પ્રધાનમંત્રીએ કહ્યું- નિયત અને નીતિથી ખેડૂતોનું હિત ઈચ્છીએ છીએ, તેમને સપોર્ટ મળશે તો દેશ મજબૂત બનશે.

Published By : B.K.NEWS DAINIK
Published Date : 2020-12-12 13:03:26
Views : 415
Modified Date : 2020-12-12 13:03:26

વડાપ્રધાન નરેન્દ્ર મોદી ફેડરેશન ઓફ ઇન્ડિયન કોમર્સ એન્ડ ઇન્ડસ્ટ્રી (FICCI)ની 93મી વાર્ષિક સભા (AGM)ને વિડિયો-કોન્ફરન્સ દ્વારા સંબોધન કર્યું હતું. મોદીએ કહ્યું હતું કે કૃષિક્ષેત્રમાં થયેલા સુધારાનો સૌથી વધુ લાભ ખેડૂતોને થશે. કૃષિ અને એની સાથે જોડાયેલાં ક્ષેત્રો, જેમ કે ફૂડ પ્રોસેસિંગ, કોલ્ડ ચેઈન સહિતનાં ક્ષેત્ર વચ્ચે દીવાલો હતી. હવે એ અંતરાયો દૂર થઈ રહ્યા છે. હવે ખેડૂતોને નવાં બજારો અને નવા વિકલ્પો મળશે. ખેતીમાં વધુ રોકાણ થશે. દુનિયા ઘણા ઉતાર-ચઢાવમાંથી પસાર થઇ છે. થોડાંક વર્ષો પછી જ્યારે આપણે કોરોનાના સમયગાળાને યાદ કરીશું ત્યારે માનવામાં નહિ આવે. સૌથી સારી બાબત એ છે કે પરિસ્થિતિ જેટલી ઝડપથી બગડી છે એટલી જ ઝડપથી સુધારાઓ પણ કરવામાં આવ્યા છે.આજે ભારતનું કૃષિક્ષેત્ર પહેલાં કરતાં વધુ ગતિશીલ છે. આજે ખેડૂતો પાસે પણ મંડીઓની બહાર વેચવાનો વિકલ્પ છે. તેઓ ડિજિટલ માધ્યમ પર પણ ખરીદી અને વેચાણ કરી શકે છે. ખેડૂત સમૃદ્ધ થાય તો દેશનો વિકાસ થાય.

જેટલું ખાનગી ક્ષેત્રે, આપણા દેશમાં કૃષિક્ષેત્રે રોકાણ કરવું હતું એટલું થયું નથી. આપણે અહીં કોલ્ડસ્ટોરેજની સમસ્યા છે. ખાતરની સમસ્યા છે, એ આયાત કરવામાં આવે છે. આ માટે સાહસિકોએ આગળ આવવું જોઈએ. ખેડૂતોને જેટલો વધુ ટેકો મળશે અને જેટલું આપણે વધુ રોકાણ કરીશું તેટલો ખેડૂત અને દેશ વધુ મજબૂત બનશે.આજે દરેક ક્ષેત્રે સુધારા કરવામાં આવ્યા છે. એ માઈનિંગ, ડિફેન્સ કે પછી સ્પેસ હોય, મોટા ભાગનાં ક્ષેત્રોમાં અસંખ્ય તકોની પરંપરા ઊભી થઈ છે. લોજિસ્ટિક્સમાં બહુવિધ જોડાણ પર ભાર મૂકવામાં આવી રહ્યો છે. જો તમે એક ઉદ્યોગ અને બીજા ઉદ્યોગ વચ્ચે દીવાલો બનાવશો તો વૃદ્ધિ અટકશે. અમે આ દીવાલોને દૂર કરવા માટે કામ કરી રહ્યા છીએ.

ભારતમાં તમામ અવરોધોને દૂર કરીને આધાર સિસ્ટમ મજબૂત કરવામાં આવી. ડાયરેક્ટ બેનિફિટ ટ્રાન્સફર, વિશ્વની સૌથી મોટી ટ્રાન્સફર સિસ્ટમ ભારતમાં કાર્યરત છે. ઘણા લોકો કહી રહ્યા છે કે ઘણા દેશોએ ભારતના આ મોડેલમાંથી શીખવું જોઈએ. ભારતે મોટી વસતિમાં ટેકનોલોજી લાવી છે.UPI મારફત દર મહિને 4 લાખ કરોડનું ટ્રાન્ઝેક્શન કરવામાં આવે છે. નાના દુકાનદારો અને શેરી વિક્રેતાઓ પણ એમાંથી પૈસા ટ્રાન્સફર કરી રહ્યા છે. કેટલાક લોકો માટે ગામોનો અર્થ એવા વિસ્તારો છે જ્યાં આવવા-જવામાં અસુવિધા છે. હવે અહીંની સ્થિતિ પણ બદલાઈ ગઈ છે. ગામના 98% રસ્તાઓ પ્રધાનમંત્રી સડક યોજના સાથે જોડાયેલા છે. ગામમાં શાળાઓ અને બજારો છે. ગ્રામજનોની અપેક્ષાઓ વધી છે.વડાપ્રધાને વધુમાં કહ્યું હતું, જ્યારે રોગચાળો શરૂ થયો ત્યારે ઘણી અનિશ્ચિતતાઓ હતી. દરેકના મનમાં આ સવાલ હતો કે બધું બરાબર કેવી રીતે થશે. વિશ્વની દરેક વ્યક્તિ આ પ્રશ્નોમાં સામેલ હતી. હવે પરિસ્થિતિ બદલાઈ ગઈ છે. હવે જવાબ પણ છે અને રોડમેપ પણ છે. અત્યારે જે ઇન્ડિકેટર્સ મળી રહ્યાં છે એ પ્રોત્સાહક છે. કટોકટીના સમયમાં આપણે જે શીખ્યા એનાથી ભવિષ્યના સંદર્ભોને મજબૂતી મળી છે, જેનું શ્રેય ઉદ્યોગ-સાહસિકો, ખેડૂતો, ઉદ્યમીઓ અને લોકોને જાય છે. જે દેશમાં રોગચાળાના સમયમાં તેના લોકોનો બચાવ થાય છે, એની સિસ્ટમોમાં બમણી તાકાત સાથે રિબાઉન્ડ કરવાની શક્તિ આવે છે.

તેમણે જણાવ્યું હતું કે ભારત સરકારે જે નીતિઓ મૂકી છે અને પરિસ્થિતિને સંભાળી છે એનાથી વિશ્વ આશ્ચર્યચકિત થઈ ગયું છે. છેલ્લાં 6 વર્ષમાં વિશ્વનો વિશ્વાસ જે આપણા પર બંધાયો હતો એ છેલ્લા મહિનાઓમાં વધુ મજબૂત બન્યું છે. વિદેશી રોકાણકારોએ રેકોર્ડ રોકાણ કર્યું છે. અમે સ્થાનિક લોકો માટે અવાજ ઉઠાવવાનું કામ કરી રહ્યા છીએ. ભારતનું ખાનગી ક્ષેત્ર ફક્ત આપણી ઘરેલું જરૂરિયાતો જ પૂરી કરી શકતું નથી, પરંતુ વૈશ્વિક સ્તરે પણ સ્થાપિત થઈ શકે છે. અમે ઇચ્છીએ છીએ કે ઉદ્યોગો વધુ ઈન્ડિપેન્ડન્ટ બને.જે અસલામતી અનુભવતા હોય છે તેઓ આસપાસના લોકોને તકો આપવાથી ડરતા હોય છે. ભારે જનસમર્થનથી બનેલી સરકારમાં આત્મવિશ્વાસ અને સમર્પણ ઘણાં હોય છે. અમે સૌનો સાથ સૌનો વિકાસ પર કામ કરી રહ્યા છીએ. નિર્ણાયક સરકાર અન્યની અડચણોને દૂર કરે છે. આ સરકાર તેને પોતાની પાસે રાખવા માટે માનતી નથી. પહેલાંની સરકાર દરેક વસ્તુ પોતાની પાસે રાખતી હતી. પહેલાંની સરકારો ઘડિયાળ જ નહીં, પણ ટેલિવિઝન, બ્રેડ પણ બનાવતી હતી. સશક્ત સરકાર દરેક ભાગીદારને પ્રોત્સાહિત કરે છે. છેલ્લાં અમુક વર્ષમાં ભારતે આવી જ સરકાર જોઈ છે, જે 130 કરોડ લોકોનાં સપનાને સમર્પિત છે. આજે દરેક હોદ્દેદારની ભાગીદારી વધારવા માટે કામ કરવામાં આવી રહ્યું છે.