અમદાવાદનો ચોંકાવનારો કિસ્સો! કામવાળી સાથે પ્રેમમાં પડેલા પતિએ પત્નીને માર મારીને ઘરમાંથી કાઢી મૂકી.

Published By : B.K.NEWS DAINIK
Published Date : 2021-04-04 13:16:02
Views : 319
Modified Date : 2021-04-04 13:16:02

શહેરના કૃષ્ણનગરમાં રહેતી એક પરિણીતાનો પતિ ઘરકામ માટે ઘરે આવતી મહિલાના પ્રેમમાં જ પડી ગયો અને બાદમાં પત્નીને ત્રાસ આપવા લાગ્યો હતો. જ્યારે પત્નીએ પતિને મહિલા સાથે પ્રેમ સંબંધ ન રાખવા માટે કહ્યું તો તેને પતિએ મારીને ઘરમાંથી કાઢી મૂકી હોવાનો આક્ષેપ થયો છે. આ પરિણીતાએ કંટાળીને હવે પતિ તથા તેની પ્રેમિકા વિરુદ્ધ નિકોલ પોલીસ સ્ટેશનમાં ફરિયાદ નોંધાવી છે.

ઘટનાની વિગતો મુજબ, મૂળ સુરેન્દ્રનગરની અને હાલ કૃષ્ણનગરમાં રહેતી 35 વર્ષીય મહિલાએ ફરિયાદ નોંધાવી છે કે તેના લગ્ન સાત વર્ષ પહેલા થયા હતા. બાદમાં મહિલાએ ઘર કામ માટે એક યુવતીને ઘરમાં રાખી હતી. યુવતી અને પતિ વચ્ચે પ્રેમના અંકુર ફૂટતા બંને વચ્ચે સંબંધ બંધાયો હતો. મહિલાએ તેનો વિરોધ કર્યો તો પતિ તેની સાથે મારઝૂડ કરતો હતો.

આ બાદ મહિલાએ તે યુવતીને ઘરની બહાર નીકળી જવા માટે કહેતા પતિ તેને ઘરમાં જ રાખવા માટે દબાણ કરવા લાગ્યો. આટલું જ નહીં, પતિએ પત્ની સાથે નહીં પણ ઘરકામ માટે રાખેલી તેની પ્રેમિકા સાથે રાત્રિના સમયે સૂવાની વાત કરી. પત્નીએ આમ કરવા દેવાની ના પાડી તો ઉશ્કેરાયેલા પતિએ તેની સાથે મારઝૂડ કરી ઘરમાંથી કાઢી મૂકતા પત્ની પોતાના પિયર રહેવા જતી રહી હતી, પરંતુ તે સંતાનોને સાથે લઇ ગઇ ન હતી. જેથી અમુક દિવસો બાદ પરિણીતા તેના બાળકોને મળવા માટે જતી ત્યારે પતિ અને તેની પ્રેમિકા અવારનવાર મહિલાને ત્રાસ આપતા હતા.

જેથી કંટાળીને મહિલાએ નિકોલ પોલીસ સ્ટેશનમાં તેના પતિ અને તેની પ્રેમિકા સામે અરજી કરી હતી. તેમ છતાં પણ તેનો પતિ તેની પ્રેમિકાને છોડવા તૈયાર ન હોવાથી મહિલાએ તેના પતિ અને પ્રેમિકાની વિરુદ્ધમાં ફરિયાદ નોંધાવતા પોલીસે કાર્યવાહી હાથ ધરી છે.