ભારત-પાકિસ્તાને પોતાના પરમાણુ મથકોની યાદીની આપ-લે કરી

Published By : parth lakhtaria
Published Date : 2023-01-02 16:33:20
Views : 510
Modified Date : 2023-01-02 16:33:20

ભારત અને પાકિસ્તાને રવિવારે એકબીજાને પોતાના પરમાણુ મથકોની યાદી સોંપી હતી. બંને દેશો વચ્ચે 1988માં થયેલા કરાર મુજબ તેઓ વચ્ચે ગમે તેટલી ઉશ્કેરણી થાય, વાતાવરણ તંગ બની જાય તો પણ તેઓ એકબીજાના પરમાણુ મથકો ઉપર હુમલો કરી શકશે નહીં. બંને પાડોશી દેશો છેલ્લા ત્રણ દાયકાથી વધુ સમયથી આવું કરી રહ્યા છે. તેની પાછળ બંને દેશો વચ્ચે એક સમજૂતી છે, જે અંતર્ગત બંનેએ આ યાદી આપવાની હોય છે.

અત્રે ઉલ્લેખનીય છે કે, વર્ષ 2009માં ભારત પાસે 60થી 70 પરમાણુ બોમ્બ હતા, તે સમયે પાકિસ્તાન પાસે 60 પરમાણુ બોમ્બ હતા, પરંતુ 10 વર્ષમાં બંને દેશોએ પોતાના પરમાણુ બોમ્બની સંખ્યા બમણી કરી દીધી છે. પાકિસ્તાન પાસે 150થી 160 પરમાણુ બોમ્બ છે.

31 ડિસેમ્બર 1988 ના રોજ હસ્તાક્ષર કરાયેલ કરાર હેઠળ પરમાણુ લક્ષ્યો અને ઉપકરણો પર હુમલા પ્રતિબંધિત છે. 27 જાન્યુઆરી 1991 ના રોજ હસ્તાક્ષર કરાયેલ કરારની કલમ-II ની જોગવાઈઓ અનુસાર આ મથકોની સૂચિની અદલાબદલી કરવામાં આવે છે.

કરાર હેઠળ, પાકિસ્તાનમાં પરમાણુ સાઇટ્સ અને ઉપકરણોની સૂચિ રવિવારે ઇસ્લામાબાદમાં વિદેશ મંત્રાલયમાં ભારતીય હાઇ કમિશનના પ્રતિનિધિને સત્તાવાર રીતે સોંપવામાં આવી હતી. તેમજ, ભારતીય વિદેશ મંત્રાલયે નવી દિલ્હીમાં પાકિસ્તાન હાઈ કમિશનના પ્રતિનિધિને તેના પરમાણુ સાઇટ્સ અને ઉપકરણોની સૂચિ પણ સોંપી છે

નોંધપાત્ર રીતે આ અદલા બદલી બંને દેશો વચ્ચે કાશ્મીર મુદ્દે તેમજ સીમાપાર આતંકવાદને લઈને તણાવ વચ્ચે થઈ છે. મે 2008માં હસ્તાક્ષર કરાયેલ કોન્સ્યુલર એક્સેસ પરના કરારની જોગવાઈઓ હેઠળ આ યાદીઓની આપ-લે કરવામાં આવે છે.