કમોસમી વરસાદે દાટ વાળ્યો બટાકાના બિયારણમાં ફૂગ વળી ગઇ

Published By : B.K.NEWS DAINIK
Published Date : 2020-02-19 16:28:31
Views : 1459
Modified Date : 2020-02-19 16:28:31

બટાકા નગરી ડીસાના ગ્રામ્ય વિસ્તારના ખેડૂતોને કમોસમી વરસાદ પડતા ખેડૂતોનું બટાકાનું બિયારણ પલળી ફૂગ વળી જતાં બિયારણ ફેલ ગયું છે. માત્ર ડીસામાં જ 6.5 લાખ કટ્ટા પલળી જતાં પારાવાર નુકસાન વેઠવું પડ્યું છે. બનાસકાંઠા જિલ્લામાં ગત વર્ષે 68,143 હેકટરમાં બટાકાનું વાવેતર કરાતા 20,23,847 મેટ્રિક ટન બટાકાનું ઉત્પાદન થયું હતું. બનાસકાંઠા જિલ્લાના બટાકાના ખેડૂતો શરદ પૂર્ણિમાએ બટાકાના વાવેતરની શરૂઆત કરતા હોય છે પરંતુ વાતાવરણને લઈ ખેડૂતોએ વાવણી મોડી શરૂઆત કરી લાભ પાંચમના દિવસે બટાકાની વાવણીના શ્રીગણેશ કર્યા હતા. જોકે અપર એર સાયકલોનીક અસરના પગલે ડીસામાં કમોસમી વરસાદ ખાબકતા ખેડૂતોના બટાકાનું બિયારણ બગડી ગયું છે. કેટલાક બિયારણમાં ફૂગ આવી જતા ખેડૂતોને નુકશાન વેઠવાનો વારો આવે તેવી સ્થિતિ સર્જાઈ છે. આ અંગે કોલ્ડસ્ટોરેજ એસો.ના પ્રમુખ ગણપતલાલ કછવાએ જણાવ્યું હતુ કે આ વર્ષે વાવણીના સમયે જ વરસાદ થતાં બટાકાના બિયારણના 6.5 લાખ કટ્ટા પલળી જતાં ખેડૂતો અને વેપારીઓને ભારે નુકસાન વેઠવું પડ્યું છે.બનાસકાંઠા જિલ્લામાં ખેડૂતો ખાસ કરીને કાપીને બટાકાની વાવણી કરે છે.વરસાદના કારણે બટાકાના બિયારણમા ફૂગ આવે છે અને બગડી જાય છે જેથી પાકને નુકશાન થાય છે ‘અનેક ખેડૂતોએ રાત્રે બટાકા વાવવાની આશાએ રાત્રે હજારો કટ્ટ બટાકા કાપીને મુક્યા હતા પરંતુ વરસાદ આવતા તમામ બટાકા પલળી જતા ફરી એક વાર પડતા પર પાટું વાગ્યું છે.છેલ્લા ત્રણ વર્ષથી ઉત્પાદિત બટાકાનો ભાવ મળતો નથી.