રીલ્સના ચક્કરમાં મારા છોકરાને મારી નાંખ્યો..., રડતી આંખો સાથે માએ માંગ્યો ન્યાય

Published By : B.K.NEWS DAINIK
Published Date : 2026-02-17 14:32:42
Views : 69
Modified Date : 2026-02-17 14:32:42

દિલ્હીના દ્વારકા વિસ્તારમાં ગત 3 ફેબ્રુઆરીના રોજ એક અકસ્માત સર્જાયો હતો, જેમાં 23 વર્ષીય યુવક સાહિલ ધનેશ્રાનું મોત નીપજ્યું છે. આ ઘટના દ્વારકા સાઉથ પોલીસ સ્ટેશન હેઠળના લાલ બહાદુર શાસ્ત્રી કોલેજ પાસે બની હતી. એક પૂરપાટ ઝડપે આવી રહેલી સ્કોર્પિયો કારે સાહિલની બાઇકને એટલી જોરદાર ટક્કર મારી હતી કે કાર બેકાબૂ બનીને રસ્તાની બાજુમાં ઉભેલી એક ટેક્સી સાથે પણ અથડાઈ હતી.

આ અકસ્માતમાં સાહિલનું ઘટનાસ્થળે જ મૃત્યુ થયું હતું, જ્યારે ટેક્સી ચાલક ગંભીર રીતે ઘાયલ થયો હતો. પોલીસ તપાસમાં બહાર આવ્યું છે કે સ્કોર્પિયો ચાલક માત્ર 17 વર્ષનો સગીર હતો અને તેની પાસે ડ્રાઇવિંગ લાયસન્સ પણ નહોતું. આરોપીની ધરપકડ કરવામાં આવી હતી, પરંતુ બોર્ડની પરીક્ષા આપવા માટે તેને વચગાળાના જામીન મળી ગયા છે.

આ અકસ્માત બાદ સાહિલની માતા ઇન્ના માકને સોશિયલ મીડિયાના માધ્યમથી ન્યાયની માંગ કરી છે અને ચોંકાવનારા ખુલાસા કર્યા છે. સાહિલની માતાના જણાવ્યા અનુસાર, આ માત્ર અકસ્માત નથી પણ એક ગુનાહિત પ્રવૃત્તિ છે. તેમણે આક્ષેપ કર્યો છે કે સ્કોર્પિયો ચાલક પોતાની બહેન સાથે મળીને રસ્તા પર રીલ બનાવી રહ્યો હતો અને સ્ટંટ કરી રહ્યો હતો.

આ કાર રોંગ સાઈડમાં પૂરપાટ ઝડપે દોડી રહી હતી અને બસની સામે સ્ટંટ કરવાના ચક્કરમાં સાહિલની બાઇકને ઉડાવી દીધી હતી. માતાએ દુઃખ સાથે જણાવ્યું કે, 'મેં મારા દીકરાને 23 વર્ષ સુધી સિંગલ મધર તરીકે એકલા હાથે ઉછેર્યો હતો અને આ લોકોએ મનોરંજન માટે રીલ બનાવવાના ચક્કરમાં મારા દીકરાનો જીવ લીધો.'