ધ શરૂ થયું ત્યારથી, અહેવાલોમાં દાવો કરવામાં આવ્યો છે કે પુતિને તેના પરિવારના સભ્યોને સાઇબેરિયાના તેહ અલ્તાઇ પર્વતોમાં એક હાઇ-ટેક ભૂગર્ભ બંકરમાં સ્થળાંતર કરી દીધા છે, જે સંપૂર્ણપણે ભૂગર્ભ શહેર છે. જેના પર પરમાણુ હુમલાની પણ અસર નથી થતી.

પુતિન પાસે એક ખતરનાક યોજના તૈયાર છે અને તે કોઈ રહસ્ય નથી. પરમાણુ સંઘર્ષ માટે રશિયા પાસે ડૂમ્સડે પ્લેન છે જેનો ઉપયોગ પુતિન અને તેના નજીકના સાથીઓ દ્વારા પરમાણુ યુદ્ધમાં કરવામાં આવશે. ડૂમ્સડે માટે એક સ્કાય બંકર પણ યોજના હેઠળ હતું, પરંતુ માનવામાં આવે છે કે તે હજી તૈયાર થયું નથી.

કેટલીક પશ્ચિમી ગુપ્તચર એજન્સીઓ વર્તમાન સ્થિતિઓ દ્વારા પુતિનના મગજનું વિશ્લેષણ કરવાનો પ્રયાસ કરી રહી છે, જે મુજબ પુતિન પોતાની એક બંધ દુનિયામાં ફસાઆ ગયા છે, જ્યાં તે એકમાત્ર નિર્ણય લેનાર છે અને તેઓ અન્ય દ્રષ્ટિકોણથી સંપૂર્ણપણે અલગ છે.