શિંદે અને ઉદ્ધવ જૂથ વચ્ચે ઇન્ટરનેટ વોર શરૂ, ઉદ્ધવ જૂથે શિવસેનાની વેબસાઇટ ડીલિટ કરી, ટ્વિટર હેન્ડલ બદલી દીધું

Published By : B.K.NEWS DAINIK
Published Date : 2023-02-21 16:24:15
Views : 463
Modified Date : 2023-02-21 16:24:15

એકનાથ શિંદેની આગેવાની હેઠળના જૂથને રિયલ શિવસેના તરીકે માન્યતા આપવાના ચૂંટણી પંચના નિર્ણયથી ઉદ્ધવ ઠાકરેની છાવણીને મોટો ઝટકો લાગ્યો છે. બંને પક્ષ વચ્ચે હવે ઇન્ટરનેટ વોર શરૂ થઈ ગઈ છે. શિવસેના ડોમેઈન નામ shivsena.in સાથેની વેબસાઈટ કાઢી નાખવામાં આવી છે અને તેનું ટ્વિટર પ્રોફાઈલ નામ બદલીને શિવસેના – ઉદ્ધવ બાળાસાહેબ ઠાકરે કરવામાં આવ્યું છે. ટ્વિટર હેન્ડલ પણ બદલાઈ ગયું હોવાથી એકાઉન્ટ તેનું ‘બ્લુ ટિક’ ગુમાવી દીધું છે જે વેરિફાઈડ એકાઉન્ટ સૂચવે છે.

ઉલ્લેખનીય છે કે, શિવસેનાની વેબસાઈટ એક્સેસ કરી શકાતી નથી, તેમ છતાં શિવસેના યુબીટીના ટ્વિટર પ્રોફાઇલ પેજ પર લિંકનો ઉલ્લેખ છે. શિંદે જૂથ આ સોશિયલ મીડિયા ટેકઓવરને કોર્ટમાં પડકારે છે કે કેમ તે જોવાનું બાકી છે.

દરમિયાન, શિવસેના (UBT) એ આગળની કાનૂની લડાઈની તૈયારી શરૂ કરી દીધી છે, સાંસદ અનિલ દેસાઈની આગેવાની હેઠળની ટીમ શ્રેષ્ઠ ઉપલબ્ધ વિકલ્પો પર કાયદાકીય નિષ્ણાતોની સલાહ લઈ રહી છે. સોમવારે ચૂંટણી પંચના નિર્ણયને પડકારતી અરજી સુપ્રીમ કોર્ટમાં દાખલ કરવામાં આવશે. તાત્કાલિક રાહત તરીકે, શિવસેના (UBT) શિંદે અને અન્ય 15 બળવાખોર ધારાસભ્યોને ગેરલાયક ઠેરવવા અંગેની સુપ્રીમ કોર્ટ સમક્ષની અરજી સાથે જોડીને ચૂંટણી પંચના આદેશ પર સ્ટે મેળવવા માંગે છે.

ચૂંટણી પંચના નિર્ણય સામે ઉદ્ધવ ઠાકરે ગ્રુપે આજે સુપ્રીમ કોર્ટમાં અરજી દાખલ કરી છે અને તાત્કાલિક સુનાવણીની માંગ કરી છે. ઉલ્લેખનિય છે કે ચૂંટણી પંચે શિવસેના નામ અને ચૂંટણી ચિહ્નનો અધિકાર એકનાથ શિંદે ગ્રુપને આપી દીધો છે. જેનાથી મહારાષ્ટ્રના રાજકારણમાં ભારે ધમાસાણ મચ્યું છે. ઉદ્ધવ ઠાકરે ગ્રુપ ભારે ગુસ્સે ભરાયું છે. આ બધાની વચ્ચે ઉદ્ધવ ઠાકરેએ કહ્યું હતું કે અમે લોકોની વચ્ચે જઈને કહીશું કે અમારા નામ અને ચિહ્નની ચોરી થઈ છે.