શૂટિંગ પહેલાં અક્ષય કુમારે રામલલાના દર્શન કર્યા, ભીડને કારણે રામની પૈડીનો કાર્યક્રમ કેન્સલ કરવો પડ્યો.

Published By : B.K.NEWS DAINIK
Published Date : 2021-03-18 17:00:27
Views : 386
Modified Date : 2021-03-18 17:00:27

અક્ષય કુમારે અયોધ્યા જઈને ફિલ્મ 'રામ સેતુ'નો મુહૂર્ત શોટ તથા પૂજા વિધિ કરી હતી. ગુરુવાર, 18 માર્ચના રોજ અક્ષય કુમાર એક્ટ્રેસ જેક્લીન ફર્નાન્ડિઝ તથા નુસરત ભરૂચા સાથે લખનઉ ગયો હતો. તેમની સાથે ડિરેક્ટર અભિષેક શર્મા પણ હતા. તેઓ લખનઉ ગયા હતા અને ત્યાંથી કારમાં અયોધ્યા પહોંચ્યા હતા. ઉલ્લેખનીય છે કે રામ મંદિરના નિર્માણ માટે અક્ષય કુમારે દાન આપ્યું છે. અયોધ્યા આવીને અક્ષય કુમારે શ્રીરામજન્મભૂમિ તીર્થ ક્ષેત્ર ટ્રસ્ટના મહાસચિવ ચમ્પત રાય બંસલ તથા ટ્રસ્ટી અનિલ મિશ્ર સાથે મુલાકાત કરી હતી. આ ઉપરાંત અક્ષય કુમારે શ્રીરામજન્મભૂમિ તીર્થ ક્ષેત્ર ટ્રસ્ટના સભ્ય તથા રાજા અયોધ્યા વિમલેન્દ્ર મોહન પ્રતાપ મિશ્રના ઘરની મુલાકાલ લીધી હતી. 15 મિનિટની આ મુલાકાતમાં અક્ષયે રામ મંદિર નિર્માણ તથા રામ જન્મભૂમિ પરિસરમાં થનારા અન્ય બાંધકામ પર ચર્ચા કરી હતી.

અક્ષય કુમારે પછી રામ જન્મભૂમિ પરિસરમાં રામ લલાની સામે 'રામ સેતુ'નો મુહૂર્ત શોટ કરીને પૂજા વિધિ કરી હતી. આ પૂજા વિધિ બાદ અક્ષયે રામ મંદિર નિર્માણ સ્થળ પર જઈને મંદિર નિર્માણની માહિતી મેળવી હતી. આટલું જ નહીં અયોધ્યાથી પરત આવ્યા બાદ અક્ષય કુમાર ઉત્તર પ્રદેશના મુખ્યમંત્રી યોગી આદિત્યનાથ સાથે મુલાકાત કરીને મુંબઈ પરત ફરશે.અક્ષય કુમાર રામ કી પૈડી જવાનો હોવાથી ભીડ જમા થઈ ગઈ હતી. DM તથા SSPની હાજરીમાં તંત્ર ભીડને નિયંત્રિત કરવામાં નિષ્ફળ રહ્યું હતું. રામની પૈડી પહોંચ્યા બાદ અક્ષય કુમાર ટીમ સાથે પરત ફર્યો હતો. સુરક્ષાને ધ્યાનમાં રાખીને સુરક્ષાકર્મીઓએ રામની પૈડીમાં અક્ષયને કારમાંથી નીચે ઊતરવાની ના પાડી દીધી હતી. આથી અક્ષય કુમાર ટીમ સાથે જતો રહ્યો હતો.