શેર, ક્રૂડ, સોનાની જેમ પાણીમાં પણ ટ્રેડિંગ!

Published By :
Published Date : 2022-09-23 17:52:24
Views : 232
Modified Date : 2022-09-23 17:52:24

કોઈપણ વાયદામાં કોઈ ટ્રેડર ભવિષ્યમાં ભાવ વધશે એવી ધારણા એ ખરીદી કરે છે જ્યારે સામે કોઈ વ્યક્તિ ભાવ ઘટશે કે પોતે નફો મેળવી રહ્યા છે એવી ધારણાએ વેચાણ કરશે. ફ્યુચરમાં મુદ્દત નક્કી હોય છે, ડિલિવરી ક્યાં મળશે એ નક્કી હોય છે અને કેટલાક વાયદામાં ડિલિવરી હોતી જ નથી. માત્ર નફો કે નુકસાનની ભરપાઈ કરી રોકડમાં પતાવટ કરવામાં આવે છે.ભારત સરકારના નીતિ આયોગ દ્વારા પાણીમાં આ પ્રકારના ટ્રેડિંગ માટે એક ચર્ચા પત્ર ઉપર કામગીરી ચાલી રહી છે. આ પત્ર ઉપર લોકોના પ્રતિભાવના આધારે ભવિષ્યમાં સરકાર પાણીમાં ટ્રેડિંગ કરવા માટે ખાસ એક્સચેન્જ શરૂ કરે અથવા તો વર્તમાન એક્સચેન્જમાં જ પરવાનગી આપે તેવી શક્યતા છે. હાલ અમેરિકામાં શિકાગોમાં પાણીના વાયદા ચાલે છે. ઓસ્ટ્રેલિયામાં પણ આ રીતે પાણીમાં ટ્રેડિંગ થાય છે. ભારતમાં કૃષિ, ઉદ્યોગો અને ઘર વપરાશ માટે પાણીનો ઉપયોગ થાય છે. પણ પાણીના બગાડ, ગંદા પાણીના નિકાલ માટેની નબળી નીતિ અને અન્ય સમસ્યાના કારણે પાણીની અછત રહે છે. પાણી માટે બજાર ઉભી કરવામાં આવે અને જેને જરૂર છે તે તેની કિંમત ચૂકવવા તૈયાર થાય તો પાણીના સંગ્રહ, ગંદા પાણીને રીસાયકલ કરી તેનો ફરી ઉપયોગ કરવો જેવા ક્ષેત્રે રોકાણકારો પણ આવી શકે છે.