કંગનાએ ખેડૂતોને ઉશ્કેરવાનો આક્ષેપ મૂક્યો તો દિલજીત ભડક્યો, કહ્યું- દેશભક્ત કે દેશદ્રોહી નક્કી કરનારી તું છે કોણ?

Published By : B.K.NEWS DAINIK
Published Date : 2020-12-17 12:31:29
Views : 400
Modified Date : 2020-12-17 12:31:29

ખેડૂત આંદોલન મુદ્દે કંગના રનૌત તથા દિલજીત દોસાંજ ફરી એકવાર સામ-સામે આવી ગયા છે. બંને વચ્ચે ઉગ્ર દલીલો ત્યારે થઈ જ્યારે કંગનાએ દાવો કર્યો હતો કે આંદોલનકારી ખેડૂતોને ભડકાવ્યા બાદ દિલજીત તથા પ્રિયંકા ચોપરા ગાયબ થઈ ગયા છે. આ વાતનો જવાબ આપતા દિલજીતે કંગનાને પૂછ્યું હતું કે આ નક્કી કરવાનો અધિકાર તેને કોને આપ્યો કે કોણ દેશભક્ત છે અને કોણ દેશદ્રોહી? આટલું જ નહીં દિલજીતે ગુસ્સામાં આવીને કંગનાને કહ્યું હતું કે ખેડૂતોને આતંકી કહેતા પહેલાં તેને થોડી શરમ આવવી જોઈએ.કંગનાએ સોશિયલ મીડિયા પોસ્ટમાં દિલજીત દોસાંજને ટૅગ કરીને કહ્યું હતું, 'દિલજીતજી હું એક સામાન્ય સવાલ પૂછી રહી છું કે 2020ના ખેડૂત બિલ અંગે તમને શું ના ગમ્યું? દાખલા તરીકે મને એ વાત ગમી કે ખેડૂત હવે પોતાની પેદાશ દેશના કોઈ પણ ખૂણામાં જઈને વેચી શકશે. જેવી રીતે તમે દેશના કોઈ પણ ખૂણામાં જઈને પૈસા કમાઈ શકો છો.'

કંગનાએ આગળ કહ્યું હતું, 'મને એ વાત પણ ગમી કે વચ્ચેના દલાલોને છોડીને ખેડૂતો હવે સીધી જ રીતે પોતાની પ્રોડક્ટ કોર્પોરેટ કે પછી કન્ઝ્યૂમર્સને વેચી શકશે. બધાને લાગે છે કે ભારતમાં ખેડૂતોને દયનીય સ્થિતિમાંથી બહાર લાવવા માટે સરકારે ઉઠાવેલું આ પગલું ક્રાંતિકારી છે. તમે કેમ આંદોલન ભડકાવી રહ્યાં છો? પ્લીઝ મને તમારો દૃષ્ટિકોણ સમજવામાં મદદ કરો.'કંગનાની પોસ્ટ પર દિલજીતે પંજાબીમાં જવાબ આપ્યો હતો. તેણે કહ્યું હતું, 'આમ તો મને લાગતું નથી કે મારે તને કંઈ સમજાવવાની જરૂર છે. તું અત્યારે દરેક વાતની ઓથોરિટી બની જા..ઠીક છે. પછી પણ તું મને આખો દિવસ યાદ કરતી રહે છે. આથી જ આ સમય કાઢ્યો અને કાન ખોલીને સાંભળી લે.' આ સાથે જ દિલજીતે ન્યૂઝ વેબસાઈટની લિંક શૅર કરી હતી.દિલજીતે અન્ય એક પોસ્ટમાં લખ્યું હતું, 'સારું છે તો...અત્યારે ગાયબ થવાવાળા ન્યૂઝ ચાલવા દો. સવારે વાત કરીએ છીએ. બાબા બધાનું ભલું કરે.'

ગુરુવાર, 17 ડિસેમ્બરના રોજ કંગનાએ ઊઠીને તરત જ દિલજીતને જવાબ આપ્યો હતો. તેણે પોતાની પોસ્ટમાં કહ્યું હતું, 'તમે આ જ રીતે માસૂમ ખેડૂતોને ગુમરાહ કરી રહ્યાં છો. આ વીડિયોમાં આ વ્યક્તિ કોણ છે, જે વાર્તા બનાવી રહ્યો છે કે આમ થયું તો આમ થઈ જશે. આ થયું તો તે થઈ શકશે. કેમ તે પોતાની ધારણાઓના આધારે ભયભીત બની રહ્યો છે. ખેડૂતોને ગુમરાહ બનાવવાનું બંધ કરો.'થોડાં દિવસ પહેલાં કંગનાએ PM મોદીની એક પોસ્ટ શૅર કરી હતી, જેમાં PM ખેડૂતોને સંદેશો આપી રહ્યાં હતાં. કંગનાએ કહ્યું હતું, પ્રિય દિલજીત, પ્રિયંકા, જો તમને વાસ્તવમાં ખેડૂતોની ચિંતા છે, જો તમે વાસ્તવમાં માતાઓને સન્માન આપો છો તો સાંભળી લો કે ફાર્મર્સ બિલ શું છે? કે પછી પોતાની માતા, બહેનો તથા ખેડૂતોનો ઉપયોગ કરીને દેશદ્રોહીઓની ગુડ બુક્સમાં આવવા માગો છો? વાહ રે દુનિયા વાહ.કંગનાએ એક વૃદ્ધ શિખ મહિલાને શાહિન બાગમાં દેખાવો કરતી હોવાનું કહ્યું હતું. કંગનાએ કહ્યું હતું કે તે 100 રૂપિયામાં વિરોધ કરવા માટે આવી જાય છે. જોકે, વિવાદ વધતાં કંગનાએ આ પોસ્ટ ડિલીટ કરી નાખી હતી. દિલજીતને આ વાત પસંદ આવી નહોતી અને તેણે કંગનાને ધમકાવી હતી. ત્યારબાદ બંને ગાળાગાળી પર ઊતરી આવ્યા હતા.