ગુજરાતમાં કોરોનાના ચોંકાવનારા આંકડા, છેલ્લા એક મહિનામાં 95% લોકોને પ્રથમ વખત થયો કોરોના

ગુજરાતમાં કોરોનાના કેસોમાં રોકેટ ગતિએ વધારો થઈ રહ્યો છે. બુધવારે રાજ્યમાં કોરોનાના નવા 979 કેસો નોંધાતા ચિંતાજનક સ્થિતિનું નિર્માણ થયું છે. પણ આ વચ્ચે જ સ્વાસ્થ્ય વિભાગ દ્વારા કરવામાં આવેલી એક સ્ટડીમાં ચોંકાવનારા આંકડા સામે આવ્યા છે. છેલ્લા બે મહિનામાં રાજ્યમાં કોરોનાના જેટલાં કેસો નોંધાયા છે, તેમાંથી 95 ટકા દર્દીઓ એવાં છે, કે જેઓને વર્ષ 2020થી કોરોના મહામારી શરૂ થઈ ત્યારથી પ્રથમ વખત કોરોના થયો છે. આ ઉપરાંત હેલ્થ ડિપાર્ટમેન્ટના ડેટામાં એ વાત પણ સામે આવી છે કે, પોઝિટિવ આવેલાં દર્દીઓમાંથી એકપણ દર્દીએ વેક્સિનનો બૂસ્ટર ડોઝ લીધો ન હતો. આ ઉપરાંત અત્યારે કોરોનાના જેટલા પણ કેસો નોંધાય છે, તેમાંથી માત્ર 2 ટકા દર્દીઓને જ હોસ્પિટલમાં દાખલ કરવાની જરૂર પડે છે. જ્યારે આ વખતે બાળકોને પણ હોસ્પિટલમાં દાખલ કરવાનો દર 5 ટકાથી ઓછો છે.

21 જૂનથી 21 જુલાઈ સુધી 18,190 દર્દીઓને પ્રથમ વખત કોરોના થયો
રાજ્યમાં કોરોના મહામારીને કાબૂમાં લેવા માટે કરતાં અધિકારીઓએ જણાવ્યું હતું કે, 21 જૂન 2022થી 21 જુલાઈ 2022 સુધી રાજ્યમાં કોરોનાના 18,860 કેસો નોંધાયા હતા, જેમાંથી 18,190 દર્દીઓ એવા હતા કે, જેઓ મહામારીના બે વર્ષમાં પ્રથમ વખત કોરોનાની ઝપેટમાં આવ્યા હતા, જ્યારે માત્ર 5 ટકા દર્દીઓ એવા હતા કે, જેઓને બીજી અથવા ત્રીજી વખત કોરોના થયો હતો.

પોઝિટિવ દર્દીઓમાંથી 99 ટકાએ રસીના બંને ડોઝ લીધા હતા, પણ કોઈએ બૂસ્ટર ડોઝ લીધો ન હતો
આ ઉપરાંત સ્વાસ્થ્ય વિભાગના ડેટામાં બીજી એક મોટી વાત સામે આવી છે કે, પોઝિટિવ આવેલાં દર્દીઓમાંથી એકપણ દર્દીએ બૂસ્ટર ડોઝ લીધો ન હતો. અધિકારીએ જણાવ્યું કે, 1 મહિનાની અંદર જેટલાં કોરોનાના કેસો નોંધાયા હતા, તેમાંથી 99 ટકા દર્દીઓએ કોરોના વેક્સિનના બંને ડોઝ લીધા હતા, પણ એકપણ દર્દીએ કોરોના વેક્સિનનો બૂસ્ટર ડોઝ લીધો ન હતો.

90 ટકા લોકોમાં કોમ્યુનિટી સ્પ્રેડને કારણે સંક્રમણ ફેલાયું
જ્યારે કોરોના સંક્રમણ ફેલાવવા અંગે અધિકારીઓએ જણાવ્યું કે, પોઝિટિવ દર્દીઓમાંથી માત્ર અમુક દર્દીઓની જ ઈન્ટર-સ્ટેટ અથવા ઈન્ટરનેશનલ ટ્રાવેલ હિસ્ટ્રી હતી. 90 ટકા લોકોમાં કોમ્યુનિટી સ્પ્રેડને કારણે કોરોનાનું સંક્રમણ ફેલાયું હતું. રાજ્યમાં સૌથી વધુ કોરોનાના કેસો અમદાવાદ શહેરમાં નોંધાયા હતા. ઉલ્લેખનીય છે કે, ગત અઠવાડિયે અમદાવાદ મ્યુનિસિપલ કોર્પોરેશનના અનેક અધિકારીઓએ કોરોનાની ચપેટમાં આવી ગયા હતા, જેમાં ડેપ્યુટી મ્યુનિસિપલ કમિશનર્સનો પણ સમાવેશ થાય છે. જુલાઈ મહિનાની શરૂઆતમાં AMC દ્વારા રહેણાંક વિસ્તારોને માઈક્રો કન્ટેઈન્મેન્ટ ઝોન જાહેર કરવાનું શરૂ કરાયું હતું.

પોઝિટિવ કેસોમાંથી માત્ર 2 ટકા દર્દીઓને હોસ્પિટલમાં દાખલ કરવાની જરૂર પડી
એડિશનલ ડિરેક્ટર ઓફ પબ્લિક હેલ્થ ડૉ. નિલમ પટેલે જણાવ્યું કે, રાજ્યમાં શૈક્ષણિક સંસ્થાઓમાંથી સૌથી મોટી કોવિડ ક્લસ્ટર્સ IIT ગાંધીનગર, GNLU, GMERS ગાંધીનગર અને IIM અમદાવાદ જેવી સંસ્થાઓ હતી. જો કે, આ સંસ્થાઓમાં કોરોના કાબૂ બહાર જાય તે પહેલાં જ, કોરોનાના કેસોની ઝડપી તપાસ કરવામાં આવી હતી, આઈસોલેટ કરીને સંક્રમણની સ્થિતિને કાબૂમાં લેવામાં આવી હતી.

જો કે, આ સમયે કોવિડ પોઝિટિવ આવતાં દર્દીઓમાં હોસ્પિટલમાં દાખલ થવાનો દર બીજી લહેર કરતાં ઘણો ઓછો છે. અત્યારે જેટલાં પણ પોઝિટિવ કેસો નોંધાય છે, તેમાંથી માત્ર 2 ટકા દર્દીઓને હોસ્પિટલમાં દાખલ કરવાની જરૂર પડી રહી છે. આ ઉપરાંત સ્વાસ્થ્ય વિભાગના અધિકારીઓએ જણાવ્યું હતું કે, નાના બાળકોને પણ હોસ્પિટલમાં દાખલ કરવાનો દર ઓછો હતો અને તે 5 ટકાથી વધુ ન હતો, જ્યારે બાળકોમાં મલ્ટિ સિસ્ટમ ઈન્ફ્લેમેટરી સિંડ્રોમ જોવા મળ્યો ન હતો. ત્રીજી લહેર પહેલાં એવી આશંકા હતી કે, બાળકોમાં કોરોનાના કેસો કુલ કેસો કરતાં 10 ટકાની આસપાસ નોંધાઈ શકે છે.