બપોરે 1 વાગ્યા સુધીમાં 30 ટકા મતદાન, મતદારોમાં ભારે ઉત્સાહ જોવા મળ્યો, પૂર્વ ધારાસભ્ય સિદ્ધાર્થ પટેલે મતદાન કર્યું.

Published By : B.K.NEWS DAINIK
Published Date : 2021-02-28 14:03:16
Views : 251
Modified Date : 2021-02-28 14:03:16

વડોદરા જિલ્લા-તાલુકા પંચાયત અને નગરપાલિકાની 290 બેઠકો માટે આજે સવારથી મતદાન શરૂ થયું છે. જેમાં બપોરે 1 વાગ્યા સુધીમાં 30 ટકા જેટલુ મતદાન થયું છે. કુલ 10.56 લાખ મતદારો 770 મતદારોનું ભાવિ નક્કી કરશે. વડોદરા નજીક આવેલા આમલીયારા ગામમાં 90 વર્ષના જડાબેન વૃંદાવનભાઇ પટેલે મતદાન કર્યું હતું. તેઓએ મતદાન કર્યાં બાદ જણાવ્યું હતું કે, મતદાન મારો અધિકાર છે અને સ્વચ્છ અને સારી સરકાર માટે મતદાન કરવુ જરૂરી છે. મે અત્યાર સુધીની તમામ ચૂંટણીમાં મતદાન કર્યું છે અને લોકશાહીને જીવીત રાખવા જીવીશ ત્યાં સુધી મતદાન કરતી રહીશ. આ ઉપરાંત દાહોદ, પંચમહાલ, મહીસાગર અને નર્મદા, ભરૂચ અને છોટાઉદેપુર જિલ્લામાં પણ સ્થાનિક સ્વરાજ્યની ચૂંટણીનું મતદાન થઈ રહ્યું છે.

ડભોઇના કોંગ્રેસના પૂર્વ ધારાસભ્ય સિદ્ધાર્થ પટેલે ડભોઇના વોર્ડ નં-1ના સ્વામિનારાયણ મંદિરના મતદાન મથક પર પત્ની સાથે મતદાન કર્યું હતું. વડોદરા જિલ્લા પંચાયતની જરોદ બેઠકના કોંગ્રેસ ઉમેદવાર દિલીપ ભટ્ટે તેમના ગામ આમલીયારામાં મતદાન કર્યું હતું અને તેમના પત્ની, જિલ્લા પંચાયતના પૂર્વ પ્રમુખ અને દેણા તાલુકા પંચાયતના ઉમેદવાર પન્નાબેન ભટ્ટે પણ મતદાન કર્યું હતું. આ ઉપરાંત વડોદરા નજીક આવેલા મંજૂસર ગામમાં મતદાન માટે મતદારોએ લાંબી-લાંબી લાઈનો લગાવી હતી અને લોકોએ વિકાસના મુદ્દે મતદાન કરવાની વાત કરી હતી. વડોદરા નજીક આવેલા કોટાલી ગામમાં પણ કોરોનાની ગાઇડલાઇન પ્રમાણે સેનેટાઈઝ અને સ્ક્રિનિંગ કર્યાં બાદ જ મતદાન મથકમાં મતદાન કરવા માટે મતદારોને જવા દેવામાં આવે છે. દેણા ગામમાં મતદારોએ મતદાન માટે લાઇનો લગાવતા સોશિયલ ડિસ્ટન્સનો ભંગ થયો હતો.

આજે વડોદરા જિલ્લા પંચાયત, તાલુકા પંચાયત અને નગરપાલિકાની ચૂંટણીને અનુલક્ષીને જીલ્લા પોલીસ દ્વારા ગ્રામ્ય વિસ્તાર અને ટાઉન વિસ્તારમાં ચુસ્ત બંદોબસ્ત ગોઠવી દેવામાં આવ્યો છે. વડોદરા જિલ્લાના 880 બિલ્ડીંગમાં 1180 મતદાન મથકમાં ચૂંટણી યોજાઇ રહી છે. જેના માટે 4 ડીવાયએસપી, તથા 10થી વધુ પીઆઇ અને પીએસઆઇ તથા 700 પોલીસ કોન્સ્ટેબલ, એસઆરપીના 125 જવાનો તથા જીઆરડીના 1804 જવાનો તથા અન્ય શહેરો અને જીલ્લામાંથી 678 પોલીસ કર્મચારીઓનો બંદોબસ્ત ગોઠવવામાં આવ્યો છે. સંવેદનશીલ વિસ્તારોમાં પોલીસનું રાઉન્ડ ધી ક્લોક પેટ્રોલિંગ પણ કરી રહ્યું છે.

સ્થાનિક સ્વરાજ્યની ચૂંટણીમાં પાદરા નગરપાલિકાના 6 જેટલા વોર્ડ અને જિલ્લા પંચાયતની 6 બેઠકો સહિત તાલુકા પંચાયતની 26 બેઠકો માટે ચૂંટણી યોજાઇ રહી છે.પાદરા નગરપાલિકાના 6 જેટલા વોર્ડમાં 24 બેઠકો માટે 33 બૂથો માટે ચૂંટણી યોજાઇ રહી છે. એવી જ રીતે પાદરામાં 6 જિલ્લા પંચાયતની બેઠકો તેમજ 26 તાલુકા પંચાયતની બેઠકો માટે યોજાનાર ચૂંટણી માટે પાદરા તાલુકામાં 196 બૂથો પર મતદારો મતદાન કરી રહ્યા છે.

વડોદરા જિલ્લા ચૂંટણી અધિકારી અને કલેક્ટર શાલિની અગ્રવાલના માર્ગદર્શન અને રાજ્ય ચૂંટણી પંચના દિશા નિર્દેશો પ્રમાણે જિલ્લા ચૂંટણી તંત્ર ખાસ કરીને પ્રજ્ઞાચક્ષુ અને દિવ્યાંગ મતદારો નું મતદાન સરળ બનાવવાની વિશેષ વ્યવસ્થા કરે છે. તેના અનુસંધાને સુગમ્ય ચૂંટણીઓના સૂત્રને સાકાર કરવા જ્યાં દિવ્યાંગ મતદારો નોંધાયેલા છે, તેવા મતદાન મથકો ખાતે 140 જેટલી વ્હીલ ચેર અને તેટલા જ સ્વયં સેવકો મુકવામાં આવ્યા છે.

વડોદરા જિલ્લા સમાજ સુરક્ષા અધિકારી મયંક ત્રિવેદીએ જણાવ્યું કે, આ સ્વયં સેવકોએ મતદાનના પ્રારંભથી જ જરૂરિયાતમંદ મતદારોનું મતદાન સરળ બનાવવા વિવિધ રીતે સહાયક બનવાની સેવા શરૂ કરી દીધી છે. તેઓ દિવ્યાંગ મતદારો ઉપરાંત વડીલો, સગર્ભા મહિલાઓને જરૂરી સહાયતા કરે છે. જરૂરિયાત વાળા ને હાથ સાહીને અથવા વ્હીલ ચેરમાં મતદાન મથક સુધી લઈ જાય છે અને આવા મતદારોને નિયમ પ્રમાણે મતદાન કરવાની અગ્રતા મળે તેની કાળજી લઈ રહ્યાં છે.

વડોદરા જિલ્લા ચૂંટણી અધિકારી અને કલેકટર શાલિની અગ્રવાલે કોઇપણ ચૂંટણી હોય, મતદાનના દિવસે કલેકટર કચેરીના ધારાસભા હોલમાં ઉપકરણો થી સુસજ્જ નિયંત્રણ કક્ષ શરૂ કરવાની પરંપરા સ્થાપી છે. તે પ્રમાણે આજે વહેલી સવારથી નિયંત્રણ કક્ષની કામગીરી શરૂ કરી દેવામાં આવી હતી. તથા વિવિધ તાલુકા અને નગરપાલિકાઓ સાથે સંકલન કરીને પ્રત્યેક સ્થળે મતદાન સમયસર શરૂ થવાની ખાત્રી કરવાની સાથે જરૂરી માર્ગદર્શન આપવામાં આવ્યું હતી. નિવાસી અધિક કલેક્ટર અને અધિકારીઓએ તેની કામગીરી સંભાળી લીધી હતી.