વડોદરાની યુવતીનું દીકરીઓને શિક્ષિત કરવાનું અભિયાન, 10 વર્ષમાં દાતાઓના મદદથી 3.25 કરોડની ફી ભરી, આ વર્ષે 10 હજાર વિદ્યાર્થિનીની ફી ભરશે.

Published By : B.K.NEWS DAINIK
Published Date : 2020-12-30 14:12:54
Views : 272
Modified Date : 2020-12-30 14:12:54

'મને મારા પિતા તરફથી સામાજિક સેવા કરવાના ગુણ વારસામાં મળ્યા છે. મેં 12 વર્ષની ઉંમરે પિતા સાથે સામાજિક સેવાનાં કામો શરૂ કર્યાં હતાં, ત્યાર બાદ મેં ભણતાં ભણતાં જ ગરીબ અને જરૂરિયાતમંદ વિદ્યાર્થિનીઓની ફી ભરવા માટેની શરૂઆત કરી હતી. હું દાતાઓ પાસેથી એક-એક હજાર રૂપિયાના ચેક લાવીને વિદ્યાર્થિનીઓની ફી ભરીને મદદરૂપ થાઉં છું. છેલ્લાં 10 વર્ષમાં મેં 30 હજાર વિદ્યાર્થિનીની 3.25 કરોડ રૂપિયા ફી ભરી છે અને આ વર્ષે વધુ 10 હજાર વિદ્યાર્થિનીની 1 કરોડ રૂપિયા ફી ભરવાની છું', આ શબ્દો છે વડોદરા શહેરની સામાજિક કાર્યકર નિશિતા રાજપૂતના...

વડોદરા શહેરના સંગમ ચાર રસ્તા પાસે આવેલી ધરા પાર્ક સોસાયટીમાં રહેતી 28 વર્ષની સામાજિક કાર્યકર નિશિતા રાજપૂત છેલ્લાં 10 વર્ષથી સામાજિક કાર્ય સાથે જોડાયેલી છે. નિશિતાના પિતા ગુલાબસિંહ રાજપૂત, પણ સામાજિક સેવાના કામ સાથે સંકળાયેલા છે, જેથી તેમનામાંથી પ્રેરણા મેળવીને નિશિતાએ પણ સામાજિક સેવાના કામમાં ઝંપલાવ્યું હતું. વર્ષ 2010માં નિશિતાએ શાળાઓમાં ભણતા ગરીબ વિદ્યાર્થીનીઓની ફી ભરવાની શરૂઆત કરી હતી. નિશિતાએ વર્ષ 2010માં માત્ર 151 વિદ્યાર્થિનીની ફી ભરીને શરૂઆત કરી હતી, જે આજે 30 હજારે પહોંચી ગઈ છે.સામાજિક કાર્યકર નિશિતા રાજપૂતે જણાવ્યુ હતું કે બેટી બચાવો, બેટી પઢાવો અભિયાન અંતર્ગત હું અત્યારે વડોદરા શહેરના ગરીબ વિદ્યાર્થીઓની ફી ભરવાનું કાર્ય કરું છું, પરંતુ આગામી દિવસોમાં વડોદરા જિલ્લામાં પણ આ કામ શરૂ કરવાની ઇચ્છા છે. વધુમાં વધુ ગરીબ વિદ્યાર્થીનીઓની ફી ભરી શકું એવો મારો પ્રયાસ છે. જ્યારે હું ગરીબ છોકરીઓનું શિક્ષણ છૂટી ગયેલું જોતી ત્યારે મને થતું કે આ લોકો કેમ ભણી શકતાં નથી, ત્યારે મેં ગરીબ બાળકો માટે કામ કરવાનું નક્કી કર્યું હતું અને કોઇ બાળક અભણ ન રહે એવું સ્વપ્ન મેં સેવ્યું હતું. હું સીવણ મશીન આપીને મહિલાઓને પગભર કરવાનો પ્રયાસ કરું છું.

વિદ્યાર્થિનીઓએ જણાવ્યું હતું કે નિશિતા દીદી અમને ખૂબ મદદરૂપ થાય છે. તેઓ દાતાઓની મદદ લાવીને અમારી સ્ફૂલ ફી ભરે છે. અમને સ્કૂલ બેગ આપે છે અને દિવાળીમાં મનપસંદ કપડાં પણ આપે છે. તેમની મદદથી અમારા પરિવારને મદદ મળી રહે છે.સિનિયર સિટિઝન ગોવિંદભાઇ જરિયાએ જણાવ્યું હતું કે હું વડોદરાની ઘળિયાળી પોળ ખાતે એકલો રહું છું, મને છેલ્લાં 3 વર્ષથી નિશિતા રાજપૂત ટિફિન પહોંચાડે છે, હું તેમનો ખૂબ આભાર માનું છું. સિનિયર સિટિઝન મહિલા દમયંતીબેન ખરાદીએ જણાવ્યું હતું કે નિશિતાબેન મને છેલ્લાં સાડા ત્રણ વર્ષથી ટિફિન પહોંચાડે છે. જમવાનું સારું આપે છે અને દવા માટે રૂપિયા પણ આપે છે. હું તેમને આશીર્વાદ આપું છું.ફીના દાતા સિનિયર સિટિઝન પ્રવીણભાઈ ભટ્ટે જણાવ્યું હતું કે નિશિતાનું કામ ખરેખર સરાહનીય છે અને અમે પણ તેની સાથે જોડાયેલા છીએ. હું અને મારા મિત્રો મારફત વિદ્યાર્થિઓની ફી માટે ચેક પહોંચતા કરીએ છીએ. નિશિતા દરેક બાળકી સુધી ફી પહોંચાડે છે, જેથી અમે છેલ્લાં 9 વર્ષથી ફી માટે રકમ પહોંચાડીએ છીએ.

નિશિતા રાજપૂત ગરીબ બાળકોની ફી ભરીને તેમણે ભણવામાં મદદરૂપ થાય છે, સાથે સાથે દર વર્ષે 151 જેટલી વિદ્યાર્થિનીઓને અડોપ્ટ કરી શકે તેવા દાતાઓ પણ શોધી લાવે છે. આ દાતાઓ વિદ્યાર્થિનીઓને અડોપ્ટ કરીને તેમના સમગ્ર ભણતરનો ખર્ચ ઉઠાવે છે અને જ્યાં સુધી ભણે ત્યાં સુધી તમામ ખર્ચ દાતા જ ઉઠાવે છે. આ ઉપરાંત નિશિતા રાજપૂતે એકલા રહેતા સિનિયર સિટિઝન માટે ટિફિન સેવા પણ શરૂ કરેલી છે, જેમાં અત્યારે 191 જેટલા સિનિયર સિટિઝને ઘરે મફત ટિફિન પહોંચાડવામાં આવે છે. જેના માટે પણ નિશિતા દાતાઓ શોધી લે છે, જેમાં સિનિયર સિટિઝન્સને ટિફિન પહોંચાડતી મહિલાઓને પણ રોજગારી મળી રહે છે.

Download Our B K News Today App

Related News

Recent Posts

Environment

Women Special

Tweets by BkNewsToday

Follow Us

About us

Head Office (B.K. News)

Quick Links