7 વર્ષમાં રૂ. 410નો LPG 819નો થયો, પેટ્રોલ-ડીઝલ પરની આવકમાં 459%નો અધધધ વધારો.

Published By : B.K.NEWS DAINIK
Published Date : 2021-03-09 11:12:27
Views : 214
Modified Date : 2021-03-09 11:12:27

રાંધણગેસના ભાવ છેલ્લાં 7 વર્ષમાં બમણા થઈને સિલિન્ડર દીઠ 819 રૂપિયા પર પહોંચ્યા છે. જ્યારે પેટ્રોલ-ડીઝલ પરની કરની આવકમાં લગભગ 459%નો વધારો થયો હોવાનું પેટ્રોલિયમ પ્રધાન ધર્મેન્દ્ર પ્રધાને સોમવારે સંસદમાં જણાવ્યું હતું. એક લેખિત જવાબમાં તેમણે કહ્યું કે 1 માર્ચ 2014ના રોજ રાંધણગેસના સિલિન્ડરનો ભાવ 410 રૂપિયા હતો જે આજે 819 છે.

થોડાં વર્ષો દરમિયાન નાનો-નાનો ભાવવધારો અને સબસિડી હટાવવાને કારણે રાંધણગેસ અને કેરોસીનના ભાવમાં વધારો થયો હોવાનું તેમણે કહ્યું હતું. ડિસેમ્બર 2020માં સિલિન્ડરનો ભાવ 594 રૂપિયા હતો. માર્ચ 2021માં 819 પર પહોંચ્યો છે. પીડીએસ મારફતે ગરીબો માટે વેચાતા કેરોસીનનો ભાવ પણ બમણાથી વધુ થઈ ગયો છે. માર્ચ 2014માં લિટરદીઠ કેરોસીનનો ભાવ રૂપિયા 14.96 હતો તે માર્ચ 2021માં લિટર દીઠ રૂ. 35.35 થયો છે.

પેટ્રોલ અને ડીઝલનો ભાવ પણ ઓલટાઈમ હાઈ છે. દરેક રાજ્યના સ્થાનિક કર પ્રમાણે લિટરદીઠ પેટ્રોલનો ભાવ રૂ. 91.17 અને ડીઝલનો ભાવ 81.47ની આસપાસ ચાલી રહ્યો છે. 2013માં પેટ્રોલ-ડીઝલ દ્વારા થયેલી કરની આવક રૂ.52537 કરોડ હતી જે વધીને 2019-20માં 2.13 લાખ કરોડ પર પહોંચી છે. છેલ્લા 11 મહિના દરમિયાન આ આવક વધીને રૂ. 2.94 લાખ કરોડ થઈ છે.દેશમાં પેટ્રોલ-ડીઝલની કિંમતમાં વધારાની વચ્ચે રવિવારે સાઉદી અરબની સૌથી મોટી સરકારી ઓઈલ કંપની અરામ્કો પર હુમલો કરાયો હતો. હુતી વિદ્રોહીઓએ 14 ડ્રોન અને 8 બેલાસ્ટિક મિસાઈલ વડે હુમલો કર્યો હતો. જોકે મિસાઇલને હવામાં જ તોડી પડાઈ હતી.

અરામ્કોને નુકસાન થયું નથી. જો કે ભારતીય તજજ્ઞો માને છે કે આ હુમલા પછી ક્રૂડ ઓઈલના ભાવ વર્ષની સર્વોચ્ચ સપાટીએ પહોંચતા આપણે ત્યાં પણ તેની અસર થઈ શકે છે. ક્રૂડના ભાવ 3 ટકા વધ્યાં હતા.