27મી ડિસેમ્બરથી ફરી એકવાર સી-પ્લેન શરૂ થશે

Published By : B.K.NEWS DAINIK
Published Date : 2020-12-19 11:06:54
Views : 336
Modified Date : 2020-12-19 11:06:54

અમદાવાદથી કેવડિયા શરૂ થયેલી સીપ્લેન સેવા ફરી એકવાર રાબેતા મુજબ ચાલુ થશે. આગામી 27મી ડિસેમ્બરથી સી-પ્લેન ચાલુ કરવાનો નિર્ણય લેવામાં આવ્યો છે. આ સેવા માટેનું બુકિંગ 20મી ડિસેમ્બરથી ચાલુ કરવામાં આવશે. રાબેતા મુજબના સમયે સી-પ્લેન સેવા શરૂ કરવામાં આવશે. ઉલ્લેખનીય છે કે, છેલ્લા ઘણાં સમયથી સી-પ્લેન મેઇન્ટેનન્સ માટે માલદીવ મોકલવામાં આવ્યું હતું. ત્યારે મેઇન્ટેનન્સ કર્યા બાદ લાંબા સમયે સી-પ્લેન સેવા શરૂ કરવામાં આવશે. લોકો માટે 1 નવેમ્બરથી સી પ્લેનનું સત્તાવાર સંચાલન શરૂ કરાયું હતું. જો કે સંચાલન શરૂ થયા બાદ પ્રથમ સપ્તાહમાં જ મેન્ટેનન્સ માટે બે દિવસ માટે ફ્લાઈટ ગ્રાઉન્ડેડ કરી દેવાઇ હતી. અધિકારીઓના જણાવ્યા મુજબ સી-પ્લેન પાણીમાં સતત ઉડાન ભરતું હોવાથી દર સપ્તાહે તેનું પ્રાથમિક મેન્ટેનન્સ જરૂરી છે. જ્યારે મહિનામાં એકવાર સંપૂર્ણ એરક્રાફ્ટનું મેન્ટેનન્સ કરવાનું હોય છે. જેના માટે શનિવારે આ એરક્રાફ્ટ માલદીવ મોકલાયું છે.

વડાપ્રધાન નરેન્દ્ર મોદી દ્વારા દેશમાં પહેલીવાર 2017માં અમદાવાદથી ધરોઈ સુધી સી-પ્લેનનો ઉપયોગ કરાયો હતો. ત્યારબાદ દેશમાં ટુરિઝમને પ્રોત્સાહન આપવાના ઉદ્દેશ સાથે ઉડાન યોજના હેઠળ ગુજરાતમાં ત્રણ રૂટ સહિત દેશમાં 16 રૂટ પર સી-પ્લેનનું સંચાલન શરૂ કરવાની જાહેરાત કરાઇ હતી. જાહેરાતના લગભગ દોઢથી બે વર્ષ બાદ દેશમાં પહેલીવાર અમદાવાદથી કેવડિયા સુધી સી-પ્લેનનું સંચાલન 31 ઓક્ટોબરથી શરૂ કરવાની જાહેરાત કરાઈ હતી. જેના પગલે વડાપ્રધાન નરેન્દ્ર મોદી કેવડિયા ખાતે સી-પ્લેનનું સત્તાવાર શુભારંભ કરાવી પ્રથમ પ્રવાસી તરીકે કેવડિયાથી અમદાવાદ સુધી મુસાફરી કરી આવ્યા હતા.

સી-પ્લેનનું સંચાલન કરતી એરલાઈન્સના અધિકારીએ જણાવ્યું કે, હાલમાં એરક્રાફ્ટના મેન્ટેન્સની સુવિધા અમદાવાદમાં નથી. અમદાવાદમાં સી-પ્લેનના મેન્ટેનન્સ માટેની સુવિધા શરૂ કરવા જરૂરી માળખું તૈયાર કરાઇ રહ્યું છે. એકવાર મેન્ટેનન્સ વર્કશોપ શરૂ કરાયા બાદ સી-પ્લેનનું મેન્ટેનન્સ અહીં જ કરાશે. વધુમાં એરક્રાફ્ટનું મેન્ટેનન્સ દર મહિને કરવું અનિવાર્ય છે, આ મેન્ટેનન્સ અગાઉથી નક્કી હોવાથી 27 નવેમ્બર બાદ સી-પ્લેનનું બુકિંગ કરવામાં આવ્યું નથી. હવે પરત ફર્યા બાદ તેનું બુકિંગ શરૂ કરાશે.