OBC અનામત માટેના રોહિણી પંચે પોતાનો રિપોર્ટ રાષ્ટ્રપતિને સુપરત કર્યો.

Published By : B.K.NEWS DAINIK
Published Date : 2023-08-02 16:46:14
Views : 125
Modified Date : 2023-08-02 16:46:14

ઓબીસી અનામતના વર્ગીકરણ પર રચાયેલ રોહિણી પંચે આખરે સોમવારે પોતાનો રિપોર્ટ રાષ્ટ્રપતિ દ્રૌપદી મુર્મુને સોંપ્યો. કેન્દ્રીય સામાજિક ન્યાય મંત્રાલયે એક નિવેદન કરીને આ અંગેની માહિતી આપી છે. 2017માં દિલ્હી હાઈકોર્ટના નિવૃત્ત ન્યાયાધીશ જી રોહિણીના નેતૃત્વમાં ચાર સભ્યોના કમિશનની રચના કરવામાં આવી હતી. આમ રોહિણી પંચને તેનો અહેવાલ રજૂ કરવામાં છ વર્ષનો સમય લાગ્યો છે. જો કે રોહિણી પંચનો રિપોર્ટ સાર્વજનિક કરવામાં આવ્યો નથી, પરંતુ સૂત્રોનું માનીએ તો 27 ટકા ઓબીસી અનામતને ત્રણથી ચાર ભાગમાં વહેંચવાની ભલામણ કરવામાં આવી છે.રોહિણી કમિશનની રચના શા માટે કરવામાં આવી?મંડલ કમિશન લાગુ થયા બાદ દેશની ઓબીસી જાતિઓને અનામતના દાયરામાં લાવવામાં આવી હતી. ઓબીસી માટે 27 ટકા અનામત નક્કી કરવામાં આવી હતી, પરંતુ અનામતના અમલ પછી પણ ઓબીસીની ઘણી જ્ઞાતિઓ અનામતના લાભોથી વંચિત રહી હતી. આવી સ્થિતિમાં, ઓબીસીમાં સમાવિષ્ટ જાતિઓને અનામતનો સમાન લાભ આપવા માટે, નેશનલ કમિશન ફોર બેકવર્ડ ક્લાસે વર્ષ 2015માં ઓબીસી અનામતને ત્રણ ભાગમાં વહેંચવાની ભલામણ કરી હતી. આ પછી જ ઓબીસી આરક્ષણ અને તેના ફાયદાઓનું મૂલ્યાંકન કરવા માટે કેન્દ્રની મોદી સરકાર દ્વારા ઓક્ટોબર 2017માં રોહિણી કમિશનની રચના કરવામાં આવી હતી.કમિશને છ વર્ષ પછી રિપોર્ટ સુપરત કર્યોરોહિણી કમિશનનો કાર્યકાળ 2017 થી 13 વખત લંબાવવામાં આવ્યો છે, પરંતુ હવે છ વર્ષ પછી, આયોગે તેનો રિપોર્ટ રાષ્ટ્રપતિ દ્રૌપદી મુર્મુને સોંપ્યો છે. આ સાથે જ તમામની નજર મોદી સરકાર પર છે કે શું સરકાર રોહિણી પંચની ભલામણોનો અમલ કરશે ? તેનું કારણ એ છે કે અત્યાર સુધી ઓબીસીને 27 ટકા અનામત સમાન રીતે લાગુ પડતું હતું, પરંતુ જો સૂત્રોનું માનીએ તો, રોહિણી પંચે તેના વર્ગીકરણની ભલામણ કરી છે.સૂત્રોનું માનીએ તો પંચે 27 ટકા ઓબીસી અનામતને ત્રણ કે ચાર કેટેગરીમાં વિભાજિત કરવાના સૂચનો રિપોર્ટમાં આપ્યા છે. એટલું જ નહીં, કેન્દ્રની ઓબીસી યાદીમાં એવી ઓબીસી જાતિઓનો સમાવેશ કરવાની પણ ભલામણ કરવામાં આવી છે. જે રાજ્યોમાં ઓબીસીનો દરજ્જો ધરાવતા હતા, પરંતુ કેન્દ્રની યાદીમાંથી બહાર હતા. ઓબીસી અનામતને ત્રણ કે ચાર કેટેગરીમાં વહેંચવા પાછળનો તર્ક એ છે કે જે ઓબીસી જ્ઞાતિઓ અનામતના લાભથી વંચિત છે તેમને અનામતનો લાભ મળી શકે.દેશમાં OBCમાં 2633 જાતિઓનો સમાવેશ થાય છે. સૂત્રોના જણાવ્યા અનુસાર ઓબીસી અનામતનો અભ્યાસ કરતી વખતે રોહિણી પંચને જાણવા મળ્યું છે કે ઓબીસીમાં સમાવિષ્ટ જ્ઞાતિઓમાંથી લગભગ એક હજાર જાતિઓને અનામતનો લાભ મળ્યો નથી. અમુક ઓબીસી જાતિઓને જ અનામતનો લાભ મળી રહ્યો છે. છેલ્લા ત્રણ દાયકામાં 48 જાતિઓને OBC માટે 50 ટકા અનામતનો લાભ મળ્યો છે અને લગભગ 550 જાતિઓને 70 ટકા અનામતનો લાભ મળ્યો છે. આને ધ્યાનમાં રાખીને, રોહિણી પંચે ઓબીસીના અનામતને શ્રેણીઓમાં વિભાજિત કરવાનું સૂચન કર્યું છે. જો કે, અનામતથી વંચિત રહેલ ઓબીસીની એક હજાર જ્ઞાતિઓની વસ્તી ઓબીસીનો લાભ મેળવતી જ્ઞાતિઓ કરતાં ઘણી ઓછી છે.સૂત્રોનું માનીએ તો, રોહિણી કમિશને ઓબીસી અનામતની વહેંચણી માટે વર્ગીકરણ સૂચવ્યું છે, જેમાં 27 ટકા અનામતને ત્રણ કે ચાર ભાગમાં વહેંચી દેવી જોઈએ અને ઓબીસીની વંચિત જાતિઓને લાભના દાયરામાં લાવવા જોઈએ. આ માટે તેમણે પહેલું સૂચન આપ્યું છે કે ઓબીસીને 3 ભાગમાં વહેંચવામાં આવે, જેમાં 10 ટકા અનામત એવી જ્ઞાતિઓને આપવામાં આવે જે અનામતના લાભથી વંચિત છે અને બાકીની 17 ટકાને બે કેટેગરીમાં વહેંચવી જોઈએ. આ પછી, અન્ય એક સૂચન કરવામાં આવ્યું છે કે ઓબીસીના આરક્ષણને ચાર ભાગમાં વહેંચવામાં આવે, જેમાં અનુક્રમે સૌથી ઓછા લાભવાળી ઓબીસી જાતિઓ રાખવામાં આવે, જેમાં 10, 9, 6 અને 2 ટકા અનામતનું સૂચન કરવામાં આવ્યું છે.