ગાંધીનગર જિલ્લામાં અત્યાર સુધીમાં ૩૦.૪૬ ઈંચ વરસાદથી ખેડૂતો ખુશ

Published By : B.K.NEWS DAINIK
Published Date : 2020-08-27 12:01:33
Views : 302
Modified Date : 2020-08-27 12:01:33

ગાંધીનગર શહેર તેમજ દહેગામમાં ત્રણેક વખત ઝાપટાં પડવા સિવાય મેઘરાજાએ વરસાદી માહોલમાં વિરામ લીધો હતો. બે દિવસથી જિલ્લામાં વાદળછાયા વાતાવરણમાં પણ વરસાદ નહી પડતા ઉઘાડ નીકળવાથી ખેડૂતોમાં આનંદની લાગણી વ્યાપી છે. જોકે, ૧૦૦ ટકા વરસાદ પડી ગયો હોવા છતાં ૨૮ ઓગષ્ટથી ત્રણ દિવસ સુધી ગાંધીનગર અને ઉત્તર ગુજરાતમાં ભારે વરસાદ
પડવાની હવામાન વિભાગ દ્વારા આગાહી કરવામાં આવી છે.
ગાંધીનગરમાં છેલ્લાં બે દિવસથી વરસાદી માહોલમાં
પણ મેઘરાજાએ મોટાભાગે વિરામ ફરમાવ્યો છે. જો કે ગાંધીનગર શહેરમાં કયારેક ઝરમર વરસાદ વચ્ચે બે થી ત્રણ વખત ભારે ઝાપટાં પડતા રાજમાર્ગો ઉપર પાણી ભરાઈ ગયા હતા. ગાંધીનગર શહેરમાં સવારથી મોડી સાંજ દરમિયાન ૯ મિમિ જેટલો વરસાદ નોંધાયો છે. જ્યારે દહેગામમાં માત્ર ૨ મિમિ જ વરસાદ પડ્યો છે. તો કલોલ અને માણસા તાલુકામાં મેઘરાજાએ સંપૂર્ણ આરામ ફરમાવ્યો હોવાનું જિલ્લા
ડિઝાસ્ટર મેનેજમેન્ટની કચેરીએ જણાવ્યું હતું. ગાંધીનગરમાં ચોમાસાની આ સિઝન દરમિયાન ઓગષ્ટ મહિનામાં જ ૪૦ ટકા કરતા વધારે વરસાદ નોંધાયો છે. ગાંધીનગર જિલ્લામાં અત્યાર સુધીમાં સરેરાશ ૭૬૧.૫૦ મિમિ એટલે કે, ૩૦. ૪૬ ઈંચ વરસાદ નોંધાયો છે. જિલ્લામાં અત્યાર સુધીમાં સીઝનનો સૌથી વધુ વરસાદ દહેગામ તાલુકામાં ૮૩૧ મિમિ એટલે કે, ૩૩ ઈંચ જેટલો વરસાદ નોંધાયો છે. આ પછી માણસા તાલુકામાં ૭૮૨ મિમિવરસાદ નોંધાયો છે. તો કલોલમાં ૭૩૦ મિમિ એટલે કે, ૨૯ ઈંચ કરતા પણ વધારે વરસાદ નોંધાયો છે. જ્યારે ગાંધીનગર તાલુકામાં સૌથી ઓછો ૭૦૩ મિમિ એટલે કે, ૨૮ ઇંચ વરસાદ નોંધાયો છે.