નવા વર્ષમાં 43 દિવસ લગ્ન માટેના શ્રેષ્ઠ મુહૂર્ત, ફેબ્રુઆરી, મે, જૂનમાં સૌથી વધુ લગ્નો થશે

Published By : B.K.NEWS DAINIK
Published Date : 2019-11-01 12:29:50
Views : 1052
Modified Date : 2019-11-01 12:29:50

દેવદિવાળીએ દેવવિવાહ બાદ લગ્નસરાની મોસમ પૂરબહારમાં ખીલશે. દેવવિવાહ બાદ જ આપણા સમાજમાં માંગલિક પ્રસંગોની શરૂઆત કરવામાં આવે છે. ઠેર ઠેર તુલસીવિવાહ બાદ લગ્નસરાની સિઝન જામશે. નવા વર્ષ વિક્રમ સંવત 2076માં 43 દિવસ લગ્ન માટેના શ્રેષ્ઠ મુહૂર્ત છે. જેમાં સૌથી વધુ મુહૂર્ત ફેબ્રુઆરી, મે અને જૂન મહિનામાં હોવાને કારણે આ મહિનાઓમાં સૌથી વધુ લગ્ન થશે. જો કે ગયા વર્ષની સરખામણીમાં આ વર્ષે લગ્ન માટેના સારા મુહૂર્ત 20 દિવસ ઓછા છે. ગયા વર્ષ વિક્રમ સંવત 2075માં 63 દિવસ લગ્ન માટેના સારા મુહૂર્ત હતા જ્યારે આ વર્ષે વિક્રમ સંવત 2076માં 43 દિવસ લગ્ન માટે શ્રેષ્ઠ હોવાનું શાસ્ત્રી રાજદીપ જોષીએ જણાવ્યું છે.
સૌપ્રથમ લગ્નનું મુહૂર્ત 20 નવેમ્બરના કારતક વદ આઠમના રોજ
નવા વર્ષમાં લગ્નનું પ્રથમ મુહૂર્ત 20 નવેમ્બર અને છેલ્લું મુહૂર્ત 30 જૂન 2020ના છે. નવા વર્ષમાં દેવઊઠી એકાદશી 7-8 નવેમ્બરના છે. આ સમયે સૂર્ય તુલા રાશિમાં નીચનો છે. જેના કારણે લગ્નના મુહૂર્ત નથી. ત્યારપછી 16 નવેમ્બરના સૂર્યની વૃશ્ચિક સંક્રાંતિ બાદ સૌપ્રથમ લગ્નનું મુહૂર્ત 20 નવેમ્બરના કારતક વદ આઠમના રોજ છે. આમ નવેમ્બર મહિનામાં 28મી સુધીમાં સાત દિવસ લગ્નના મુહૂર્ત છે. 16 ડિસેમ્બરના સૂર્યના ધન રાશિમાં પ્રવેશ સાથે ધનારકના કારણે લગ્નના મુહૂર્ત નથી. 15 જાન્યુઆરીએ વહેલી સવારે સૂર્યના મકરરાશિમાં પ્રવેશ સાથે લગ્નના મુહૂર્તનો પ્રારંભ થયા બાદ 18 જાન્યુઆરીએ પ્રથમ મુહૂર્ત છે. ત્યારબાદ માર્ચ મહિના સુધીમાં 13 દિવસ લગ્નના મુહૂર્ત છે. 3 માર્ચ હોળાષ્ટકના પ્રારંભ સાથે 8 માર્ચ સુધી અને 14 માર્ચના મિનારકનો પ્રારંભ થતા લગ્નના મુહૂર્ત નથી. માર્ચ મહિનામાં ફક્ત બેદિવસ 11 અને 12 માર્ચના લગ્નના મુહૂર્ત છે. 13 એપ્રિલે મિનારકનું સમાપન થતા લગ્નના મુહૂર્તનો પ્રારંભ થસે. જે જૂનના અષાઢ સુદ 10ના છેલ્લા મુહૂર્ત સાથે સમાપન થશે.
ક્યારે લગ્ન માટેનો શ્રેષ્ઠ સમય

મહિનો	તારીખ
નવેમ્બર	20, 21, 23, 28
ડિસેમ્બર	1,2,3,6,8,11,12
જાન્યુઆરી	18,20,29,30,31
ફેબ્રુઆરી	1,4,12,13,14,16,26,27
માર્ચ	11, 12
એપ્રિલ	16, 26, 27
મે	2,5,6,8,14,17,18,19
જૂન	11, 14,15, 25, 29, 30