નડાબેટ ખાતે સીમા દર્શન કાર્યક્રમ અંતર્ગત ચાલતા વિકાસ કામોનું પ્રવાસન મંત્રીએ નિરીક્ષણ કર્યુ

Published By : B.K.NEWS DAINIK
Published Date : 2019-08-03 11:51:05
Views : 482
Modified Date : 2019-08-03 11:51:05

ભારત-પાકિસ્તાન
આંતરરાષ્ટ્રીય સરહદ નજીક નડાબેટ ખાતે ગુજરાત રાજ્ય પ્રવાસન નિગમ દ્વારા ટુરીઝમ તરીકે વિકસાવવા વિવિધ વિકાસના કામો હાથ ધરવામાં આવ્યા છે. આ કામોનું નિરીક્ષણ કરવા પ્રવાસન અને મત્સ્ય ઉદ્યોગ મંત્રી જવાહરભાઇ ચાવડાએ સૂઇગામ તાલુકાના નડાબેટની મુલાકાત લઇ વિકાસકામોનું નિરીક્ષણ કર્યુ હતું. આ પ્રસંગે મંત્રીએ ટુરીઝમના વિકાસકામો ગુણવત્તાયુક્ત અને સમયમર્યાદામાં પૂર્ણ કરવા અધિકારીઓને સૂચના આપી હતી.
મંત્રીએ ભારત-પાકિસ્તાન આંતરરાષ્ટ્રીય સરહદની મુલાકાત લઇ બી.એસ.એફ.ના જવાનોને મળ્યા હતા. નડાબેટ ખાતે રૂ. ૭૫ કરોડનો સીમા દર્શન પ્રોજેક્ટ આકાર પામી રહ્યો છે જેમાં બે જગ્યાએ વિકાસકામો કરવામાં આવી રહ્યા છે. જેમાંથી નડેશ્વરી માતાના મંદિર પાસે વિસામોની કામગીરી પૂર્ણ કરવામાં આવી છે. જયારે ટી જંકશન પાસે જુદા જુદા બે ફેઝમાં કામગીરી કરવામાં આવી રહી છે. પ્રવાસીઓની સુવિધા માટે નડાબેટ ટી જંકશન ખાતે ફેઝ-૧ માં મુખ્ય કમ્પોનન્ટમાં આગમન પ્લાઝા અને ફુડ પ્લાઝા, જાહેર પા‹કગ, ઓડિટોરીયમ, સોવિનિયર દુકાન, જાહેર ટોયલેટ બ્લોક, આઉટડોર ડેવલપમેન્ટ, રિટેનિંગ વોલ અને સમગ્ર જમીનને સમતલ કરવાની કામગીરીનો સમાવેશ થાય છે. જયારે ફેઝ-૨માં મુખ્ય કમ્પોનન્ટમાં એક્ઝિબિશન હોલ, બી.એસ.એફ. બેરેક્સ, અજય પ્રહરી સ્મારક,
પરેડ ગ્રાઉન્ડ, રિટ્રીટ સેરેમની, યુજી વોટર ટેન્ક, આઉટર ડેવલપમેન્ટ અને રિટેનિંગ વોલનો સમાવેશ થાય છે.
અત્રે ઉલ્લેખનીય છે કે મુખ્યમંત્રી વિજયભાઇ રૂપાણીના હસ્તે તા. ૨૪ ડિસેમ્બર-૨૦૧૬ના રોજ ભારત-પાકિસ્તાન સરહદે આવેલ નડાબેટ ઝીરો પોઇન્ટ બોર્ડરને ટુરીઝમ તરીકે વિકસાવવા પ્રવાસન સ્થળ તરીકે ખુલ્લુ મુકવામાં આવ્યું હતું. સીમા દર્શન એ એક અનોખો કાર્યક્રમ છે. જેમાં સ્થાનિક રોજગારી, સ્થાનિક લોકોની માહિતી તથા ભારતીય સીમા સુરક્ષા દળ દ્વારા ભારતમાંથી તથા દૂર દૂરના વિસ્તારમાંથી આવતા પ્રવાસીઓ અને મુલાકાતીઓ માટે આ કાર્યક્રમમાં બોર્ડરની મુલાકાત સાથે બી.એસ.એફ. દ્વારા કરવામાં આવતી રીટ્રીટ સેરેમની જોવાનો અદ્દભૂત લ્હાવો મળે છે.
મંત્રીની મુલાકાત પ્રસંગે અગ્રણી ઉમેદદાન ગઢવી, બાવાભાઇ પટેલ, સુઇગામ પ્રાંત અધિકારી આર.બી.અસારી, જિલ્લા આયોજન અધિકારી જે. આર. પટેલ, પ્રવાસન નિગમના અધિકારી, બી.એસ.એફ.ના ઓફિસર સુધીર હુડ્ડા સહિત અધિકારીઓ, અગ્રણીઓ અને સીમા સુરક્ષા દળના જવાનો ઉપસ્થિત રહ્યા હતા.