વડોદરાના વોર્ડ નં-6માં જીવિત મતદારને મતદાર યાદીમાં મૃત બતાવી દીધો, મતદારે કહ્યું: 'હું જીવિત છું, મને મતદાન કરવા દો'

Published By : B.K.NEWS DAINIK
Published Date : 2021-02-21 14:07:07
Views : 298
Modified Date : 2021-02-21 14:07:07

ચૂંટણી તંત્ર દ્વારા તૈયાર કરવામાં આવેલી મતદાર યાદીઓમાં ગંભીર છબરડા સામે આવ્યા છે. જેમાં વડોદરાના વોર્ડ નં-6માં એક મતદાતા જીવિત હોવા છતાં મતદાર યાદીમાં મૃત બતાવતા તેઓને મતદાનથી વંચિત રહેવાનો વખત આવ્યો હતો. મતદારે અધિકારીઓને જણાવ્યું કે, હું જીવિત છું. મને મતદાન કરવા દો.

આજે વડોદરા મહાનગરપાલિકાની સામાન્ય ચૂંટણીના મતદાન સમયે તંત્રની બેદરકારીના લીધે મત આપી ન શકતા મતદાર રાજુભાઇ ચાવડાએ રોષ વ્યક્ત કર્યો હતો. વડોદરા શહેરના ભૂતડીઝાપા વિસ્તારમાં રહેતા રાજુભાઇ ચાવડાએ જણાવ્યું હતું કે, હું વોર્ડ નં-6નો મતદાર છું. સવારે મતદાન મથક ઉપર મત આપવા માટે ચૂંટણી કાર્ડ લઈને ગયો હતો. મતદાર યાદીમાં મારું નામ તપાસ કરાવ્યું હતું. યાદીમાં નામ હતું, પરંતુ, યાદીમાં મને મૃત જાહેર કરાયેલો હતો.

મતદાર રાજુભાઇ ચાવડાએ જણાવ્યું હતું કે, મે મતદાન મથકના જવાબદાર અધિકારીઓને મે જણાવ્યું કે, હું જીવિત છું. છતાં મારૂ નામ મતદાર યાદીમાં મૃત બતાવે છે. મને મતદાન કરવા દો, પરંતુ, અધિકારીઓએ મતદાન કરવા ન દેતા મારે મતદાનથી વંચિત રહેવું પડ્યું હતું.મતદાર રાજુભાઇ ચાવડાએ તંત્ર સામે રોષ ઠાલવતા જણાવ્યું હતું કે, હું પોતે જીવિત હોવા છતાં ચૂંટણી તંત્રની બેદરકારીના પગલે મત આપી શક્યો નથી, તેનુ મને દુઃખ છે. આમ મતદાન સમયે મતદાન ન કરી શકતા મતદાતાઓએ ચૂંટણી પ્રક્રિયાની કામગીરી સામે સવાલો ઉભા કર્યા હતા.

કેટલાક મતદાન મથકોમાં મતદારોના નામો યાદીમાં જોવા ન મળતા મતદારોને મતદાન કર્યાં વગર પરત ઘરે જવું પડ્યું હતું. તો કેટલાક મતદારો પોતાનું મતદાર યાદીમાં ન જોવા મળતા મતદાન મથકના જવાબદાર અધિકારીઓ સાથે ઘર્ષણમાં ઉતરી ગયા હતા. નવા સિમાંકનના કારણે વોર્ડોમાં થયેલા ફેરફારોના કારણે મતદારો અટવાઇ ગયા હતા. મતદારોને પોતાના નામો શોધવા માટે અને મતદાન કરવા માટે ફેરબદલી થયેલા વોર્ડોના બુથો ઉપર રઝળપાટ કરવી પડી હતી. સિમાંકનના કારણે સર્જાયેલી ભારે આપદાના કારણે મતદારોમાં તંત્ર સામે ભારે રોષ જોવા મળ્યો હતો. કેટલાંક મતદાન મથકો ઉપર ઓળખ કાર્ડના મુદ્દે પણ ઘર્ષણ થતું જોવા મળ્યું હતું.

વડોદરાના મતદાન મથકો પર મતદાન ધીમી ગતિએ શરૂ થયું હતું. 10-15 મિનીટના અંતરે માંડ એક-બે મતદારો મતદાન કરવા માટે આવ્યા હતા. તો કેટલાક મતદાન મથકો ઉપર મતદારોની કતારો જોવા મળી હતી. મતદાન મથકોમાં મતદારોનો ધસારો ન થાય તે માટે એક પછી એક મતદારોને પ્રવેશ આપવામાં આવી રહ્યો છે.