ભાભર-અમીરગઢમાં અઢી,દાંતીવાડા-લાખણીમાં 2 ઇંચ વરસાદ

Published By : B.K.NEWS DAINIK
Published Date : 2020-07-17 11:53:58
Views : 635
Modified Date : 2020-07-17 11:53:58

બનાસકાંઢા જિલ્લામાં ગુરુવારે વહેલી સવારે મેઘમહેર થઇ હતી.જેમા ભાભર-અમીરગઢમાં અઢી ઇંચ, દાંતીવાડા-લાખણીમાં બે ઇંચ, થરાદ-વડગામ-દિયોદરમાં દોઢ ઇંચ, ડીસા-વાવમાં સવા ઇંચ વરસાદ,સુઈગામ-પાલનપુરમાં 1 ઇંચ,ધાનેરા-કાંકરેજ અડધો ઈંચ વરસાદ નોંધાતાં વાવરણમાં ઠંડક પસરી હતી. જ્યારે દાંતા પંથકમાં પણ વરસાદી ઝાપટા પડ્યા હતા. ભાભરના સણવા ગામ વિજળી પડતાં એક ગાય, એક ભેંસનું મોત નિપજ્યું હતું.જ્યારે દિયોદરના મોજરૂજુના ગામે વાવાઝોડાના લીધે શેડ ધરાશાઇ થયો હતો. ભાભરમાં ગુરુવારે વહેલી સવારે સવા બે ઇંચ ગાજવીજ અને પવન સાથે વરસાદ પડ્યો છે. મોસમનો પહેલો વાવણીલાયક વરસાદ થતાં ખેડૂતોમાં આનંદની લાગણી પ્રસરી છે.જ્યારે ભાભર તાલુકાના સણવા ગામના ખેડૂત જગાભાઈ મઘાભાઈ ચૌધરીના ખેતરમાં રહેણાંક મકાન નજીક વીજળી પડતાં ઝાડ નીચે બાંધેલ એક ભેંસ અને ગાયનાં મોત થયા હતા.જ્યારે અમીરગઢમાં સવારે 4 થી 6માં બે ઇંચ વરસાદને લઇ રસ્તાઓ ઉપર પાણી ભરાયા હતા. જ્યારે મોડી સાંજે 14 મીમી વરસાદ વરસ્યો હતો. આ ઉપરાંત લાખણીમાં પણ સવારે 4 થી 6 માં 53 મીમી વરસાદ ખાબકતા ખેડૂતોમાં ખુશી જોવા મળી હતી.જ્યારે દિયોદર પંથકમાં મૂશળધાર વરસાદના લીધે દિયોદર પોલીસ સ્ટેશન રોડ, જુના બસ સ્ટોપ, રામદેવ પીર પરા વીસ્તાર, લક્ષ્મીપુરા વિસ્તાર વગેરેમાં પાણી ભરાઇ જતા વાહનચાલકો-રાહદારીઓ અગવડ પડી હતી તેમજ તાલુકાના ગ્રામ્ય વિસ્તારો ઝાડા, કોટડા, કુવાતા, ચીભડા, પાલડી વગેરે વિસ્તારમાં વાવણી લાયક વરસાદ થતાં ખેડૂતોમાં ખુશીનું મોજુ ફરી વળ્યું હતું. ત્યારે દિયોદરમાં વરસાદ 34 મીમી નોંધાયો હતો. જ્યારે બુધવારે સાંજે આવેલા વાવાઝોડા અને વરસાદના લીધે મોજરુ, વાતમ, સેસણ, પાલડી પંથકમાં ગતિશીલ પવન ફૂંકાતા મોજરુ જુના ગામે રહેતા ઠાકરાજી થાનાજી કાપડીના ખેતરમાં બનાવેલ શેડ ધારાશાયી થઇ ગયો હતો. સુઇગામ પંથકમાં ગુરુવારે વહેલી સવારે 5 વાગ્યે ગાજવીજ સાથે આવેલા પડતાં 1 ઇંચ વરસાદ વરસ્યો હતો. જેમાં વાવમા ગુરુવારની વહેલી સવારે સાડાચાર વાગ્યાના સુમારે ભારે ભવન વીજળી સાથે વરસાદનું આગમન થયું હતું. જેમાં 30 મીમી વરસાદ નોંધાયો હતો.થરાદ પંથકમાં કડાકા-ભડાકા અને ગાજવીજ સાથે વીજળી વરસાદ વરસ્યો હતો. જેમાં એકાદ કલાકમાં 40 મીમી વરસાદ નોંધાયો હતો. સામાન્ય વરસાદની શરૂઆત થતાં યુજીવીસીએલ દ્વારા વીજળી ડુલ કરતાં નાના બાળકો સહિત વૃધ્ધો સહિત હાલાકી ભોગવાનો વારો આવ્યો હતો. નિચાણવાળા વિસ્તારોમાં પાણી ભરાયા હતા. દાંતીવાડા પંથકમાં બુધવારે રાત્રે ત્રણ વાગે ભારે પવન સાથે વરસાદ તૂટી પડ્યો હતો દાંતીવાડા પંથકમાં 52 મીમી વરસાદથી રોડની સાઈડમાં પાણી ભરાઈ ગયા હતા. દાંતીવાડા બસસ્ટેન્ડથી જેગોલ તરફ જવાના માર્ગે સરકારી પ્રાથમિક શાળા પાસે જાહેર માર્ગ પર પાણી ભરાઈ જતા રાહદારીઓને હાલાકી પડી હતી.પાલનપુરમાં ગુરુવારે વહેલી સવારે 2 મિમિ વરસાદ નોંધાયો હતો. જ્યારે મોડી સાંજે ભારે પવન સાથે વરસાદી ઝાપટું પડતાં અડધો કલાકમાં 1 ઇંચ વરસાદ ખાબક્યો હતો. જેને લઇ નિચાણવાળા વિસ્તારોમાં તેમજ રસ્તાઓ ઉપર પાણી ભરાયા હતા. વડગામ પંથકમાં ભારે ઉકળાટ બાદ વરસાદનું આગમન થયું હતું. જ્યારે કાંકરેજ, ધાનેરા, દાંતા સહિતના વિસ્તારોમાં પણ વરસાદી ઝાપટાં પડતા વાતાવરણમાં ઠંડક પ્રસરી હતી. હવામાન વિભાગના જણાવ્યા અનુસાર, આગામી 24 કલાક ઉત્તર ગુજરાતના પાંચેય જિલ્લાના છુટાછવાયા વિસ્તારોમાં હળવાથી મધ્યમ વરસાદ વરસવાની શક્યતા છે.પાટણ જિલ્લામાં સિદ્ધપુરમાં 44 મીમી,સરસ્વતી તાલુકામાં 35 મીમી,પાટણમાં 14મીમી વરસાદ પડ્યો હતો. મહેસાણા જિલ્લામાં છેલ્લા 26 કલાકમાં 8 તાલુકામાં વરસાદ વરસ્યો હતો. જેમાં મહેસાણામાં પોણો ઇંચ, જોટાણા અને કડીમાં અડધો ઇંચ, વિસનગરમાં 10 મીમી, બહુચરાજીમાં 9 મીમી, વિજાપુરમાં 7 મીમી, વડનગરમાં 4 મીમી અને ઊંઝામાં 3 મીમી વરસાદ વરસ્યો હતો. સાબરકાંઠામાં હિંમતનગર, ગાંભોઈમાં અને મોડાસા અને માલપુરમાં વરસાદ પડ્યો હતો. ત્યારે ગુરુવારે સાંજના સુમારે ધોધમાર વરસાદ પડ્યો હતો.

રેઇનમીટર
વહેલી સવારે 4 થી રાત્રે 8 વાગ્યા સુધી