અસાની ચક્રવાત બંગાળની ખાડીમાં પહોંચ્યો : ઓડિશા-બંગાળમાં ભારે વરસાદની ચેતવણી; બિહાર-ઝારખંડમાં પણ એલર્ટ

Published By : B.K.NEWS DAINIK
Published Date : 2022-05-08 14:25:34
Views : 259
Modified Date : 2022-05-08 14:25:34

આ વર્ષના પહેલા ચક્રવાતી તોફાન અસાનીની અસર આજે એટલે કે રવિવારથી જોવા મળશે. આ ચક્રવાત શનિવારે આંદામાન સમુદ્રમાંથી બંગાળની ખાડીમાં પ્રવેશ્યું હતું, ત્યારપછી હવામાન વિભાગે (IMD) ઓડિશા અને બંગાળમાં વાવાઝોડાની ચેતવણી જાહેર કરી છે.

હવામાન વિભાગના જણાવ્યા અનુસાર, આ ચક્રવાત 10 મેના રોજ ઓડિશાના પુરી-ગંજમના દરિયાકિનારા પર ટકરાઈ શકે છે. IMDએ કહ્યું છે કે વાવાઝોડા દરમિયાન પવનની ગતિ 125 કિમી પ્રતિ કલાક સુધી જઈ શકે છે. અહીં બિહાર-ઝારખંડના કેટલાક જિલ્લાઓમાં પણ વરસાદની ચેતવણી જાહેર કરાઈ છે.

તોફાનની દિશા બદલાઈ શકે છે: IMD
IMD કોલકાતાના ડાયરેક્ટર જીકે દાસે કહ્યું છે કે વાવાઝોડું અત્યારે બંગાળની ખાડીમાં ઉચ્ચ દબાણ હેઠળ છે. આગામી થોડા કલાકોમાં તોફાનની દિશા પણ બદલાઈ શકે છે અને તેની ઓડિશાના સ્થાને બંગાળના કોઈપણ દરિયાકાંઠે ટક્કર થઈ શકે છે.

ઝારખંડ-બિહાર સહિત આ રાજ્યોને અસર થશે
ચક્રવાતી તોફાન અસાનીની અસર ઓડિશા ઉપરાંત ઓડિશા, બિહાર, ઝારખંડ, પશ્ચિમ બંગાળ, સિક્કિમ, આસામ, આંધ્રપ્રદેશ સહિતના ઘણા રાજ્યોમાં જોવા મળી શકે છે. હવામાન વિભાગે આ રાજ્યોમાં વરસાદનું યલો એલર્ટ પણ જાહેર કરી દીધું છે.

વર્ષ 2022નું પહેલું ચક્રવાતી તોફાન અસાની

અસાની આ વર્ષનું પહેલું ચક્રવાતી તોફાન છે. અગાઉ 2021માં 3 ચક્રવાતી તોફાનો આવ્યા હતા.

ચક્રવાત જાવદ ડિસેમ્બર 2021માં આવ્યું હતું. તે જ સમયે, ચક્રવાત ગુલાબ સપ્ટેમ્બર 2021માં ત્રાટક્યો હતો. જ્યારે મે 2021મા ચક્રવાત યાસે બંગાળ, બિહાર સહિત ઘણા રાજ્યોમાં વિનાશ સર્જ્યો હતો.