મહારાષ્ટ્રથી વલસાડ આવી રહેલા મોટા પ્રમાણમાં વિદેશી દારૂ ઝડપાયો

Published By : B.K.NEWS DAINIK
Published Date : 2023-01-10 15:36:37
Views : 426
Modified Date : 2023-01-10 15:36:37

રાજ્યમાં સરકાર દારૂબંધીના દાવા કરી રહી છે. પરંતુ અવારનવાર મોટી માત્રામાં વિદેશી દારૂ મળી આવ્યો છે. ત્યારે વલસાડ એલસીબીએ ભીલાડ પોલીસ સ્ટેશનની હદમાં ફરી એકવાર મોટી માત્રામાં વિદેશી દારૂ ઝડપી પાડ્યો છે. પરંતુ આ વખતે ચોંકાવનારી બાબત એ સામે આવી છે કે, મહારાષ્ટ્રથી મોટી માત્રામાં દારૂ સાથે ઝડપાયેલા બે આરોપીઓએ આ દારૂની હેરાફેરીમાં મહારાષ્ટ્રનો એક પીએસઆઇ સંકળાયેલો હોવાનો ઘટસ્ફોટ થયો છે. ઝડપાયેલા બંને આરોપીઓએ દાવો કર્યો છે કે, આ દારૂ તેમને મહારાષ્ટ્રના તલસારીના પીએસઆઇના ઈશારે ભરી આપવામાં આવ્યો છે.
વલસાડ જિલ્લા એલસીબી પોલીસને મળેલી બાતમીને આધારે ટીમ ભીલાડ નજીક અમદાવાદ-મુંબઈ નેશનલ હાઈવે પર વોચમાં હતી. તે દરમિયાન પોલીસને મળેલી બાતમીવાળી એક સફેદ કલરની કાર હાઇવે પરથી પસાર થતાં કારને રોકી વધુ તપાસ કરતા કારમાંથી વિદેશી દારૂની વિવિધ બ્રાન્ડની અનેક બોટલો મળી આવી હતી. આ કારચાલકને પોલીસ સ્ટેશન લાવી તપાસ કરતા એક્સયુવી કારમાંથી 36 બોક્ષમાંથી 552 બોટલ બિયર અને દારૂનો જથ્થો મળી આવ્યો. આથી પોલીસે કારચાલક આરોપી નલિન રણછોડ વરિયા અને નીરવ દેસાઈની દારૂની હેરાફેરીના ગુનામાં ધરપકડ કરી તેમના વિરૂદ્ધ કાયદેસરની કાર્યવાહી હાથ ધરી છે. ઝડપાયેલા બંને આરોપી વડોદરાના રહેવાસી હોવાનો ખુલાસો થયો છે.
વલસાડ ક્રાઇમ બ્રાન્ચ પોલીસે વિદેશી દારૂ અને કાર સહિતનો કુલ 7.87 લાખનો મુદ્દામાલ કબજે કરી આરોપી ચાલક નલીન રણછોડ વરીયા અને આરોપી ક્લિનર નિરવ ઉર્ફે પિંટુ મધુસુદન દેસાઇની ધરપકડ કરી છે. તેઓ વડોદરાના રહેવાસી છે. આરોપીઓની પૂછપરછમાં તેમણે જણાવ્યું હતું કે, આ દારૂનો જથ્થો તેમને તલાસરી પોલીસ મથકમાં પીએસઆઇ તરીકે ફરજ બજાવતા ધાંગડેએ તેના માણસોથી ભરાવી આપ્યો હતો અને પકડાયેલા બંને આરોપીઓ આ દારૂનો જથ્થો વડોદરા લઈ જતા હતા. પોલીસ તપાસમાં એ પણ સામે આવ્યું છે કે, તલાસરી પોલીસ મથકમાં પીએસઆઇ તરીકે ફરજ બજાવતા પીએસઆઇ ધાંગડે વોટ્સએપ દ્વારા દારૂનો ઓર્ડર લેતો હતો અને ઓર્ડર મુજબ પોતાના માણસોથી દારૂનો જથ્થો ભરાવી આપતો હતો.
વિદેશી દારૂની હેરાફેરી અને ધંધામાં મોટી કમાણીને કારણે રીઢા બુટલેગરોની સાથે સાથે કેટલાક પોલીસ કર્મીઓ પણ દારૂની હેરાફેરી કરતા ઝડપાઈ રહ્યા છે. અગાઉ પણ વલસાડ જિલ્લા પોલીસના હાથે અનેક પોલીસ કર્મીઓ સહિત અન્ય સરકારી કર્મચારીઓ પણ દારૂની હેરાફેરી કરતા ઝડપાઇ ચૂક્યાં છે.