ગોધરામાં જન સાધારણ ટ્રેનમાં શંકાસ્પદ કોરોનાના દર્દીનું મોત; જનરલ કોચમાં મુસાફરની લાશ કલાકો સુધી રઝળતી રહી.

Published By : B.K.NEWS DAINIK
Published Date : 2021-05-02 10:58:54
Views : 236
Modified Date : 2021-05-02 10:58:54

અમદાવાદથી દરભંગા જતી જન સાધારણ ટ્રેનમાં 50 વર્ષિય કોરોના શંકાસ્પદ દર્દી રાકેશ શાહ અમદાવાદથી બિહારના સમસ્તીપુર જવા ટ્રેનના જનરલ કોચમાં મુસાફરી કરતો હતો. ટ્રેનના જનરલ કોચમાં રાકેશ શાહનું વડોદરાથી ગોધરા સ્ટેશન વચ્ચે મુત્યુ થયું હતું. ગોધરા રેલવે સ્ટેશન પર ટ્રેનને ઉભી રાખી ગોધરા રેલવેને જાણ કરી હતી. મૃતક મુસાફરના ખિસ્સામાંથી કોરોના બીમારી થઇ હોવાની દવાની ચિઠ્ઠી મળી આવી હતી.

કોરોનાના શંકાસ્પદ દર્દીનું મોત નિપજતાં જનરલ કોચમાં કોરોના સંક્રમણ ફેલાવાની શકયતા પણ પ્રબળ બની હતી. ગોધરા રેલવે સ્ટેશનના સ્ટેશન માસ્ટર RPF. GRP પોલીસની ટીમ ટ્રેનના કોચ ઉપર દોડી આવી હતી. બનાવને પગલે ટ્રેન એક કલાક મોડી ઉપડી હતી. સાથે રેલવે વિભાગના મહેકમી સંકલન ન હોવાના કારણે મુસાફરની લાશ કલાકો સુધી ટ્રેનના કોચમાં રઝળતી જોવા મળી હતી. મુસાફરનો મૃતદેહ ટ્રેનમાંથી નીચે ઉતારી 108 ઇમર્જન્સી સેવા દ્વારા ગોધરા સિવિલમાં ખસેડવામાં આવ્યો હતો. ત્યારે અમદાવાદ રેલવે સ્ટેશન ઉપર આરોગ્યની ટીમ કાર્યરત છતાં શંકાસ્પદ કોરોના દર્દીની મુસાફરીને લઇ સવાલો ઉઠયા હતા.