બનાસકાંઠામાં લોકડાઉનમાં ફસાયેલા ૮૦૦ લોકોને વતન મોકલ્યા

Published By : B.K.NEWS DAINIK
Published Date : 2020-04-28 11:33:21
Views : 1339
Modified Date : 2020-04-28 11:33:21

બનાસકાંઠા જિલ્લામાં લોકડાઉનના કારણે ફસાયેલા રાજસ્થાનના ૮૦૦ લોકોને તેમના વતન મોકલવામાં આવ્યા છે. સરકારની ગાઈડલાઈન મુજબ આ તમામ લોકોની આરોગ્યની તપાસ કરી, સ્ક્રિનિંગ કરી રાજસ્થાન સરકારને સોંપ્યા હતા.
વૈશ્વિક મહામારી કોરોના વાયરસના કારણે સમગ્ર દેશને લોકડાઉન કરી દેવાયો છે. સરકાર દ્વારા લોકડાઉનની જાહેરાત થતા જ દરેક રાજ્યમાં રહેતા પરપ્રાંતીય લોકો પોતાના માદરે વતન જવા માટે નીકળી પડ્‌યા હતા. ત્યારે ગુજરાતમાં
પણ અલગ-અલગ વિસ્તારમાં રહેતા રાજસ્થાની લોકો પોતાના વતન તરફ જવા માટે નીકળ્યા હતા. પરંતુ અમીરગઢ બોર્ડર
પર રાજ્યની બોર્ડર સીલ હોવાના કારણે આ તમામ લોકો ત્યાં ફસાઈ ગયા હતા. આવા રાજસ્થાનના અલગ અલગ વિસ્તારના ૮૦૦ લોકોને અમીરગઢ બોર્ડર પર જ પકડી કોરોન્ટાઈન કરવામાં આવ્યા હતા. ત્યારે બે દિવસ અગાઉ જ બનાસકાંઠા અને શિરોહી જિલ્લાના અધિકારીઓએ બેઠક કરી આવા લોકોને તેમના વતન મોકલવા માટેનો પ્લાન તૈયાર કર્યો હતો. જે મુજબ અમીરગઢથી અલગ-અલગ ૧૦૦ બસોમાં આ ૮૦૦ લોકોને તેમના વતન મોકલવામાં આવ્યા હતા.
અમીરગઢ પોલીસે આ તમામ લોકોના આરોગ્ય તપાસ કરી સ્ક્રીનિંગ કરી, સોશિયલ ડિસ્ટન્સ સાથે બસમાં બેસાડીને રાજસ્થાન સરકારને સોંપ્યા હતા.
એક મહિના બાદ કોરોન્ટાઇનમાંથી મુક્તિ મેળવી પોતાના વતન જતા લોકો ખુશખુશાલ જોવા મળ્યા હતા.