ઉ. ભારતમાં ગાઢ ધુમ્મસના પગલે વિઝિબીલિટી ઘટી ગઇઃ 4 રાજ્યોમાં ‘કોલ્ડ વેવ’ એલર્ટ

Published By : parth lakhtaria
Published Date : 2022-12-21 17:11:26
Views : 550
Modified Date : 2022-12-21 17:11:26

ઉત્તર ભારતના રાજ્યોમાં ઠંડી અને ધુમ્મસનું પ્રમાણ સતત વધી રહ્યું છે. હવામાન વિભાગે આગામી દિવસોમાં કોલ્ક વેવ એલર્ટ જાહેર કર્યો છે. આ સાથે જ હવામાન વિભાગના જણાવ્યા અનુસાર, આગામી બે દિવસ સુધી દિલ્હી, યુપી, બિહાર, પંજાબમાં ગાઢ ધુમ્મસ માટે ઓરેન્જ એલર્ટ જોહેર કરાયો છે.

રાજધાની દિલ્હી, ઉત્તર પ્રદેશ, બિહાર, પંજાબમાં આજે સવારે ગાઢ ધુમ્મસની ચાદર છવાયેલી જોવા મળી હતી. ત્યારે હવામાન વિભાગે હિમાચલ પ્રદેશ અને પંજાબમાં ગાઢ ધુમ્મસ માટે રેડ એલર્ટ જાહેર કર્યું છે. ઉત્તર ભારતના મોટાભાગના વિસ્તારોમાં તાપમાનમાં ઘટાડો નોંધાઈ રહ્યો છે. દિલ્હી-એનસીઆરમાં ગાઢ ધુમ્મસને કારણે ઘણી જગ્યાએ વિઝિબીલિટી 100 મીટરથી ઓછી છે. જેની અસર એરલાઈન્સ પર પણ પડી રહી છે.

સવારે લગભગ 5.30 વાગ્યે દિલ્હીના પાલમ વિસ્તારમાં વિઝિબીલિટી 25 મીટર સુધી રહી હતી, જ્યારે સફદરજંગ વિસ્તારમાં 50 મીટર સુધી વિઝિબીલિટી નોંધાઈ હતી. આ ઉપરાંત, પંજાબના ભટિંડામાં ગાઢથી ખૂબ ગાઢ ધુમ્મસને કારણે શૂન્ય વિઝિબીલિટી નોંધાઈ હતી. અમૃતસર, પટિયાલા, લખનૌના ઘણા વિસ્તારોમાં 25 મીટર સુધી વિઝિબીલિટી પણ નોંધાઈ હતી.

હવામાન વિભાગના જણાવ્યા અનુસાર, આજે એટલે કે 20 ડિસેમ્બરે દિલ્હીમાં લઘુત્તમ તાપમાન 6 ડિગ્રી અને મહત્તમ તાપમાન 22 ડિગ્રી નોંધાયું હતું. તે જ સમયે, આગામી 3 દિવસ સુધી દિલ્હીમાં ગાઢ ધુમ્મસ જોવા મળશે. આગામી દિવસોમાં દિલ્હીમાં તાપમાનમાં ઘટાડો નોંધાશે. પ્રદૂષણની વાત કરીએ તો દિલ્હીની હવાની ગુણવત્તા ગંભીર શ્રેણીમાં છે. ગઈકાલે સાંજે 6 વાગ્યાની આસપાસ આનંદ વિહાર વિસ્તારમાં AQI 444 નોંધવામાં આવ્યું હતું, જે ગંભીર શ્રેણીમાં આવે છે.

લખનઉમાં આજે લઘુત્તમ તાપમાન 9 ડિગ્રી અને મહત્તમ તાપમાન 22 ડિગ્રી નોંધાયું હતું. લખનઉમાં આજે ગાઢ ધુમ્મસ જોવા મળ્યું હતું. ગાઝિયાબાદમાં પણ આજે લઘુત્તમ તાપમાન 9 ડિગ્રી અને મહત્તમ તાપમાન 24 ડિગ્રી નોંધાયું હતું.

હિમાચલ પ્રદેશના શિમલામાં આજે લઘુત્તમ તાપમાન 8 ડિગ્રી અને મહત્તમ તાપમાન 18 ડિગ્રી નોંધાશે. તે જ સમયે, મનાલીમાં લઘુત્તમ તાપમાન શૂન્ય રહેશે, જ્યારે મહત્તમ તાપમાન 17 ડિગ્રી નોંધવામાં આવશે. સ્પીતિ ખીણમાં લઘુત્તમ તાપમાન -7 ડિગ્રી અને મહત્તમ તાપમાન 10 ડિગ્રી નોંધવામાં આવી શકે છે.
હવામાન વિભાગના જણાવ્યા અનુસાર આગામી 5 દિવસ દરમિયાન હિમાચલ પ્રદેશ, પંજાબ, હરિયાણા અને ઉત્તર રાજસ્થાનમાં કોલ્ડવેવની સ્થિતિ યથાવત રહેવાની શક્યતા છે. આવી સ્થિતિમાં ઠંડી, પ્રદુષણ અને ધુમ્મસના ત્રાસથી સમસ્યાઓ વધી શકે છે.