IPL FINAL : મોદી સ્ટેડિયમમાં 1.32 લાખ દર્શકો વચ્ચે ગુજરાત ટાઇટન્સ-રાજસ્થાન રોયલ્સની ટક્કર, સાંજે 6.30થી ક્લોઝિંગ સેરેમની શરૂ થશે

Published By : B.K.NEWS DAINIK
Published Date : 2022-05-29 11:11:34
Views : 305
Modified Date : 2022-05-29 11:11:34

અમદાવાદના નરેન્દ્ર મોદી સ્ટેડિયમ ખાતે આજે ગુજરાત ટાઈટન્સ અને રાજસ્થાન રોયલ્સની ટીમ વચ્ચે IPLની ફાઈનલ મેચ રમાવાની છે. પહેલીવાર જ IPL રમી રહેલી ગુજરાતની ટીમ ફાઈનલમાં પહોંચી હોવાથી લોકોમાં મેચને લઈને ખૂબ જ ઉત્સાહ જોવા મળી રહ્યો છે. આજની મેચમાં 1.32 લાખ ક્રિકેટ ફેન્સ વચ્ચે ફાઈનલ મેચની શરૂઆત પહેલાં સાંજે 6.30 વાગ્યાથી IPL 2022 ક્લોઝિંગ સેરેમની યોજાશે. એમા રંગારંગ કાર્યક્રમમાં જાણીતા સિંગર્સ તથા બોલિવૂડના દિગ્ગજ અભિનેતા રણવીર સિંહ અને સંગીતકાર એઆર રહેમાનના સ્પેશિયલ શોનું પણ આયોજન કરાયું છે. 1 કલાક સુધી ચાલનારા આ શો બાદ 7.30 વાગ્યે બંને ટીમ વચ્ચે ટોસ ઊછળશે.

31 પાર્કિંગ પ્લોટમાં 27000થી વધુ વાહનની જગ્યા
મોદી સ્ટેડિયમ ખાતે આઇપીએલની ફાઈનલ મેચ યોજાવાની હોવાને પગલે જે પણ લોકો મેચ જોવા માટે સ્ટેડિયમમાં આવવાના છે તેમના માટે 31 પ્લોટમાં પાર્કિંગની વ્યવસ્થા કરવામાં આવી છે. દર્શકોએ નિયત કરેલા પાર્કિંગ સ્થળ પર પોતાના વાહન પાર્ક કરવાના રહેશે. કુલ 31 જેટલા પાર્કિંગ પ્લોટ નક્કી કરવામાં આવ્યા છે. ટૂ-વ્હીલર માટે 8 પાર્કિગ પ્લોટ, ફોર-વ્હીલર માટે 23 પાર્કિંગ પ્લોટ બનાવવામાં આવ્યા છે, જેમાં 12000 ટૂ-વ્હીલર અને 15000 ફોર વ્હીલર પાર્ક કરી શકાશે. મેચ જોવા આવનારી દરેક વ્યક્તિએ ફરજિયાતપણે પોતાનું વાહન Show my park એપ પર એડવાન્સમાં બુકિંગ કરાવીને આવવાનું રહેશે.

ફાઈનલ મેચ માટે BRTSની સુવિધા
રવિવારના રોજ સ્ટેડિયમ સુધી પહોંચવા BRTSની 71 બસ મૂકવામાં આવી છે, જેમાં નારોલથી ઝુંડાલ સર્કલ માટે 26 બસ, નારોલથી વિસત સર્કલ માટે 6 બસ એલડી કોલેજથી ઝુંડાલ સર્કલ સુધી 24 બસ, ઈસ્કોનથી વિસત સર્કલ સુધી 7 બસ અને નેહરુનગરથી વિસત સર્કલ સુધી 8 બસ મૂકવામાં આવી છે. મેચ પૂરી થયા બાદ પાછા જવા સ્ટેડિયમથી વિવિધ રૂટ માટે 48 બસ મૂકવામાં આવી છે. ઉપરાંત મેચ પૂર્ણ થયા બાદ ભીડની સંભાવનાને પગલે સાબરમતી પોલીસ સ્ટેશન ખાતેથી અલગ ટિકિટ કાઉન્ટરની પણ વ્યવસ્થા કરવામાં આવી છે.

ATMS દ્વારા 116 બસ દોડાવાશે
અમદાવાદમાં IPLની ફાઈનલ મેચને પગલે આજે ATMS દ્વારા હયાત 10 રૂટ પર બપોરના 3 વાગ્યાથી 54 બસ દોડાવાશે તથા વધુ 4 સ્પેશિયલ રૂટ પર 12 બસ દોડાવાશે. આવી જ રીતે રાત્રે પાછા જવા માટે રાત્રે 11 વાગ્યાથી 1.30 વાગ્યા સુધીમાં 5 નાઈટ રૂટ પર 50 બસ દોડાવવામાં આવશે. આમ, કુલ 19 રૂટ પર 116 બસ દોડાવવામાં આવશે.

જનપથ ટીથી સ્ટેડિયમ સુધીનો રોડ બંધ રહેશે
મોદી સ્ટેડિયમમાં IPLની મેચ રમાવાની હોવાને પગલે શહેર પોલીસ કમિશનર દ્વારા વાહનોની અવર-જવર માટે ડાઇવર્ઝન આપવામાં આવ્યું છે. એવામાં આજે બપોરે 3 વાગ્યાથી રાતના 2 વાગ્યા સુધી જનપથ ટીથી મોટેરા સ્ટેડિયમના મુખ્ય ગેટથી કૃપા રેસિડેન્સી ટી થઈને મોટેરા ટી સુધીનો રસ્તો બંધ રહેશે. વાહનચાલકો એને બદલે તપોવન સર્કલથી વિસત ટી થઈને ઓ.એન.જી.સી ચાર રસ્તાથી જનપથ ટી થઈ, પાવર હાઉસ ચાર રસ્તા થઈને પ્રબોધ રાવળ સર્કલ સુધીના રસ્તાથી અવરજવર કરી શકશે. આવી જ રીતે કૃપા રેસિડેન્સી ટી થઈ શરણ સ્ટેટસ ચાર રસ્તા થઈ ભાટ-કોટેશ્વર રોડ થઈ એપોલો સર્કલ તરફ અવર-જવર કરી શકશે. જોકે ક્રિકેટ સાથે સંકળાયેલાં વાહનો, ફરજમાં રહેલા સરકારી વાહનો, ફાયર બ્રિગેડ, એમ્બ્યુલન્સ તથા આ વિસ્તારમાં વસવાટ કરતા રહીશો માટે આ જાહેરનામું લાગું પડશે નહીં.

IPL ફાઈનલ મેચનો મહાસંગ્રામ 8 વાગ્યે શરૂ થશે

2018માં ક્લોઝિંગ સેરેમનીનું આયોજન થયું હતું
IPLમાં લગભગ 4 વર્ષના અંતરાળ પછી ક્લોઝિંગ સેરેમનીનું આયોજન થઈ રહ્યું છે. એવામાં ગુજરાત અને રાજસ્થાનની મેચ શરૂ થવાની 50 મિનિટ પહેલાં આ કાર્યક્રમ યોજાશે. ત્યાર પછી મેચ 8 વાગ્યાથી શરૂ થશે. આ ઇવેન્ટ દરમિયાન BCCI ખૂબ જ અનોખી રીતે ભારતીય સ્વતંત્રતાના 75 વર્ષની ઉજવણી કરશે. કોરોના મહામારીને કારણે છેલ્લાં ચાર વર્ષથી IPL સંબંધિત કોઈ કાર્યક્રમનું આયોજન કરવામાં આવ્યું ન હતું, પરંતુ આ વખતે તમામ તૈયારીઓ પૂર્ણ કરી લેવામાં આવી છે. અગાઉ વર્ષ 2018માં છેલ્લી IPL ક્લોઝિંગ સેરેમની યોજાઈ હતી.

Download Our B K News Today App

Related News

Recent Posts

Environment

Women Special

Tweets by BkNewsToday

Follow Us

About us

Head Office (B.K. News)

Quick Links