કંજુસ માણસનો ભરોસો ના કરાય

Published By : B.K.NEWS DAINIK
Published Date : 2019-05-04 12:50:59
Views : 1037
Modified Date : 2019-05-04 12:50:59

રંગપુર ગામના ચાર યુવાનો પૈસા કમાવા પરદેશ ગયા. ચારેય સ્વભાવે કંજુસ હતા. ગામમાં ચારેયના ઘર એક જ વંડા(કમ્પાઉન્ડ)માં હતા. પરદેશમાં ખુબ કમાણી કરતા રહ્યા અને ખાસ્સી બચત પણ કરતા રહ્યા. ખુબ પૈસા ભેગા કર્યા પછી એ લોકો પોતાના ગામ રંગપુર પાછા ફર્યા. એકબીજા સાથે ફોન પર વહેવાર ચાલુ હતો એટલે નક્કી કરીને એક જ દિવસ ગામમાં આવ્યા. ગામના પાદરે એટલે કે પ્રવેશદ્વારે ચારેય ભેગા મળ્યા. એકબીજાને ભેટીને ખબર-અંતર પૂછયા.ચારેયએ વાત કરી, અલ્યા આપણે કમાણી કરીને આવ્યા છીએ તો સોનું લાવ્યા કે નહીં? ગામલોકોને ખબર પાડવી પડશે કે આપણે સોનું વસાવ્યું છે. ચારેય એકબીજા સાથે વાત કરી. એક કહે, મેં સોનાની ફ્રેમના ચશ્મા બનાવડાવ્યા છે. બીજો કહે, આ જો મેં તો સોનાની વીંટી બનાવડાવી છે. ત્રીજો કહે, મેં પણ સોનાની થાળી લીધી છે. ચોથો યુવાન વધારે કંજુસ હતો એ કહે મારો તો એક દાંત સોનાનો કરાવ્યો છે. એટલે પછી વધારે સોનું નથી લીધું. ખોટો ખર્ચ કોણ કરે!ચારેય યુવાનોએ એકબીજાને સવાલ કર્યો, અલ્યાઓ! આપણે સોનું કમાઈ લાવ્યા છીએ તો ગામલોકોને ખબર પાડી દઈએ. આપણને બધા કંજૂસ કંજૂસ કહીને ચીઢવતા હતા, એમને બતાવી દઈએ કે આપણેય સોનું ખરીદી શકીએ છીએ.ચારેય યુવાનોએ આ વાતે હા પાડી. સાથે જ સવાલ થયો, ગામ લોકોને આ બધું બતાવીશુ ક્યારે? બધાને એકસાથે જ બતાવી દઈએ. નહિતર બધા જોઈ લે ત્યાં સુધી આ વસ્તુઓ વાપરવી પડશે અને સોનું ઘસાઈ ઘસાઈને ઓછું થઈ જશે. તો એક કામ કરીએ, ગામમાં ગયા પછી આખા ગામને આપણે ત્યાં બોલાવીએ. એક યુવાન કહે, પણ બધાને બોલાવીશું તો જમાડવા પડશે. અને એમાં ખર્ચો કેટલો બધો થઈ જશે!આખરે ચારેય જણે એક આઈડિયા કર્યો. ચારેયે એકબીજાને તાલી આપી! આ જ કિમીયો સરસ છે, સાપ પણ મરે અને લાઠીય ન ભાંગે!ગામમાં આવ્યા પછી બીજા દિવસે ચારેય યુવાનો ગામમાં ફરી વળ્યા. અમે પરદેશ ખેડી આવ્યા છીએ. આજે સાંજે અમારે ત્યાં તમારું નોંતરું છે.આ સાંભળીને ગામલોકો ખુશ થયા. હાશ! ચાલો, પરદેશ જઈ આવ્યા પછી આ કંજૂસો સુધરી ગયા!સાંજે આખું ગામ ચારેય યુવાનોના ઘર પાસે ભેગું થયું. ચશ્માવાળો યુવાન ઝાંપે ઊભો રહી ચશ્મા ઉતારીને એક એકને કહેતો, આવો આવો ભાઈ!બીજો યુવાન એનાથી થોડે દૂર ઊભો રહીને બધાને આંગળી ચીંધીને કહે, ત્યાં ઓટલે બેસો ભાઈસાહેબ! એ આંગળી ચીંધે એટલે બધાને વીંટી દેખાય.ત્રીજાએ ઓટલા પર વચ્ચોવચ સોનાની થાળી મૂકી હતી અને કહેતો હતો, સોનાની થાળીમાં જમવાથી કોઈ રોગ ન થાય હોં!ચોથો એની બાજુમાં જ ઊભો હતો. એ બધાને પોતાનો સોનાનો દાંત બતાવીને કહેતો હતો. મે સોનાનો દાંત એટલે જ બનાવી લીધો છે. સોનાના દાંતથી ચાવીએ તો કોઈ રોગ ન થાય!બધાને ચારેય યુવાનોની પત્નીઓએ પાણી પીવડાવ્યું. બધા બેઠા એટલે ચારેય યુવાનોએ કહ્યું, અમે પરદેશ કમાઈને આવ્યા અને સોનું પણ વસાવી લાવ્યા છીએ. એ જોવા આપ સહુ પધાર્યા એ બદલ અમે આપ સહુના ખુબ જ આભારી છીએ. કોઈક દિવસ સમય કાઢીને અમારા ઘેર જમવા પણ પધારજો એવી વિનંતિ!ગામલોકો કહે, એલા! આજે બધા ભેગા થયા છે તો આજે જ જમાડી દો!ચારેય યુવાનો કહે, અરે હા! એ વાત તો ધ્યાનમાં જ ન આવી! હવે તો રાંધતાં વાર લાગે અને તમે બધા ભૂખ્યા બેસી રહો એ સારું ન લાગે! માટે ફરી ક્યારેક પધારજો! નમસ્તે!!ગામ લોકો બધા ખીજાયા. આ ચારેય નંગ પરદેશ ખેડી આવ્યા તો પણ રહ્યા કંજૂસ ના કંજૂસ!!! નકામું આખા ગામને દુઃખી કર્યું. હવે આમની વાતનો ભરોસો ન કરાય! ચાલો ભાઈઓ, પોતપોતાના ઘેર.