સોમનાથમાં અદ્યતન ‘યાત્રી પદ-પથ’નું નિર્માણ

Published By : B.K.NEWS DAINIK
Published Date : 2019-09-24 16:56:56
Views : 360
Modified Date : 2019-09-24 16:56:56

પ્રથમ જ્યોતિર્લિંગ સોમનાથ મંદિર ખાતે મુંબઈના મરિન ડ્રાઇવને યાદ અપાવે તેવો ‘યાત્રી પદ-પથ’ કે ‘વૉક-વે’ નિર્માણ પામ્યો છે. સાથોસાથ ‘પ્રસાદ યોજના’ હેઠળ વિવિધ કાર્યો થયા છે. જે અંતર્ગત યાત્રિક સુવિધા કેન્દ્ર, અદ્યતન સુવિધાઓથી સજ્જ પાર્કિંગનું નિર્માણ થયું છે. સોમનાથ ટ્રસ્ટના ટ્રસ્ટી-સેક્રેટરી અને પૂર્વ મુખ્યસચિવ પી.કે.લહેરીએ જણાવ્યું કે ગુજરાતના પનોતાપુત્ર નરેન્દ્રભાઈ મોદીના નેતૃત્વ હેઠળ વર્ષ-૨૦૧૪માં કેન્દ્રમાં સરકાર બની ત્યારે દેશના લાખો શ્રદ્ધાળુઓ માટે મહત્ત્વના તીર્થસ્થાનોનો વિકાસ થાય, ભારતના ભવ્ય સાંસ્કૃતિક વારસાનું આગામી પેઢીઓ સુધી સંસ્કાર-સિંચન થતું રહે તેવા હેતુથી એક ખાસ ‘પ્રસાદ યોજના’ બનાવાઈ. જે અંતર્ગત વર્ષ-૨૦૧૫-૧૬માં દ્વારકા અને વર્ષ-૨૦૧૬-૧૭માં જ્યોતિર્લિંગ સોમનાથની પસંદગી થઈ છે. આ ‘પ્રસાદ યોજના’ હેઠળ સોમનાથ સમુદ્રતટ ઉપર સાત મીટર પહોળો અને ૧૫૦૦ મીટર લાંબો ‘વૉક-વે’ નિર્માણ થયો છે. મુંબઈના મરિન ડ્રાઇવની યાદ આપે તેવો ‘યાત્રી પદ-પથ’ સોમનાથ જ્યોતિર્લિંગને એક આગવી ઓળખ આપશે. પ્રાચીન સમયમાં અરબી સમુદ્રનો પુરાણોમાં ‘રત્નાકર’ સમુદ્ર તરીકેનો ઉલ્લેખ છે. આ એ જ ‘રત્નાકર’ સમુદ્ર છે કે જ્યાં દેવો-દાનવોએ સમુદ્ર-મંથન કર્યું હતું. આ પથ ઉપર ચાલતા યાત્રિકોને મંદિરની ભક્તિનો છાંયો અને રત્નાકર સમુદ્રની ઠંડી હવા, ગીર પ્રદેશની લીલોતરી અને ઐતિહાસિક પ્રભાસ પાટણના અનેક ધાર્મિક સ્થળોનાં સતત દર્શન થતાં રહેશે.અદ્યતન પાર્કિંગ સુવિધા અંગે પૂછતાં તેમણે જણાવ્યું કે સોમનાથ ટ્રસ્ટે ૨૦૦૦ કાર, ૨૦૦ બસ સુવ્યવસ્થિત રીતે પાર્ક કરી શકાય તે રીતે અદ્યતન પાર્કિંગની વ્યવસ્થા માટે કરેલો પ્રોજેક્ટ પૂર્ણતાના આરે છે. આ પ્રોજેક્ટ અંતર્ગત વાહનોનાં પ્રવેશ-નિકાસનું નિયંત્રણ, ફોટોગ્રાફી અને પાર્કિંગવાળા વાહનનું CCTV મોનિટરિંગ સાથે પાર્કિંગની અનેક વિશેષતા છે. જેમાં, ૧. ૭૫ કિલોવોટનો સોલર પાવર પ્લાન્ટ કાર્યરત્ છે. ૨. યાત્રાળુઓની શૌચ સુવિધા માટે છ ટોઇલેટ બ્લોકમાં ૧૨૦-શૌચાલય, ૬૦ બાથરૂમ સાથે સ્વચ્છ, અત્યાધુનિક સુવિધા પૂરી પાડવામાં આવેલી છે. ૩. ચા-પાણી-નાસ્તા-ભોજનની વ્યવસ્થા પાર્કિંગ વિસ્તારમાં છે. ૪. પાર્કિંગ વિસ્તારની ચારે તરફ ૨૦,૦૦૦ ચોરસફૂટમાં વિવિધ પ્રકારનાં વૃક્ષો-છોડનું વાવેતર થઈ રહ્યું છે. જેથી ઇકોફ્રેન્ડલી વાતાવરણ ઊભું કરાશે. યાત્રિક સુવિધા કેન્દ્રમાં શું વ્યવસ્થા છે? તે અંગે પી.કે.લહેરીએ જણાવ્યું કે સિનિયર સિટીઝન્સ, મહિલા, બાળકો માટે આરામગૃહોની વ્યવસ્થા કરાઈ છે. ગુજરાતી અને કાઠિયાવાડી ભોજન-નાસ્તા માટે વાજબી ભાવે સગવડ પ્રાપ્ત છે. યાત્રી સુવિધા કેન્દ્રમાં First Aid પણ ઉપલબ્ધ રહેશે. સોમનાથનો ઇતિહાસ લોકો જોઈ શકશે? તે અંગે પી.કે.લહેરીએ જણાવ્યું કે સવા સો વ્યક્તિઓની ક્ષમતાવાળા ઓડિટોરિયમમાં સોમનાથ, ઇતિહાસ સહિત અનેક દસ્તાવેજી ફિલ્મ દર્શાવાશે. ગુજરાતનાં કલા-કસબીઓનાં ઉત્પાદનનાં વેચાણ અને મંદિરના પ્રસાદ, સ્મૃતિચિહ્નોનાં વેચાણની પણ વ્યવસ્થા કરાઇ છે. શ્રીસોમનાથ જ્યોતિર્લિંગના અગાઉના મંદિરોનાં અવશેષોનું મ્યુઝિયમ પણ નિર્માણ થયું છે. સોમનાથ રાત્રિએ પ્રકાશપુંજની માફક ઝળહળે છે.સોમનાથ ટ્રસ્ટના પી.કે.લહેરીએ જણાવ્યું કે શ્રી સોમનાથ મંદિર પુન:નિર્માણ પામ્યું છે, પરંતુ ઐતિહાસિક રીતે આ એક આગવી ધરોહર છે. આ ધરોહર અરબી સમુદ્રમાંથી પસાર થતાં જહાજોમાંથી પણ જોઈ શકાય અને પ્રાચીન નાગરશૈલીનાં નવનિર્મિત મંદિરની કલા-કારીગરી નિરખી શકે તે માટે નરેન્દ્રભાઈ મોદીએ અંગત રસ લઇને સમગ્ર મંદિરને રાત્રે ફિલિપ્સ કંપની દ્વારા તૈયાર કરાયેલા પ્રકાશ-વ્યવસ્થાના કારણે આ પ્રથમ જ્યોતિર્લિંગનું મંદિર રાત્રિના સમયે વિવિધ રંગોમાં પ્રકાશપુંજની માફક ઝળહળી ઊઠે છે અને ભક્તોની આસ્થા-ભક્તિમાં વધારો કરે છે.સોમનાથ ગુજરાતનું ‘સુવર્ણ-મંદિર’ બનવાની દિશામાં પી.કે.લહેરીએ જણાવ્યું કે પ્રસાદ યોજના ઉપરાંત, ટ્રસ્ટના અધ્યક્ષ કેશુભાઈ પટેલના સૂચનથી મંદિરના બે શિખર પરનાં ૧૫૦૦ કળશોને સુવર્ણમય બનાવવાની કામગીરી પણ હાથ ધરવામાં આવી છે. શ્રી સોમનાથ મહાદેવના અનેક ભક્તોએ કળશ માટે એક કળશ માટે રૂ.૧ લાખથી વધુ દાન આપી આ મંદિરને ગુજરાતનાં સુવર્ણ મંદિર બનાવવાની દિશામાં સહયોગ આપ્યો છે.