બોરસદમાં ટ્રકચાલકે પોલીસકર્મીને કચડ્યો : ચેકિંગ માટે ટ્રક રોકવાનું કહેતાં ચાલકે પોલીસકર્મી ઉપર ચઢાવી દીધી

Published By : B.K.NEWS DAINIK
Published Date : 2022-07-20 14:51:42
Views : 281
Modified Date : 2022-07-20 14:51:42

હરિયાણા પછી ઝારખંડ અને હવે ગુજરાતમાં વાહન ચેકિંગ દરમિયાન પોલીસકર્મીની હત્યાની ઘટના સામે આવી છે. બોરસદ ટાઉનમાં વાહન ચેંકિંગ દરમિયાન પોલીસકર્મીએ ટ્રક ચાલકને ઉભા રહેવા ઇશારો કર્યો હતો. જોકે, ચાલકે પોતાની ટ્રક ભગાવી મૂકતા પોલીસકર્મીએ પીછો કર્યો હતો. જેમાં ટ્રકની ઓવરટેક કરી ટ્રકને રોકવાનો પ્રયત્ન કરતા ચાલકે ટ્રક પોલીસકર્મી પર ચડાવી દીધી હતી. આ બનાવમાં પોલીસકર્મીનું સારવાર દરમિયાન મોત થતા પોલીસ બેડામાં ગમગીની વ્યાપી છે. પરિવારના કલ્પાંતે ગામમાં પણ શોકમગ્ન વાતાવરણ નિર્માણ કર્યું છે.

રોકવા કહેતા ચાલકે ટ્રક ઉપર ચઢાવી દીધી
બોરસદ ટાઉનમાં ફરજ બજાવતા કિરણસિંહ રાજ નાઈટ ડ્યુટી દરમિયાન વાહન ચેકીંગ કરતા હતા. તે દરમિયાન ટ્રક ચાલકને ઉભું રાખવા ઈશારો કરતા ટ્રક ચાલકે ટ્રક દોડાવી તેથી કિરણસિંહે તેનો પીછો કરતા ટ્રકની આગળ ઓવરટેક કરી ગાડી ઉભી કરી દીધી અને ગાડી રોકવા કહેતા ટ્રક ચાલકે ટ્રક કિરણસિંહ ઉપર ચઢાવી દીધી હતી. જેમાં પગને ભારે ઇજાઓ પહોંચતા તેઓને કરમસદ હોસ્પિટલમાં દાખલ કરવામાં આવ્યા હતા. આ દરમિયાન રાત્રીથી જ પોલીસ કાફલો હોસ્પિટલમાં પહોંચ્યો હતો.

ઇરાદાપૂર્વક કરેલો ગુનો
આ અંગે આણંદ ડીએસપી અજિત રાજ્યાણે જણાવ્યું હતું કે, પોલીસ કર્મી ઉપર ફરજ દરમિયાન થયેલી આ ઘટના ઇરાદાપૂર્વક કરેલો ગુનો છે. રાજસ્થાન પસિંગની ટ્રક હાલ પોલીસ જાપતા છે. ગુનેગારને પકડવાની તજવીજ હાથ ધરી છે. આ અંગે ઇપીકો કલમ 304 હેઠળ ગુનો દાખલ કરી આગળની કાર્યવાહી કરવામાં આવશે.

બે સંતાનોએ પિતાની છત્રછાયા ગુમાવી
મહત્વનું છે કે, કિરણસિંહ 2006થી પોલીસ વિભાગમાં ફરજ બજાવતા હતા. તેઓ પરિણીત હતા. જેઓને પરિવારમાં બે સંતાન છે. જ્યારે ચાર વર્ષ અગાઉ જ તેઓના પત્નીનો સ્વર્ગવાસ થયો હોઈ બે સંતાનોની જવાબદારી તેઓ ઉપર જ હતી. હાલ કિરણસિંહના મૃત્યુ બાદ બે સંતાનોએ માતા બાદ પિતાની પણ છત્રછાયા ગુમાવી છે. હાલ મૃતકનો પરિવાર અને સમગ્ર પોલીસ પરિવાર અને ભારે શોકમય બની ગયો છે.

હરિયાણામાં DSPને ડંપરે કચડ્યા હતા
હરિયાણાના નૂંહ જિલ્લામાં મંગળવારે ખાણ માફીયાઓએ DSPને ડંપર નીચે કચડી નાંખ્યા હતા. DSP સુરેન્દ્ર સિંહ અહીં દરોડા પાડવા માટે ગયા હતા. તેમનું ઘટના સ્થળે દુઃખદ અવસાન થયું હતુ. આ ઘટના બન્યાના 4 કલાક બાદ પોલીસે આરોપીઓની તપાસ કરી અનેક ગામોને ઘેરી લીધા હતા અને તાવડ વિસ્તારના પંચગાંવમાં પોલીસે એન્કાઉન્ટર કર્યું હતું. જેમાં ડમ્પરના ક્લિનર ઈકરારના પગમાં ગોળી લાગતા પોલીસે પોલીસે ધરપકડ કરી હતી.

ઝારખંડના રાંચીની ઘટના
હરિયાણા બાદ ઝારખંડના રાંચી જિલ્લામાં વાહન ચેકિંગ દરમિયાન એક મહિલા સબ-ઇન્સ્પેક્ટરની પિકઅપ વાનથી કચડીને હત્યા કરવામાં આવી હોવાની ઘટના સામે આવી હતી. પિકઅપ વાનની ટક્કર એટલી જોરદાર હતી કે મહિલા પોલીસ અધિકારીનું ઘટનાસ્થળે જ મૃત્યુ થયું હતું. વાહનચાલક ઘટના પછી ભાગવામાં સફળ રહ્યો હતો. પોલીસનો દાવો છે કે આ મામલામાં એક આરોપીની ધરપકડ કરવામાં આવી છે.