47 વર્ષની ઉંમરે દિગ્ગજ ખેલાડી જેક કાલિસની તોફાની બેટિંગ.

Published By : B.K.NEWS DAINIK
Published Date : 2023-08-20 15:30:47
Views : 122
Modified Date : 2023-08-20 15:30:47

જો ફિટનેસ હોય તો ઉંમરથી કોઈ ફરક પડતો નથી. તે માત્ર એક નંબર છે. આ વાત 9 વર્ષ પહેલા આંતરરાષ્ટ્રીય ક્રિકેટમાંથી નિવૃત્તિ લેનાર જેક કાલિસે સાબિત કરી છે. તેણે અમેરિકામાં રમાઈ રહેલી T10 લીગ માં ધમાકો કર્યો છે, જ્યાં તેણે 200થી વધુની સ્ટ્રાઈક રેટથી રન બનાવ્યા છે. આ ઇનિંગ દરમિયાન કાલિસે ભારતીય બેટ્સમેન મિલિંદ કુમાર સાથે મોટી સદીની ભાગીદારી પણ કરી હતી. વિરોધી ટીમનો કોઈ બોલર આ બંને બેટ્સમેનોને આઉટ કરી શક્યો નહોતો. અમેરિકન T10 લીગમાં આ મેચ કેલિફોર્નિયા નાઈટ્સ અને ટેક્સાસ ચાર્જર્સ વચ્ચે હતી. આ મેચમાં સુરેશ રૈનાની કેપ્ટનશીપવાળી કેલિફોર્નિયા નાઈટ્સે પ્રથમ બેટિંગ કરી હતી. જ્યારે બેન ડંકની ટીમ ટેક્સાસ ચાર્જર્સે લક્ષ્યને ચેસ કર્યો હતો. એરોન ફિન્ચ અને જેક કાલિસે કેલિફોર્નિયા નાઈટ્સ માટે ઓપનિંગ કર્યું. પરંતુ તેમની શરૂઆત ખરાબ રહી અને ફિન્ચ ઈનિંગના બીજા બોલ પર ટીમના સ્કોર બોર્ડમાં કોઈ રન ઉમેર્યા વિના આઉટ થયો હતો.ફિન્ચની વિકેટે ટેક્સાસ ચાર્જર્સનો જુસ્સો વધાર્યો, પરંતુ આ પછી બેટિંગ કરવા ઉતરેલા 32 વર્ષીય મિલિંદ કુમારે પહેલા બોલથી જ પોતાનો ઇરાદો સ્પષ્ટ કરી દીધો. તે ટેક્સાસના બોલરો પર તૂટી પડ્યો હતો. મિલિંદને આક્રમક શોટ રમતા જોઈને કાલિસે પણ ફટકાબાજી શરૂ કરી હતી.એક છેડેથી મિલિંદ અને બીજા છેડેથી કાલિસ બંનેએ ફટકાબાજી શરૂ કરી. પરિણામ એ આવ્યું કે રન પાણીની જેમ વહેવા લાગ્યા. બંનેએ મળીને કેલિફોર્નિયા નાઈટ્સ માટે 10 ઓવરમાં 158 રન ઉમેર્યા. જેમાં મિલિંદ કુમાર 271.43ના સ્ટ્રાઈક રેટથી 28 બોલમાં 76 રન બનાવ્યા બાદ અણનમ રહ્યો, જેમાં 6 સિક્સ અને 7 ફોરનો સમાવેશ થાય છે. જ્યારે જેક કાલિસે 31 બોલમાં 8 ચોગ્ગા અને 3 છગ્ગાની મદદથી અણનમ 64 રન બનાવ્યા હતા. તેનો સ્ટ્રાઈક રેટ પણ 206.45 રહ્યો હતો.કાલિસ અને મિલિંદની મદદથી ટેક્સાસ ચાર્જર્સને 159 રનનો ટાર્ગેટ મળ્યો હતો. પરંતુ ટીમ 10 ઓવરમાં માત્ર 110 રન જ બનાવી શકી અને 48 રનથી મેચ હારી ગઈ. ટૂર્નામેન્ટમાં સુરેશ રૈનાની ટીમની આ પ્રથમ જીત હતી.