ગુજરાતમાં લમ્પી વાયરસે વધારી ચિંતા, મહીસાગરના 200 પરિવારે કરી હિજરત,તો બનાસકાંઠા કલેકટરે બહાર પાડ્યુ જાહેરનામુ

Published By : B.K.NEWS DAINIK
Published Date : 2022-07-28 15:05:05
Views : 332
Modified Date : 2022-07-28 15:05:05

ગુજરાતમાં લમ્પી વાયરલ કહેર મચાવી રહ્યો છે. એકબાદ એક ટપોટપ પશુઓના મોત થઇ રહ્યા છે. ત્યારે આ અંગે રાજ્ય સરકાર પણ ચિંતિત જણાઇ છે. આ મામલે પશુપાલન મંત્રી રાઘવજી પટેલે નિવેદન આપતા જણાવ્યું હતુ કે રાજ્યના 15 જિલ્લામાં લમ્પી વાયરસના કેસ નોંધાયા અને અત્યાર સુધીમાં લમ્પી વાયરસને કારણ 1021 પશુઓના મોત નીપજ્યા છે. ત્યારે વધતા કહેરને પગલે મહિસાગરમાંથી લોકોએ હિજરત કરવાની ફરજ પડી.

મહીસાગરમાં 200 પરિવારે કરી હિજરત

લંપી વાયરસના ભયના પગલે મહીસાગરમાંથી 200થી વધુ પરિવારે હિજરત કરી છે. પાણી અને ઘાસચારા માટે ગુજરાત આવેલા પશુપાલકોએ હિજરત કરવાની ફરજ પડે. રાજસ્થાન અને અન્ય રાજ્યોમાંથી આવેલા પરિવારે હવે પોતાના વતનની વાટ પકડી છે. કારણ કે માલધારીઓમાં ભય છે કે ક્યાંક લમ્પી વાયરસ તેઓના પશુઓને લાગુ ન પડી જાય.

બનાસકાંઠા કલેક્ટરનું જાહેરનામું

તો લમ્પી વાયરસના કહેરને પગલે બનાસકાંઠા કલેકટરે જાહેરનામું બહાર પાડ્યુ. પશુની હેરાફેરી, મેળા, પ્રદર્શન ઉપર પ્રતિબંધ મૂકવામાં આવ્યો છે. મહત્વનુ છે કે બનાસકાંઠામાં લમ્પી વાયરસના વધુ 275 કેસ નોંધાયા છે અને 119 ગામમાં લમ્પી વાયરસના કેસ જોવા મળ્યા છે.

રાજ્ય સરકારે બેઠક બોલાવી આપી સૂચના

મહત્વનું છે કે મુખ્યમંત્રીશ્ ભૂપેન્દ્ર પટેલે રાજ્યના પશુધનમાં લમ્પી સ્કીન રોગચાળા અંગે 27 જુલાઇએ સમીક્ષા બેઠક યોજી જેમાં મંત્રીશ્રીઓ અને દૂધ ઉત્પાદક સંઘોના ચેરમેનશ્રીઓ ઉપસ્થિત રહ્યા હતા. આ પશુરોગના નિયંત્રણ માટે સરકાર તમામ શક્ય પગલાં લઈ રહી છે તથા અત્યાર સુધીમાં 3.33 લાખ પશુઓને રસીકરણ કરવામાં આવ્યું હોવાની માહિતી જણાવી હતી. તેમજ બેઠકમાં રોગચાળો ફેલાતો અટકાવવા અસરગ્રસ્ત જિલ્લાઓમાં પશુઓની હેરફેર પર પ્રતિબંધ મુકવા તથા રોગ પ્રભાવિત ગામોમાં રસીકરણ, દવા-સારવારનો પ્રબંધ, માખી-મચ્છરનો ઉપદ્રવ રોકવા દવા છંટકાવ, જિલ્લા કક્ષાએ મોનિટરીંગ તેમજ સંકલન સમિતિની રચના, જનજાગૃતિના પગલાં સહિતની સૂચનાઓ તંત્રને આપી હતી.