પ્રકૃતિના પાલવમાં અંબાજી ધામ

Published By : B.K.NEWS DAINIK
Published Date : 2019-09-13 12:33:54
Views : 524
Modified Date : 2019-09-13 12:33:54

અર્બુદા પર્વતની આરાસુરી ગિરીમાળાની શક્તિપીઠ બિરાજતાં ર્માં અંબે માના ધામમાં દર વર્ષે ભાદરવી પૂર્ણિમાંનો મહાકુંભ ભરાય છે. ત્યારે પ્રકૃતિ પણ સોળે કળાએ ખીલી ઉઠે છે. અરવલ્લીની ગિરીમાળાઓનું અદ્દભૂત સોંદર્ય નવી ઉર્જાનો સંચાર કરે છે. ભાદરવામાં વાદળોના અપડાઉન વચ્ચે અંબાજી ધામ હિલ સ્ટેશન જેવું બની જાય છે.
વિશ્વમાં અરવલ્લી પર્વતમાળાઓ સૌથી પ્રાચિન પર્વત માળા છે. અરવલ્લીનો અર્થ થાય છે શિખરોની હારમાળા’ આ પર્વતની શ્રેણી પશ્ચિમ ભારત અને પૂર્વ
પાકિસ્તાનમાં લગભગ ૮૦૦ કી.મી. વિસ્તારમાં ફેલાયેલી છે. ભારતમાં હરિયાણા, રાજસ્થાન ગુજરાત તેમજ પાકિસ્તાનમાં પંજાબ અને સિંઘ રાજ્યોમાં આ પર્વત માળા ફેલાયેલી છે. અરાવલ્લી શ્રેણી રાજસ્થાન રાજ્યને ઉત્તર અને દક્ષિણ એમ બે ભાગમાં વહેંચે છે. અરવલ્લીનું સૌથી ઉંચુ શિખર ગુરૂ શિખર છે. જે રાજસ્થાનના સિરોહી જિલ્લાના માઉન્ટ આબુમાં આવેલું છે. અરાવલ્લી પર્વતનો ૮૦ ટકા ભાગ એકલા રાજસ્થાનમાં છે. આ પર્વતનો છેલ્લો છેડો હરિયાણા અને દિલ્હીમાં છે. જ્યારે દક્ષિણ છેડો ગુજરાત અંબાજી પાલનપુર સુધી વિસ્તરેલો છે જે રણને વધતું અટકાવે છે.
અરવલ્લીમાંથી બનાસ લુણી અને સાબરમતી જેવી નદીઓ નિકળે છે. અરવલ્લીની પર્વતમાળા આબુ પાસેથી ગુજરાતમાં પ્રવેશે છે અને રાજ્યના ઉત્તર પૂર્વિય અને પૂર્વીય ભાગમાં વાંકી ચૂકી થઈ શિવરાજ પુર સુધી વિસ્તરી વિધય ની ટેકરીઓને મળે છે. અરવલ્લી પર્વતમાળાની ઉત્પતી પૃથ્વીના પોપડાના ઉધવ ગમનથી થયેલ હોવાથી તે એક ભૂ સંચલન પર્વત છે. આ પર્વત ઉગ્ર ઢોળાવો ધરાવે છે. પાલનપુર, અંબાજી, દાંતા, ઈડર વિસ્તારમાં અરવલ્લી હારમાળા લાંબી અને સાંકડી ટેકરીના સ્વરૂપમાં તૂટક સ્વરૂપે જાવા મળે છે. મહેસાણામાં આ ટેકરીઓ તારંગા હિલ તરીકે ઓળખાય છે. અંબાજીનું સ્થાન આરાસુરના ડુંગરમાં અરાવલ્લી પર્વત ઘાટથી નૈઋત્વ કોણ છે. અંબાજી વિખ્યાત વૈદિક કુમારિકા નદી સરસ્વતિના ઉત્તરે આરાસુરી ટેકરીઓ પર સ્થિત છે. આ ટેકરીઓ દરિયાઈ સપાટીથી ૧૬૦૦ ફૂટ ઊંચી છે જ્યારે અંબિકા જંગલ ૪૮૦ મીટરની ઉંચાઈએ દક્ષિણ-પશ્ચિમ તરફ છે. તેથી અંબાજીનું વાતાવરણ હંમેશા ખુશનુમા રહે છે. પર્વત માળાના જંગલોમાંથી વહેતા પવન હંમેશા ઠંડક આપે છે.
ચોમાસાની ઋતુમાં સરેરાશ ૮૦ થી ૯૦ ઈંચ વરસાદ અંબાજીથી માઉન્ટઆબુ વિસ્તારમાં થાય છે. જ્યારે પ્રકૃતિ સોળે કળાએ ખીલી ઉઠે છે. વાદળો વચ્ચે માં અંબાનું ધામ ભક્તોને અનોખો આનંદ આપીજાય છે.
અંબાજી માતાનું મૂળ સ્થાન ગબ્બર પર્વત માળા પર આવેલ છે. જ્યાં ચાલીને જવાનો મહિમા છે. મોટી સંખ્યામાં ભક્તો મૂળ સ્થાનના દર્શન કરી ધન્યતા અનુભવે છે ત્યારે હાલમાં અંબાજી ધામ પ્રકૃતિથી સોળે કળાએ ખીલી ઉઠ્‌યું છે અને ધીમી ધારે વરસતો વરસાદ ચોમેર ઠંડક પસરાવે છે.