અનુરાગ કશ્યપ વિરુદ્ધ કાર્યવાહી ના થતાં નારાજ પાયલ ઘોષે કહ્યું, 'શું પ્રોસેસને આગળ વધારવા માટે મારે મરવું પડશે?'

Published By : B.K.NEWS DAINIK
Published Date : 2020-12-21 15:52:45
Views : 383
Modified Date : 2020-12-21 15:52:45

અનુરાગ કશ્યપ પર રેપનો આક્ષેપ મૂકનારી એક્ટ્રેસ પાયલ ઘોષે તપાસમાં મોડું થતું નારાજગી વ્યક્ત કરી છે. સોમવાર, 21 ડિસેમ્બરના રોજ તેણે સોશિયલ મીડિયામાં પોસ્ટ શૅર કરીને કહ્યું હતું, 'ચાર મહિના થઈ ગયા અને પુરાવા આપ્યા હોવા છતાંય અનુરાગ કશ્યપ વિરુદ્ધ હજી સુધી કોઈ કાર્યવાહી થઈ નથી. શું પ્રોસેસને આગળ વધારવા માટે મારે મરવું પડશે.'પાયલ અન્ય એક પોસ્ટમાં મુંબઈ પોલીસ પર યોગ્ય રીતે કામ ના કરવાનો આક્ષેપ મૂક્યો હતો. તેણે કહ્યું હતું, 'આટલો સમય થઈ ગયો અને મુંબઈ પોલીસે પોતાનું કામ યોગ્ય રીતે કર્યું નથી. આ મહિલાઓની બાબત છે અને આપણે જાગૃત થવાની જરૂર છે કે આપણે શું ઉદાહરણ આપી રહ્યાં છીએ.'

પાયલ ઘોષે વડાપ્રધાન નરેન્દ્ર મોદી તથા ગૃહમંત્રી અમિત શાહ પાસે ન્યાયની અપીલ કરી હતી. ગયા મહિને તેણે PM તથા ગૃહમંત્રીની સાથે નેશનલ વુમન કમિશનના પ્રમુખ રેખા શર્માને ટૅગ કરીને સોશિયલ મીડિયા પોસ્ટ લખી હતી, જેમાં કહ્યું હતું, 'મારા મિત્ર તથા મેનેજરે અનુરાગ કશ્યપને રેફરન્સ તરીકે મારી ફિલ્મ (ઉસરાવેલ્લી) જોવાનું કહ્યું હતું, કારણ કે અમે એક પ્રોજેક્ટ પર ચર્ચા કરવા માટે મળવાના હતા. મિસ્ટર કશ્યપે કોઈ પણ જાતની સચ્ચાઈ જાણ્યા વગર મારા તથા મારા કો-સ્ટાર (જુનિયર NTR)ના સંબંધો ખરાબ કર્યાં હતાં. હજી પણ ન્યાયની રાહ જોઉં છું.'પાયલે પોતાની અન્ય એક ડિલિટેડ પોસ્ટમાં દાવો કર્યો હતો કે અનુરાગ કશ્યપે તેના તથા જુનિયર NTR વચ્ચે શારીરિક સંબંધ હોવાનું હિંટ આપ્યું હતું. આ જ પોસ્ટમાં તેણે એવો પણ દાવો કર્યો હતો કે અનુરાગે તેને કહ્યું હતું કે તેની સાથે કામ કરી ચૂકેલી એક્ટ્રેસ એક કોલ પર તેની સાથે કંઈ પણ કરવા માટે તૈયાર રહે છે.

પાયલે 22 સપ્ટેમ્બરના રોજ મુંબઈના વર્સોવા પોલીસ સ્ટેશનમાં અનુરાગ કશ્યપ વિરુદ્ધ રેપનો કેસ કર્યો હતો. એક્ટ્રેસનો આક્ષેપ છે કે કશ્યપે 2013માં વર્સોવામાં યારી રોડના લોકેશન પર તેનો રેપ કર્યો હતો. અનુરાગ વિરુદ્ધ દુષ્કર્મ, ખોટો વ્યવહાર, મહિલાનું અપમાન કરવાની કલમ હેઠળ કેસ કરવામાં આવ્યો છે. જોકે, પોલીસ પૂછપરછમાં અનુરાગે આ આક્ષેપોને ખોટા ગણાવ્યા છે.