ફેસબુક ફ્રેન્ડ બનેલી ઈંગ્લેન્ડની યુવતીએ વાસણાના યુવકના ~ 5.37 લાખ ખંખેર્યા

Published By : B.K.NEWS DAINIK
Published Date : 2019-07-22 16:59:59
Views : 814
Modified Date : 2019-07-22 16:59:59

વાસણામાં રહેતા યુવાન સાથે ફેસબુકના માધ્યમથી મિત્ર બનેલી ઈંગ્લેન્ડની યુવતીએ બોગસ કસ્ટમર ઓફિસર અને ખોટા આરબીઆઈ ઓફિસર સાથે મળી પાઉન્ડના ડિમાન્ડ ડ્રાફ્ટ પેટે ~ 5.37 લાખ ભરાવી છેતરપિંડી કરી હોવાની ઘટના પ્રકાશમાં આવી છે. વિદેશી યુવતી પોતાની સાથે અઢી લાખ પાઉન્ડના ડિમાન્ડ ડ્રાફ્ટ લાવી હોવાનું જણાવી ટૂકડે ટૂકડે આ રકમ ભરાવી હતી.
વાસણામાં રહેતા ચિંતન શાહ ખાનગી કંપનીમાં માર્કેટિંગનું કામ કરે છે. 26 એપ્રિલે ચિંતનના ફેસબુક પર સીએના જેસી નામની વ્યક્તિની રિકવેસ્ટ આવી હતી. જે ચિંતને એક્સેપ્ટ કર્યા બાદ બંને વચ્ચે મિત્રતા થઈ હતી અને એકબીજાના નંબરની આપ-લે બાદ વોટ્સએપથી વાત થતી હતી. સીએના ઈંગ્લેન્ડમાં રહેતી હોવાનું અને એકાઉન્ટન્ટ તરીકે નોકરી કરતી હોવાનું જણાવ્યું હતું. સીએના ત્રણ અઠવાડિયા માટે ભારત ફરવા આવવાની હોવાથી તેણે ચિંતનને 8 મેના રોજ વોટ્સએપ પર ટિકિટ મોકલી હતી. ત્યારબાદ 10 મેના રોજ સીએના દિલ્હી આવી ત્યારે ત્યાંથી રાજબીરસિંઘ નામના કસ્ટમર ઓફિસરનો ફોન આવ્યો હતો અને સીએના પાસે અઢી લાખ પાઉન્ડના ડિમાન્ડ ડ્રાફ્ટ હોવાનું જણાવી તે લીગલ ન હોઈ પેનલ્ટી રૂપે ~ 1.82 લાખ ભરવા પડશે તેમ જણાવી ~ 1 લાખ સીએનાએ ભરી દીધા હોઈ ~ 82 હજાર ભરવા જણાવ્યું હતું. જેથી રાજબીરસિંઘે આપેલા એકાઉન્ટ નંબર પર ચિંતને ~ 82 હજાર જમા કરાવ્યા હતા.
ત્યારબાદ રાજબીરસિંઘના ફોન પરથી સીએનાએ ફોન કરી એન્ટી લોન્ડરિંગ સર્ટિફિકેટના ~ 1.55 લાખ જમા કરાવવા પડશે અને આ રિફંડ મળશે તેમ જણાવતા ચિંતને ~ 1.55 લાખ જમા કરાવ્યા હતા. 11 મેના રોજ આલીયા ચૌધરી નામની યુવતીએ આરબીઆઈમાંથી બોલતી હોવાનું જણાવી સીએના જે ડિમાન્ડ ડ્રાફ્ટ લાવી છે તેની ભારતીય કિંમત ~ 2.27 કરોડ થતી હોવાનું જણાવી આ પૈસા બીજા એકાઉન્ટમાં ટ્રાન્સફર કરવા હોય તો ટેક્સ પેટે ~ 2 લાખ ભરવા જણાવ્યું હતું. જેથી ચિંતનને ઈ-મેલ મોકલી એક લિંક મોકલી હતી અને તે લિંક ખોલતા એક ફોર્મ ખુલ્યું હતું. જેમાં ટૂકડે ટૂકડે ~ 3 લાખ ભર્યા હતા.
12 મેના રોજ સીએના ચિંતનને ફોન કરી ~1 લાખ માગતા ચિંતનને શંકા ગઈ હતી અને તપાસ કરતા તેની સાથે છેતરપિંડી થઈ હોવાનું જણાયું હતું. જેથી આ અંગે ચિંતને પોલીસ ફરિયાદ નોંધાવી છે.