પરમબીર સિંહે મારી વિરુદ્ધ લગાવેલા આરોપોની તપાસ હાઈકોર્ટના રિટાયર્ડ જજ કરશેઃ અનિલ દેશમુખ.

Published By : B.K.NEWS DAINIK
Published Date : 2021-03-28 15:37:57
Views : 266
Modified Date : 2021-03-28 15:37:57

મહારાષ્ટ્રનાં ગૃહમંત્રી અનિલ દેશમુખની વિરુદ્ધ વસુલીના આરોપોની તપાસ થશે. રાજ્યના મુખ્યમંત્રી ઉદ્ધવ ઠાકરે આ મામલામાં તપાસ કરાવવાનો નિર્ણય લીધો છે. અનિલ દેશમુખે જ રવિવારે આ અંગેની માહિતી આપી છે કે સીએમએ મુંબઈના પૂર્વ પોલીસ કમિશ્નર પરમબીર સિંહના આરોપોની તપાસનો નિર્ણય લીધો છે.અનિલ દેશમુખે જણાવ્યું કે આ મામલામાં હાઈકોર્ટના રિટાયર્ડ જજ પાસે તપાસ કરાવવાનો નિર્ણય લેવામાં આવ્યો છે. ગૃહમંત્રીએ જણાવ્યુ કે તેમણે પોતે સ્વયં પરમબીરના આરોપોની તપાસ કરાવવાની સીએમ ઉદ્ધવ ઠાકરે સમક્ષ માંગ કરી હતી. ન્યુઝ એજન્સી એએનઆઈ સાથેની વાતચીતમાં દેશમુખે રવિવારે કહ્યું કે આ તપાસમાં સત્ય પ્રકાશમાં આવી જશે.

અનિલ દેશમુખે પોતાની વિરુદ્ધ લાગેલા આરોપોની તપાસની માંગ એવા સમયે કરી છે કે જ્યારે શિવસેનાના મુખપત્ર સામનામાં તેમની કાર્યશૈલી પર સવાલ ઉઠાવવામાં આવ્યા છે. સાથે જ એક ગૃહમંત્રી તરીકે કઈ રીતે કામ કરવું જોઈએ તેની પણ અનિલ દેશમુખને સલાહ આપવામાં આવી છે.શિવસેનાના મુખપત્ર સામનામાં પરમબીર સિંહના આરોપ અને સચિન વઝે મામલામાં કઈ રીતે વર્તન કરવું જોઈએ તેની સલાહ આપવામાં આવી છે. સામનામાં લખવામાં આવ્યું છે કે અનિલ દેશમુખને ગૃહમંત્રીનું પદ આકસ્મિક સંજોગોના પગલે મળી ગયું. જયંત પાટિલ, દિલીપ વલસે પાર્ટીલે ગૃહમંત્રી પદ સ્વીકારવાથી ઈન્કાર કરી દીધો હતો. ત્યારે આ પદ રાષ્ટ્રવાદી કોંગ્રેસ પાર્ટી(NCP)ના શરદ પવારે અનિલ દેશમુખને સોંપ્યું હતું. આ પદની એક ગરિમા છે. ગૃહમંત્રી અનિલ દેશમુખે અધિકારીઓ સાથે કોઈ પણ કારણ વગર બદલો લીધો.

શિવસેનાની અનિલ દેશમુખને સલાહ હતી કે ગૃહમંત્રીએ ઓછામાં ઓછું બોલવું જોઈએ. કોઈ પણ કારણ વગર કેમેરા સમક્ષ જવું અને તપાસના આદેશ આપવાનું સારુ હોતુ નથી. પોલીસ વિભાગનું નેતૃત્વ માત્ર સેલ્યુટનું હોતુ નથી. તે પ્રખર નેતૃત્વ આપવા માટે હોય છે. પ્રખરતા ઈમાનદારીથી આવે છે. એ વાતને કઈ રીતે ભૂલી શકાશે.મુંબઈ પોલીસ કમિશ્નર પરમબીર સિંહે સીએમને પત્ર લખીને મહારાષ્ટ્રના ગૃહમંત્રી અનિલ દેશમુખ પર આરોપ લગાવ્યા હતા કે તેમણે પોલીસ અધિકારીઓને 100 કરોડ રૂપિયાની વસુલી કરવાનો ટાર્ગેટ આપ્યો છે. પરમબીર સિંહે આરોપ લગાવ્યો હતો કે ગૃહમંત્રીએ સચિન વઝેને વસુલીનો ટાર્ગેટ આપ્યો હતો.