શુ યશસ્વી જયસ્વાલે, કે એલ રાહુલની ટેસ્ટ કારકિર્દી ખતમ કરી ?

Published By : B.K.NEWS DAINIK
Published Date : 2023-07-16 14:30:16
Views : 137
Modified Date : 2023-07-16 14:30:16

ભારતીય ક્રિકેટ ટીમ હાલમાં વેસ્ટ ઈન્ડિઝના પ્રવાસ પર છે અને ટીમ ઈન્ડિયાએ આ પ્રવાસની જોરદાર શરૂઆત કરી છે. પહેલી જ મેચમાં ભારતે યજમાન ટીમને એકતરફી રીતે ઈનિંગ અને 141 રનથી હરાવ્યું હતું. ટીમ ઈન્ડિયાની આ જીતમાં નવોદિત બેટ્સમેન યશસ્વી જયસ્વાલનું બેટ ચમક્યું. ડાબોડી બેટ્સમેને તેની પહેલી જ ટેસ્ટ મેચમાં 171 રનની ઇનિંગ રમી હતી અને તે મેચનો, પ્લેયર ઓફ મેચ બન્યો હતો. યશસ્વીની આ ઈનિંગ પછી એવું લાગી રહ્યું છે કે રોહિત શર્મા સાથે તેની ઓપનિંગ ભાગીદારી નિશ્ચિત છે. આ સાથે એક સવાલ એ પણ છે કે શું કેએલ રાહુલની ટેસ્ટ કારકિર્દી ખતમ થઈ ગઈ છે ?કેએલ રાહુલ ટેસ્ટમાં ઓપનર તરીકે રમે છે. પરંતુ આ સમયે તે ઈજાથી પરેશાન છે અને ટીમની બહાર છે. આ કારણે રોહિત સાથે અલગ-અલગ ઓપનિંગ પાર્ટનર જોવા મળે છે. રાહુલની ગેરહાજરીમાં શુભમન ગિલ રોહિતને સપોર્ટ કરી રહ્યો હતો, પછી યશસ્વીએ વિન્ડીઝમાં આ કામ કર્યું અને યશસ્વીએ જે કર્યું, તે રાહુલની કારકિર્દી માટે જોખમરૂપ લાગે છે.રાહુલ IPL-2023માં લખનૌ સુપર જાયન્ટ્સની કેપ્ટનશીપ કરી રહ્યો હતો અને આ લીગમાં તેને ઈજા થઈ હતી. પરંતુ આ પહેલા રાહુલ આંતરરાષ્ટ્રીય મંચ પર ખરાબ ફોર્મ સાથે સંઘર્ષ કરી રહ્યો હતો. ઓસ્ટ્રેલિયા સામે રમાયેલી ટેસ્ટ શ્રેણીમાં રાહુલને પ્રથમ બે ટેસ્ટ મેચમાં તક આપવામાં આવી હતી પરંતુ તે પ્રભાવિત કરી શક્યો ન હતો અને તેથી તેને ટીમમાંથી બહાર કરી દેવામાં આવ્યો હતો. ત્યાર બાદની બે મેચમાં તેની જગ્યાએ ગીલે ટીમમાં સ્થાન મેળવ્યું હતું. નાગપુર અને દિલ્હીમાં રમાયેલી ટેસ્ટ મેચમાં રાહુલના બેટમાંથી માત્ર 38 રન જ નીકળ્યા હતા. રાહુલ સારો બેટ્સમેન છે પરંતુ તેના પ્રદર્શનમાં સાતત્યનો અભાવ વર્તાયો છે.રાહુલના પ્રદર્શનમાં સાતત્યનો અભાવ છે અને તેથી જ પસંદગીકારોનો તેના પરથી વિશ્વાસ ઉઠી શકે છે. દરમિયાન, જો યશસ્વી પોતાની રમતમાં સાતત્ય બતાવે અને સતત મોટો સ્કોર કરીને ટીમને સફળતા અપાવશે તો રાહુલને ટેસ્ટમાં બહાર બેસવું પડી શકે છે. કોઈપણ રીતે, સતત બે ICC વર્લ્ડ ટેસ્ટ ચેમ્પિયનશિપની ફાઈનલમાં હારનો સામનો કર્યા પછી, ટીમ ઈન્ડિયા ચેમ્પિયનશિપના ત્રીજી સિઝનમાં પરિવર્તનના મૂડમાં છે અને નવી ટેસ્ટ ટીમ તૈયાર કરવા માંગે છે. ચેતેશ્વર પૂજારાને પડતો મુકવાના નિર્ણયમાં પરિવર્તનનો મૂડ જણાઈ આવે છે.આ જોતાં પસંદગીકારો ફરી રાહુલને પ્રાથમિકતા આપે તેવી શક્યતા ઓછી જણાઈ રહી છે. જો યશસ્વી શરૂઆતમાં નિષ્ફળ જાય તો પણ ટીમ મેનેજમેન્ટ તેને તક આપી શકે છે કારણ કે કોચ રાહુલ દ્રવિડ યુવા ખેલાડીઓનું સમર્થન કરવા માટે જાણીતા છે. ટીમ મેનેજમેન્ટ અન્ય કારણસર યશસ્વીને પ્રાથમિકતા આપી શકે છે. તેનું કારણ એ છે કે તે ડાબોડી બેટ્સમેન છે. ટેસ્ટમાં ટીમ ઈન્ડિયાના ટોપ ઓર્ડરમાંથી જમણા-ડાબા હાથનું સંયોજન લાંબા સમયથી ગાયબ છે. લાંબા સમય બાદ ટીમને આ કોમ્બિનેશન મળ્યું છે. જે ફાયદાકારક સાબિત થયું. આવી સ્થિતિમાં રાહુલ માટે આ સારા સંકેતો નથી.