MBBSની વિદ્યાર્થિનીનું ડેટિંગ સાઈટ પર ફેક ID બનાવી ચેટ કરી લોકોને પર્સનલ નંબર આપ્યા, મોડાસાથી આરોપી ઝડપાયો.

Published By : B.K.NEWS DAINIK
Published Date : 2021-03-25 17:33:46
Views : 386
Modified Date : 2021-03-25 17:33:46

મેડિકલ કોલેજમા ભણતી વિદ્યાર્થિનીના નામે ફેક આઈડી બનાવી અલગ-અલગ યુવક સાથે ચેટ કરતાં MBBSના સ્ટુડન્ટને અમદાવાદ સાયબર ક્રાઇમે ઝડપી પાડ્યો છે. યુવતીએ કરેલી ફરિયાદ અનુસાર યુવકે તેના નામે ફેક આઈડી બનાવી ડેટિંગ સાઇટ પર ચેટ જુદાજુદા લોકો સાથેને તેનો પર્સનલ નંબર આપી દીધો હતો. અનેક લોકોના મેસેજ આવતા આખરે યુવતીએ આ અંગે સાયબર ક્રાઇમ વિભાગમાં ફરિયાદ નોંધાવી હતી. પોલીસે આરોપી યુવકની ધરપકડ કરી છે.

અમદાવાદના મેડિકલ કોલેજમાં બીજા વર્ષમાં અભ્યાસ કરતી નિશા (નામ બદલ્યું છે) રોજ પોતાની કોલેજમાં અભ્યાસ કરતી હતી. આ દરમિયાન એક દિવસ તેના વોટ્સએપ નંબર પર અજાણી વ્યક્તિના મેસેજ આવ્યા અને કહ્યું કે તમારો નંબર અમને ડેટિંગ વેબસાઈટ પર પ્રોફાઈલ પરથી મળ્યો છે. જેથી અમે તમને મેસેજ કર્યો છે અને આવી રીતે બીજા લોકોએ પણ નિશાને મેસેજ કરવા લાગ્યા હતા. જેનાં કારણે નિશા પરેશાન થઈ ગઈ હતી. કારણકે તેને આવી કોઈ આઈડી બનાવી જ ન હતી. જેથી તેણે આ અંગે સાયબર ક્રાઇમ વિભાગનો સંપર્ક કર્યો હતો. હાલ પોલીસે આ અંગે ગુનો નોંધી તપાસ કરી આરોપીને દબોચી લીધો છે.

ચાંદખેડા રહતી આપેલી ફરિયાદ મુજબ કોઈ અજાણી વ્યક્તિએ લેમન ડેટિંગ એપ્લિકેશન પર Naiya, cutie, sweet girl નામના ID બનાવીને તેના પ્રોફાઈલ પિક્ચર રાખ્યા હતા. તે ID પરથી તેણે જુદાજુદા લોકો સાથે યુવતીના નામે કરી તેનો મોબાઈલ નંબર અને ઈન્સ્ટાગ્રામ IDની માહિતી આપી હતી. એટલું જ નહીં તેમાં કોમેન્ટ કરીને વાતચીત કરવા જણાવ્યું હતું. ઈન્સ્ટાગ્રામ પર તેના એકાઉન્ટ બનાવીને યુવતીને કોલેજમાં બદનામી થાય તેમ બીભત્સ ગાળો આપતો મેસેજ કરતો હતો.સાયબર ક્રાઈમ પોલીસે તપાસ કરીને ટેક્નિકલ એનાલિસિસના આધારે ફેક ID બનાવનાર યુવક અરવલ્લી જિલ્લાના મોડાસાનો હોવાનું સામે આવ્યું હતું. પોલીસે મોડાસાથી કુશ ઉર્ફે છોટુ ઘનશ્યામ પટેલ (ઉ.વ.20)ની તેના નાલંદા-1 માલપુર રોડ સ્થિ ઘરથી અટકાયત કરી હતી.

પોલીસની પુછપરછમાં યુવકે જણાવ્યું હતું કે તે અને યુવતી એક જ સમાજના હોય અને મોડાસા ખાતે રહેતા હતા અને બંને MBBSમાં અભ્યાસ કરતા હોવાથી મોડાસાની વિવિધ મેડિકલ કોલેજમાં અભ્યાસ કરતા વિદ્યાર્થીઓના વોટ્સએપ ગૃપમાં છે, જેનો એડમિન તે પણ છે. તેથી તેણે યુવતીને તે ગૃપમાં એડ કરી હતી. તેને જાણવા મળેલું કે તેમના બંનેના પિતા પણ મિત્રો છે. જેથી બંને વચ્ચે વોટ્સએપમાં મેસેજથી વાતચીત થતી હતી. પરંતુ યુવતી બરાબર રિસ્પોન્સ આપતી ન હતી અને તેને અવોઈડ કરી હતી. તેથી તેને તુચ્છ ગણતી હોવાની લાગતા તેણે બદલાની ભાવનાથી હેરાન કરવાના ઈરાદે તેના મોબાઈલથી જુદાજુદા ID બનાવીને મિત્રોને મેસેજ કર્યા હોવાની કબૂલાત કરતાં પોલીસે તેની અટકાયત કરી હતી.

સાયબર એક્સપર્ટ જીતેશ ત્રાપસીયા જણાવે છે કે, આજકાલ લોકો સોશિયલ મીડિયાનો ભરપૂર ઉપયોગ કરી રહ્યા છે. કોઇ વેપાર માટે તો કોઇ મનોરંજન માટે, કોઇ ગપસપ કરવા માટે તો કોઇ નવા નવા મિત્રો બનાવવા માટે. WhatsApp, Facebook, Instagram, Twitter, YouTube, snapchat જેવી એપ્લિકેશન વડે સતત એકબીજાના સંપર્કમાં રહેતા હોય છે. પરંતુ અહીં પણ તમારી સાથે છેતરપિંડી કરવા માટે ઘણા અસામાજીક સાયબર તત્વો તમને મુશ્કેલીમાં મૂકી શકે છે. જેમ કે, સોશિયલ મીડિયા પર અન્ય વ્યક્તિના નામે ફેક પ્રોફાઇલ બનાવવી, સોશિયલ મીડિયા પર અન્ય વ્યક્તિના પ્રોફાઇલ પેજ હેક કરવા કે અન્ય કોઇ વ્યકિતના ફોટો કે વીડિયો બિનઅધિકૃત રીતે અપલોડ કરવા, અન્ય કોઇ વ્યકિત વિશે અપશબ્દોનો ઉપયોગ, બીભત્સ ભાષા, સાહિત્ય કે પોર્નોગ્રાફી, સાયબર બુલિંગ, ફેક ન્યૂઝ કે ખોટી અફવા ફેલાવવી, ધર્મ, જાતિ, ભાષા કે પ્રાંતને નિશાન બનાવી અન્યની લાગણીને ઠેસ પહોંચાડવી તેમજ તે પ્રકારની માહિતી, ફોટા કે વીડિયો અપલોડ કરવા, ટેગ અથવા શેર કરવું પણ ગંભીર ગુનો બને છે. સોશિયલ મીડિયાથી થતા નુકશાનની સાથે તેના સાચા ઉપયોગ અંગે માર્ગદર્શન મેળવી સાયબર ક્રાઈમનો ભોગ બનતાં અટકાવી શકાય છે.