લૂ લાગવાથી બચવા માટે જરૂર સિવાય બપોરના સમયે બહાર નીકળવાનું ટાળવુ જોઇએ : ડો.ચિંતન દેસાઇ

Published By : B.K.NEWS DAINIK
Published Date : 2019-05-04 12:08:20
Views : 460
Modified Date : 2019-05-04 12:08:20

ભારે ગરમી તથા ગરમ હવા ઉત્પન્ન થાય ત્યારે તાપમાન અત્યંત ઊંચા સ્તર સુધી પહોંચે છે અથવા ગરમી અને ભેજ સાથે મળે ત્યારે હિટ સ્ટ્રોકની પરિસ્થિતિ સર્જાય છેઉનાળાની ઋતુમાં વિરમગામ શહેર સહિત તાલુકામાં બપોરે ગરમીનું પ્રમાણ ધીમેધીમે વધી રહ્યુ છે અને લોકો બપોરના સમયે ઘરમાંથી બહાર નીકળવાનું ટાળી રહ્યા છે. ત્યારે તાલુકા હેલ્થ ઓફિસ વિરમગામના સેવા વિસ્તારમાં અમદાવાદ જિલ્લા રોગચાળા નિયંત્રણ અધિકારી ડો.ચિંતન દેસાઇ અને વિરમગામ તાલુકા હેલ્થ ઓફિસર વિરલ વાઘેલા દ્વારા વિરમગામ શહેર, થોરી મુબારક અને કરકથલ ગામમાં લોકોને લૂ લાગવાથી બચવાના ઉપાયો અંગે જરૂરી માર્ગદર્શન આપવામાં આવ્યુ હતુ. વિરમગામ તાલુકાના આરોગ્ય વિભાગ દ્વારા લોકોને લૂ લાગવાથી બચવાના ઉપાયો અંગે સમજણ આપવામાં આવી રહી છે. ગરમીના કારણે શરીર ઉપર થતી વિપરીત અસરોથી બચવા માટે શક્ય તેટલુ વધુ પાણી પીવુ જોઇએ અને બપોરના સમયે બહાર નીકળવાનું ટાળવુ જોઇએ.અમદાવાદ જિલ્લા રોગચાળા નિયંત્રણ અધિકારી ડો.ચિંતન દેસાઇએ જણાવ્યું હતું કે, ભારે ગરમી તથા ગરમ હવા ઉત્પન્ન થાય ત્યારે તાપમાન અત્યંત ઊંચા સ્તર સુધી પહોંચે છે અથવા ગરમી અને ભેજ સાથે મળે ત્યારે હિટ સ્ટ્રોકની પરિસ્થિતિ સર્જાય છે. વધુ પડતી ગરમી એ મનુષ્યના આરોગ્યને હાની પહોંચાડે છે. ગરમીના વધારાના કારણે શરીરમાં લુ લાગવાના કેસો નોધાઇ શકે છે. જેમાં સમયસર સારવાર લેવામાં ન આવે તો તે જીવલેણ સબિત થઇ શકે છે. લૂ લાગવાના કેસોમાં સામાન્ય રીતે શરીરનું તાપમાન ખુબ જ વધી જાય છે. વાતાવરણનું તાપમાન ઉંચુ હોવાથી પરસેવો ખુબ વધારે થાય છે, જેના કારણે શરીરનું તાપમાન ઘટી શકતુ નથી. જે વ્યક્તિના આરોગ્ય ઉપર વિપરીત અસરો કરે છે જેવી કે શરીર અને હાથ પગમાં અસહ્ય દુઃખાવો, ખુબ જ તરસ લાગવી, ગભરામણ થવી, ચક્કર આવવા, શ્વાસ ચડવો, હૃદયના ધબકારા વધી જવા. ગરમીના સમયે પણ બપોરે મજુરી કરતા લોકોને લૂ લાગવાની શક્યતાઓ વધુ રહેલી છે. લૂ લાગવાથી બચવા માટે શક્ય હોય તો બપોરના સમયે જરૂર સિવાય બહાર નીકળવાનું ટાળવુ જોઇએ. સગર્ભા બહેનો નાના બાળકો અને વડીલોનું ઉનાળાની ઋતુ દરમિયાન ખાસ ધ્યાન રાખવું જોઈએ.વિરમગામ તાલુકા હેલ્થ ઓફિસર વિરલ વાઘેલાએ લૂ લાગવાથી બચવાના ઉપાયો અંગે જણાવ્યું કે, ઉનાળાની ઋતુ દરમ્યાન ખુલતા, સફેદ અને સુતરાઉ કપડાં પહેરવા જોઇએ. નાના બાળકો, સગર્ભા માતાઓ, વડીલો, અશક્ત વ્યક્તિઓએ તડકામાં ફરવુ નહિ. દિવસ દરમ્યાન પુષ્કળ પ્રમાણમાં પ્રવાહી પીવુ જોઇએ. શક્ય હોય તો લીંબુનું સરબત બનાવીને પીવું જોઇએ. ભીના કપડાંથી માથું ઢાંકી રાખવુ અને જરૂર જણાય તો અવારનવાર ભીના કપડાંથી શરીર લુછવુ જોઇએ. ગરમીની ઋતુ દરમ્યાન બને ત્યા સુધી ભુખ્યા ન રહેવુ જોઇએ. માથાનો દુઃખાવો, બેચેની, ચક્કર, ઉબકા કે તાવ આવે તો તરત જ ૧૦૮ અથવા નજીકના સરકારી દવાખાનો રૂબરૂ સંપર્ક કરવો જોઇએ તથા ડોક્ટરની સલાહ-સારવાર લેવી જોઇએ.