મહાપાલિકાના સફાઇ કર્મચારીઓએ સુરક્ષાના અભાવે હડતાલ પાડી

Published By : B.K.NEWS DAINIK
Published Date : 2021-04-21 12:00:16
Views : 268
Modified Date : 2021-04-21 12:00:16

કોરોનાનો કોહરામ મચી ગયો છે, ત્યારે દરેક વ્યક્તિ જીવ બચાવવાનો પુરો પ્રયાસ કરે છે. મહાપાલિકા વિસ્તારમાં સફાઇ કરતા કર્મચારીઓ પણ પોતે સંક્રમિત ના થાય માટે એજન્સી પાસે સુરક્ષા માટે હેન્ડ ગ્લવ્ઝ, સેનેટાઇઝર સહિતની માંગ કરી રહ્યા છે. પરંતુ એજન્સી દ્વારા આપવામાં નહિ આવતા આખરે આજે મંગળવારે વાવોલમાં સફાઇ કર્મચારીઓએ હડતાલ
પાડી હતી અને એજન્સીના નામની હાય બોલાવી હતી.
ગાંધીનગર શહેરમાં રોજના કોરોના સંક્રમિતનો આંકડો ૧૦૦ પાર થઇ ગયો છે. શહેરી વિસ્તાર કરતા ગ્રામ્ય વિસ્તારમાં કોરોના ફૂંફાડા મારી રહ્યો છે. ત્યારે તમામ લોકો કોરોના સંક્રમિત ના થાય માટે પુરતા પ્રયત્નો કરી રહ્યા છે.
મહાપાલિકા દ્વારા પણ લોકોના ટેસ્ટ કરાવામાં આવી રહ્યા છે. રસીકરણ ઉપર ભાર મુકી રહ્યા છે. ત્યારે દિવા તળે અંધારા જેવી સ્થિતિ સામે આવી છે.
મહાપાલિકા વિસ્તારના વાવોલમાં સફાઇ કરતા કર્મચારીઓ દ્વારા આજે હડતાલનું શસ્ત્ર ઉગામવામાં આવ્યું હતંુ.
સફાઇ કર્મચારી વિપુલ વાઘેલાએ કહ્યું હતું કે, અમે ગ્રીન ગ્લોબલ સોલ્યુશન એજન્સીમાં ફરજ બજાવીએ છીએ. છેલ્લા બે દિવસથી અમે એજન્સીના કર્તાહર્તાને કહી રહ્યા છીએ કે, અમને કોરોના સામે સુરક્ષા મળી રહે માટે હેન્ડગ્લોઝ, સેનેટાઇઝર સહિતનો સામાન આપવામાં આવે. પરંતુ એજન્સીના બહેરા કાને અમારી વાત સંભળાથી નથી. હાલમાં જ અમારા પાંચ કર્મચારી પોઝિટિવ આવ્યા છે. જેમાં સરગાસણ, કોલવડા અને રાંધેજામાં કામગીરી કરતા કર્મીઓ સંક્રમિત બન્યા છે.
પાંચ કર્મચારીને કોરોના થયા બાદ એજન્સીએ હાથ ઉંચા કરી દીધા છે. જવાબદારી
સ્વીકારવા કોઇ તૈયાર નથી, આવી કપરી સ્થિતિમાં કોઇ કર્મચારીને થઇ ગયું તો જવાબદારી કોણી ?. તે ઉપરાંત કર્મીઓને પુરતો પગાર અને વીકઓફ આપવામાં આવતો નથી. લઘુત્તમ વેતન આપવામાં આવતું નથી, જ્યારે
ઓળખપત્ર પણ આપવામાં આવતું નથી. અમારી માંગણીનો સ્વિકાર કરવામાં નહિ આવે ત્યાં સુધી અમારી હડતાલ ચાલુ રહેશે. ગ્રીન ગ્લોબલ સોલ્યુશન એજન્સી દ્વારા સમાધાન લાવવામાં નહિ આવે તો કર્મચારીઓ સોલ્યુશન લગાવી દેશે તેવી ચિમકી ઉચ્ચારી હતી.