વિપક્ષના હોબાળાને કારણે લોકસભા સ્થગિત, શૂન્યકાળ નહીં

Published By : B.K.NEWS DAINIK
Published Date : 2022-12-22 13:09:44
Views : 196
Modified Date : 2022-12-22 13:09:44

નવી દિલ્હી:

ચીન મુદ્દે વિપક્ષના હોબાળાને કારણે લોકસભામાં ગુરૂવારે પ્રશ્નોત્તરી કાળ અને શૂન્યકાળ દરમિયાન કામ ન થઈ શક્યું અને સદનને ફરીથી બપોરે 2 વાગ્યા સુધી સ્થગિત કરી દેવામાં આવ્યું.
બપોરે 12 વાગ્યે શૂન્યકાળ શરૂ થતાં જ પ્રિસાઇડિંગ ઓફિસર રાજેન્દ્ર અગ્રવાલે જરૂરી દસ્તાવેજો ગૃહના ટેબલ પર મૂક્યા હતા. આ સાથે વિપક્ષી સભ્યો પોત-પોતાની જગ્યાએ ઉભા રહી ગયા અને બૂમો પાડવા લાગ્યા, સદનમાં ચીન મુદ્દા પર ચર્ચા અને પ્રધાનમંત્રી નરેન્દ્ર મોદી તરફથી જવાબ આપવાની માંગ કરી. તેઓ સૂત્રોચ્ચાર કરતા રહ્યા.
શ્રી અગ્રવાલે જરૂરી દસ્તાવેજો ગૃહના મેજ પર મૂક્યા બાદ શૂન્યકાળ શરૂ કરવાની જાહેરાત કરી ત્યારે વિરોધ પક્ષના સભ્યોએ હોબાળો મચાવ્યો હતો. પ્રિસાઇડિંગ ઓફિસરે વારંવાર વિપક્ષી સભ્યોને પોતાની બેઠકો પર બેસી સભ્યોને શૂન્યકાળમાં બોલવાની તક આપવા તાકીદ કરી હતી, પરંતુ વિપક્ષના સભ્યો ઘોંઘાટ કરતા રહ્યા હતા.
આના પર સંસદીય કાર્યમંત્રી પ્રહલાદ જોશીએ કહ્યુ કે રક્ષા મંત્રી રાજનાથ સિંહે ચીનના મુદ્દા પર નિવેદન આપ્યુ છે, સેના તરફથી એક નિવેદન પણ જાહેર કરવામાં આવ્યુ છે. તે ખૂબ જ સંવેદનશીલ બાબત છે. આ અંગે ગૃહમાં ચર્ચા કરવી યોગ્ય નથી. ભૂતકાળમાં એવા કિસ્સાઓ બન્યા છે કે વિપક્ષે સરકારની અપીલને સ્વીકારી લીધી છે અને સંવેદનશીલ મુદ્દાઓ પર ગૃહમાં ચર્ચાની માંગ કરવાથી પીછેહઠ કરી છે.
શ્રી જોશીએ જણાવ્યું હતું કે, ગૃહે હજુ ઘણાં મહત્ત્વનાં કાર્યો પૂર્ણ કર્યા નથી, વિપક્ષે સહકાર આપવો જોઈએ અને ગૃહને સુવ્યવસ્થિત રીતે ચાલવા દેવું જોઈએ.
વિપક્ષી સભ્યોએ જોશીની અપીલને અવગણી હતી અને હંગામો ચાલુ રાખ્યો હતો અને હંગામો વધુ તીવ્ર બનાવ્યો હતો.
જેને પગલે પ્રિસાઇડિંગ ઓફિસર અગ્રવાલે ગૃહને બપોરે 2 વાગ્યા સુધી સ્થગિત કરી દીધું હતું.
અગાઉ આ જ મુદ્દે હોબાળો થતાં પ્રશ્નોત્તરીકાળ યોજી શકાયો ન હતો. ચીન મુદ્દે વિપક્ષી સભ્યોના હોબાળાને કારણે સ્પીકર ઓમ બિરલાએ ગૃહને બપોરે 12 વાગ્યા સુધી સ્થગિત કરી દીધું હતું.